თიბისი კონცეპტის მომხმარებელს შესაძლებლობა აქვს გაწევრიანდეს Runners Club-ში

ქვეყანაში ბოლო პერიოდში განვითარებულ მოვლენებზე ანალიტიკოსი ვაჟა ბერიძე გვესაუბრება.- მთავრდება პერიოდი, როდესაც სანქციები შეეხებოდა ქართველ ხალხს და მათი ღონისძიებები მიმართული იყო მმართველი ძალის წინააღმდეგ. თუმცა უნდა ითქვას, რომ ბოლო ხანებში ეს პრინციპი იცვლება. ამაზე მეტყველებს საერთაშორისო დემოკრატიული კავშირის რეზოლუცია, რომელიც მოუწოდებს შესაბამის უწყებებს ქართული საფინანსო ორგანიზაციების დასანქცირებისკენ. ამ ორგანიზაციის მიერ ეს ომის გამოცხადების ტოლფასია, იმიტომ, რომ სანქციების შემთხვევაში ჩვენი საფინანსო ინსტიტუციები, ეროვნული და კომერციული ბანკები, მიიღებენ უძლიერეს დარტყმებს, რაც ასევე ძალიან სერიოზული პრობლემა იქნება ჯერ ქართველი ხალხისთვის და შემდეგ ხელისუფლებისთვის. ეს, ჩემი აზრით, იმაზე მეტად საყურადღებოა, ვიდრე უვიზო მიმოსვლის შეჩერება შეიძლება ყოფილიყო. საგულისხმო ამბავია, რომ ჩვენი ხელისუფლება დასავლელი პარტნიორების კრიტიკას კრიტიკითვე პასუხობს, ისედაც მძიმე ვითარებას კიდევ მეტად ამძიმებს. ქართველი საზოგადოება კი ისევ ოფსაიდშია... რა თქმა უნდა, ჩვენს საზოგადოებას ეს არ მოსწონს, მაგრამ ჯერ კიდევ დინჯად აკვირდება პროცესებს და არ აპირებს ყავლგასული ოპოზიციონერი პოლიტიკოსების, გულწრფელი ახალგაზრდების ან შარახვეტიების დაძახილზე გამოვიდეს ქუჩაში და რევოლუციურ სცენარში მიიღოს მონაწილეობა.- თქვენ გრჩებათ განცდა, რომ ოპოზიციაში რევოლუციური სცენარები მზადდება?  - დაკვირვებული თვალისთვის ადვილად შესამჩნევია, რომ თბილისში აგორებული საპროტესტო ტალღა ძალიან მალე გადავიდა რევოლუციური სცენარის რეალიზაციაზე, როდესაც ოპოზიციამ უარი თქვა საპარლამენტო საქმიანობაზე, გამოვიდნენ ქუჩაში და შეეცადნენ სათავისოდ გამოეყენებინათ ხალხის გულწრფელი აღშფოთება ევროინტეგრაციის გადავადების გამო. ის კონკრეტიკა, რაც ამ ყველაფერს ახლდა, დემოკრატიული პროცესის მიმანიშნებელი არ იყო.- რას გულისხმობთ?- თუნდაც ვადამდელი არჩევნების მოთხოვნას, რომელიც უნდა ჩაეტარებინა არა ამჟამინდელ და გადაკომპლექტებულ ცესკოს ახალი პრინციპების საფუძველზე, არამედ საერთაშორისო ორგანიზაციას. მიმაჩნია, რომ ეს იყო რევოლუციური სცენარი. ახლა ვინ რა უნდა მოუწოდოს, როდესაც მთელი ოპოზიციური სპექტრის რეიტინგი ძალზე დაბალია. სხვათა შორის, თვალში საცემია, რომ ბოლო დროს პოლიტიკური რეიტინგები აღარ იზომება. ვფიქრობ, ამ საკითხში ბუნდოვანება ხელისუფლებასაც აწყობს და ოპოზიციასაც, იმიტომ, რომ ორივეს რეიტინგი უაღრესად დაბალია. ოპოზიციაში იმდენად არაპოპულარული ლიდერები არიან, მათ მიერ რევოლუციისკენ მოწოდებამ შესაძლოა რევოლუციის დისკრედიტაცია გამოიწვიოს. ამ მოცემულობის შესაბამისად, ლოგიკურია, რომ ოპოზიციონერი ლიდერები რევოლუციაზე არ ლაპარაკობენ, თუმცა ეს იდეა ჰაერშია გამოკიდებული. როდესაც მასობრივ აქციებს ვერ მართავ და ხელისუფლების ჩამოშლას ვერ ახერხებ, მაინც არ შედიხარ პარლამენტში ე.ი. რაღაც მომენტს ელოდები.- რევოლუციური სცენარის რა მოგახსენოთ, მაგრამ ოპოზიციის ერთი ნაწილი ალტერნატიული არჩევნების ჩატარებას განიხილავს. მაგალითად, "ნაციონალი" ლევან ხაბეიშვილი ამბობს, რომ 4 ოქტომბერს ცრუ არჩევნები ვერ შედგება, მიმდინარეობს მსჯელობა ალტერნატიულ არჩევნებზე და ეს არის საკითხი, რომლის გარშემოც, დარწმუნებული ვარ, გავერთიანდებითო.- ძალიან მომინდა ხუმრობა, რაკი ლევან ხაბეიშვილმა თქვა, გაერთიანდება ოპოზიცია, აბა რა. მოდი, ობიექტური ვიყოთ, ქართველებს არ გვიყვარს ტაკიმასხარაობა. ინიციატივა სატელეფონო არჩევნების შესახებ არანაირ ლოგიკაში არ ჯდება. ამ ლოგიკით, ძალიან მარტივად შეუძლიათ ლევან ხაბეიშვილს, პაატა ბურჭულაძესა და სალომე ზურაბიშვილს, რომ დასხდნენ და დაწერონ არჩევნების შედეგი, საპარლამენტო მანდატების რაოდენობა და ეს პოსტ-ფაქტუმ გამოგვიცხადონ. რეალობა ის არის, რომ ოპოზიციამ ჯერაც ვერ მოიპოვა ქართველი საზოგადოების მხარდაჭერა. ნამდვილად ბევრია იმ ახალგაზრდებისა და ზოგადად, მოქალაქეების რიცხვი, რომლებსაც ჩემსავით აღელვებთ ევროპულ არჩევანზე უარის თქმა, მაგრამ ოპოზიციამ ვერ უწინამძღვრა პროტესტს. ეს მეტყველებს, რომ სატელეფონო შარიშური შედეგის მომტანი არ არის. ოპოზიციურ ფრთას ვურჩევ, ახალგაზრდა ლიდერები მოძებნონ, მოუსმინონ და გაიზიარონ მათი იდეები, შეუძლიათ თავიანთ პარტიებშიც მოიძიონ არაკორუმპირებული ახალგაზრდა პოლიტიკოსები და ისინი ჩააყენონ პროცესის სათავეში. "ევროპა, ევროპას" ძახილი არც ინდულგენციაა და არც პანაცეაა, რეალური საქმეა საჭირო. ქართველი საზოგადოება ძალიან მრავალშრიანია და მათთან საუბარი ყველას არ შეუძლია. ძალიან მნიშვნელოვანია, რომ პოლიტიკური ოპოზიცია უფრო ადეკვატური და ქმედუნარიანი გახდეს და ხელისუფლებას დაელაპარაკოს, წინააღმდეგ შემთხვევაში, ხელისუფლება მარტივად ჩაატარებს ადგილობრივი თვითმმართველობის არჩევნებს, მოიგებს კიდეც, ოპოზიცია კი თამაშგარე დარჩება, შედეგი კი ის იქნება, რომ უფრო აქტიურად გავაგრძელებთ გზას ახლო აღმოსავლეთისკენ, ჩინეთის დიდი კედლის მიმართულებით, საიდანაც შეიძლება მალე კრემლის კედელიც გამოჩნდეს. ამას იმიტომ ვამბობ, რომ ოპოზიცია ადეკვატურად არ აფასებს ხელისუფლების, სახელდობრ ივანიშვილის შესაძლებლობებს.- რას გულისხმობთ?- მაგალითად, მის ყოვლისმომცველ შესაძლებლობას, რომელიც სისტემის მართვას უკავშირდება. ასევე არ აფასებენ ირაკლი კობახიძეს, რომლის გონიერების უარყოფა და დამცრობა ან მარგინალიზება არასწორია. მაგალითად, ბოლო დღეებში ხელისუფლებამ მომაბეზრებლად ხშირად დაიწყო "დიფ სთეითზე" აპელირება. რა თქმა უნდა, ეს არ არის მოსაწონი, მაგრამ ამ საკითხზე არც ოპოზიციის ქილიკი და შაყირია მოსაწონი. ყველას მართებს სერიოზული დაფიქრება, თუ მართლა ევროატლანტიკურ სტრუქტურებში ინტეგრაცია გვინდა და არა გამოქვაბულში დაბრუნება...მე ყოველთვის მხარს ვუჭერდი ვადამდელი არჩევნების ჩატარებას, ოღონდ არა ვადამდელი ან ხელახალი, არამედ ორივე მხარის მიერ სანდოდ მიჩნეული ცესკოს საშუალებით. თუ საერთაშორისო ორგანიზაციების დახმარების გარეშე არჩევნების ჩატარებაც კი არ შეგვიძლია, მაშინ რის მაქნისი საზოგადოება ვართ? მე როგორც ვატყობ, ორივე მხარის მიერ სანდოდ მიჩნეული ცესკოს ჩატარებული არჩევნები არც ხელისუფლებას აძლევს ხელს და არც ოპოზიციას. ერთნი ამბობენ, მივდივართ ჩვეულებრივი გრაფიკით - ჯერ ადგილობრივი და მერე საპარლამენტოო, მეორენი ამბობენ, ჩავატაროთ სატელეფონო არჩევნები და ეს გამოვაცხადოთ ქართველი ხალხის ნებადო. სად ნახეს, რომ ასეთმა არჩევნებმა შედეგი მოიტანა? ისეთ სერიოზულ ხალხს, როგორიც პაატა ბურჭულაძე და სალომე ზურაბიშვილი არიან, არ ეკადრებათ ასეთი საუბრები. რაც შეეხება პლებისციტს, თუ ხელისუფლება და ოპოზიცია შეთანხმდებიან, რა თქმა უნდა, კარგი იქნება. ამ გზით შესაძლებელი გახდება ქართველი საზოგადოების პოლიტიკურ პროცესში დაბრუნება, საიდანაც გაძევებულია 90-იანი წლებიდან დღემდე. მე მომხრე ვარ, რომ ხალხს კონკრეტული შეკითხვები დაუსვან, მიუხედავად იმისა, შესაძლოა სერიოზული შეცდომაც დაუშვან პასუხის გაცემისას. თუმცა არა უშავს, სწორედ შეცდომების გასწორების პროცესში იგრძნობა პასუხისმგებლობა.- თუ პოლიტიკური სპექტრი ვერც პლებისციტზე შეთანხმდა და ვერც სხვა რამეზე, მათ შორის ოპოზიციაც ვერ შეთანხმდა ალტერნატიულ არჩევნებზე, როგორ წარმოგიდგენიათ, ოპოზიციის ნაწილი მიიღებს ვადამდელ არჩევნებში მონაწილეობას?- მე თუ მკითხავთ, ეს აუცილებელიც კია, იმიტომ, რომ საქართველოში პროცესის რეანიმირება აუცილებელია, ამისთვის კი საჭიროა პარტიებმა არჩევნებში მიიღონ მონაწილეობა, თუნდაც წინასწარ იცოდნენ, რომ არჩევნები გაყალბდება. პარტიებისთვის თუ ამა თუ იმ პოლიტიკოსისთვის პოლიტიკურ პროცესში მონაწილეობა აუცილებელია საკუთარი შეხედულებების პოპულარიზაციისა და ხალხამდე მიტანისთვის. ეს აუცილებელია იმისთვის, რომ ადრე თუ გვიან შეცვალონ ხელისუფლება.- ირაკლი კობახიძე ამბობს, რომ მას აქვს ინფორმაცია, თითქოს გახარიას პარტია აპირებს მონაწილეობას.- მიუხედავად იმისა, რომ ამ ნაბიჯით ოპოზიციური ფრონტი უფრო მოირღვევა, მე მაინც მივესალმები გახარიას პარტიის არჩევნებში მონაწილეობას. მეტსაც გეტყვით - ძალიან კარგი იქნებოდა მონაწილეობა მიეღო ადგილობრივი თვითმმართველობისა და ყველა შემდგომ არჩევნებში "ლელოს", იმიტომ, რომ ეს არის პარტია, რომელსაც სერიოზული ინტელექტუალური და ფინანსური რესურსი აქვს, სხვებისგან, თუნდაც გახარიასგან განსხვავებით. ეს იქნებოდა წინგადადგმული ნაბიჯი "ლელოს" სამომავლო პერსპექტივაში, რომ სოლიდურ პოლიტიკურ ძალად ჩამოყალიბდეს. როგორც ვხედავ, "ლელოს" ლიდერები ასე არ ფიქრობენ და ჩემთვის სრულიად ამოუხსნელია მათი პოლიტიკა, სტრატეგია და ტაქტიკა.წყარო - "კვირის პალიტრა" ხათუნა ბახტურიძე

1747842302

Global Tech Weekend Tbilisi 2025-ის მხარდამჭერია „თეგეტა ჰოლდინგი“. კომპანიამ წლებია, ციფრული ტრანსფორმაცია ბიზნესმოდელისა და მომხმარებელთან ურთიერთობის გაუმჯობესების ფუნდამენტად აქცია. ღონისძიების მონაწილეებს „თეგეტას“ დიგიტალ ტრანსფორმაციისა და ციფრული პროდუქტების, მათ შორის  Tegeta app-ის შესახებ ინფორმაციას, ჰოლდინგის ციფრული ტრანსფორმაციის ლიდი გაუზიარებს. ნიკა კოხოძე 21 ივნისს  Global Tech Weekend Tbilisi 2025-ის მთავარ ღონისძიებაზე  - Shaping the New Era გამოვა სიტყვით.ნიკა კოხოძე, „თეგეტა ჰოლდინგის“ ციფრული ტრანსფორმაციის ლიდი: „თეგეტასთვის“ ციფრული ტრანსფორმაცია არ არის მხოლოდ პროექტი — ესაა ბიზნესის განვითარების ძირითადი ღერძი. გვიხარია, რომ Global Tech Weekend Tbilisi 2025 ფარგლებში საშუალება მოგვეცემა, ტექსფეროს წარმომადგენლებს გავუზიაროთ ჩვენი გამოცდილება. ციფრული ტრანსფორმაციის პროცესში  შევქმენით მონაცემთა ერთიანი სტრუქტურა, მოვახდინეთ პროცესების ავტომატიზაცია, ციფრულ პროდუქტებზე აქცენტით.Tegeta App სწორედ ამ ტრანსფორმაციის ერთ-ერთი  მაგალითია, რომელიც  მომხმარებელს ავტომობილზე ზრუნვას უმარტივებს.  ის  არის ერთგვარი ციფრული ასისტენტი, შენი მანქანის პერსონალური მენეჯერი. ეს აპლიკაცია მხოლოდ „თეგეტას“ მომხმარებლებისთვის არ შეგვიქმნია, ის იქნება ერთიანი პლატფორმა ყველა ავტომფლობელისთვის საქართველოში, მომავალში — რეგიონშიც.Global Tech Weekend Tbilisi 2025-ი შესაძლებლობას მოგვცემს, საფუძველი ჩავუყაროთ პროფესიულ კომუნიკაციას, მივიღოთ უკუკავშირი იმ ადამიანებისგან, ვინც არა მხოლოდ გვისმენს, არამედ ხედავს განვითარების გლობალურ ტენდენციებსა და შესაძლებლობებს“.Global Tech Weekend Tbilisi 2025-ის მთავარი კონფერენცია სახელწოდებით Shaping the New Era 21 ივნისს,  Radio City | District 4-ში ჩატარდება და მას  3000-ზე მეტი სტუმარი, 100-ზე მეტი პარტნიორი კომპანია და სხვადასხვა ქვეყნიდან 80 სპიკერი დაესწრება. Radio City | District 4-ში ქართველი და უცხოელი წამყვანი ტექპროფესიონალები სხვადასხვა სცენაზე წარდგებიან: მოეწყობა მთავარი სცენა, სტარტაპების გამოფენა და კონკურსი, შიდა მცირე სცენა, Arrival Lab-სცენა, Co-Working სივრცე, მედიასივრცე და Chillout ზონა და სხვა. ბილეთების გაყიდვა მთავარი ღონისძიებისთვის უკვე დაწყებულია. სრული განრიგი კი ეტაპობრივად დაანონსდება.ღონისძიების პირველ და მესამე დღეს, Global Tech Weekend Tbilisi 2025-ის ქოლგის ქვეშ, არსებული Community Partner-ები თბილისის მასშტაბით ტექნოლოგიებთან დაკავშირებულ სხვადასხვა უნიკალურ  Side Event-ს გამართავენ.Global Tech Weekend Tbilisi 2025-ზე დასწრება შეუძლია ნებისმიერ მსურველს, ვისაც ტექნოლოგიები და მასთან დაკავშირებული ციფრული სფეროები აინტერესებს, სურს, შეხვდეს ინვესტორებს და გაიცნოს ინდუსტრიის წამყვანი პროფესიონალები. გარდა ადგილობრივი მონაწილეებისა, ღონისძიება უმასპინძლებს სტუმრებს მსოფლიოს სხვადასხვა წერტილიდან, რაშიც აქტიურად არიან ჩართულები GTWT 2025-ის ბრენდელჩები – საერთაშორისო მასშტაბით ცნობილი ათი პროფესიონალი, რომელთა მხარდაჭერით სხვადასხვა ქვეყანაში ინფორმაციის გავრცელება და სტუმრების მოწვევა ხდება.--,,თეგეტა ჰოლდინგის” შესახებ: უმსხვილესი საავტომობილო კომპანია კავკასიასა და ცენტრალურ აზიაში მომხმარებელს საავტომობილო ეკოსისტემის სრულ სპექტრს სთავაზობს, რაც მსუბუქ, სატვირთო და სამშენებლო, ასევე კომერციულ, სამგზავრო და ინდუსტრიულ ტრანსპორტს მოიცავს. მთელი ქვეყნის მასშტაბით ,,თეგეტას” 28 სერვისცენტრი აქვს. „თეგეტა“ ექსკლუზიურად წარმოადგენს ცნობილ ბრენდებს Porsche, Volvo, Toyota, Mazda, Geely, Zeekr. სატვირთო და სპეცტექნიკის მიმართულებით ჰოლდინგის პარტნიორები არიან ისეთი დიდი ბრენდები, როგორებიცაა: MAN, JCB, HINO, LIEBHERR, BOMAG და სხვები. ,,თეგეტა” მსოფლიოს 300-ზე მეტი წამყვანი საავტომობილო ბრენდის უმსხვილესი იმპორტიორია საქართველოში. ,,თეგეტა ჰოლდინგი”, 3000-მდე თანამშრომლით, დღეს საქართველოში ერთ-ერთი უმსხვილესი დამსაქმებელია.  

1747836116

Runners Club თიბისი კონცეპტის და Oktopus-ის ერთობლივი პროექტია, რომელიც ყოველ კვირა დღეს, სირბილის მოყვარულებს, ლისის ტბაზე, Oktopus-ის ინსტრუქტორებთან ერთად უმასპინძლებს.Runners Club-ში გაწევრიანებას თიბისი კონცეპტის 100 უნიკალური მომხმარებელი შეძლებს. კლუბის წევრობა უსასყიდლოა. კლუბის წევრობისთვის აუცილებელია იყოთ კონცეპტ მომხმარებელი.Runners Club-ს გაუძღვებიან Oktopus-ის პროფესიონალი ინსტრუქტორები: ანკა დუნდუა, მამუკა გურული, საბა ჯოჯუა და შაკო ხაჩიძე.Runners Club-ის წევრები, ასევე ისარგებლებენ სპეციალური 15%-იანი ფასდაკლებით ერთთვიანი აბონემენტის შეძენისას Oktopus Fitness Club-ში.პირველ 100 დარეგისტრირებულ მომხმარებელს, წევრობის დასადასტურებლად, დაუკავშირდება თიბისი კონცეპტის ასისტენტი დამატებითი კითხვების შემთხვევაში, გთხოვთ, მიმართოთ კონცეპტ ასისტენტს.დარეგისტრირდით და გახდით კლუბის წევრი.

1747834295

Fulbright აშშ-ს მთავრობის მიერ დაფინანსებული გლობალური სტუდენტური პროგრამაა, რომელიც სტუდენტებს აძლევს შესაძლებლობას, აშშ-ში მათთვის სასურველ მიმართულებასა და უნივერსიტეტში სამაგისტრო საფეხურზე სრული დაფინანსებით ისწავლონ.2014 წლიდან საქართველოს ბანკი Fulbright-ის პროგრამის მხარდამჭერია, რაც ნიშნავს იმას, რომ ფინანსური ინსტიტუტი ყოველწლიურად საკუთარ გამარჯვებულს ავლენს და მათ აშშ-ში როგორც სწავლის, ასევე ცხოვრების ხარჯებს სრულად უფინანსებს.უკვე გამოვლინდა საქართველოს ბანკის 15 სტიპენდიატი და მათი რაოდენობა ყოველწლიურად იზრდება.აღსანიშნავია, რომ Fulbright-ის პროგრამაში მონაწილეობის მიღება შეუძლია საქართველოს ყველა მოქალაქეს, რომელიც ფლობს ბაკალავრის ხარისხს ან არის მეოთხე კურსის სტუდენტი. სასტიპენდიო პროგრამის მოთხოვნებისა და განაცხადის შევსების წესების შესახებ ინფორმაცია ხელმისაწვდომია ბმულზე. აპლიკაციის ეტაპის წარმატებით გადალახვის შემდეგ, ახალგაზრდებს ჩაუტარდებათ გასაუბრება; შერჩეული აპლიკანტებმა უნდა ჩააბარებენ სამი ტიპის ტესტი: TOEFL, GRE, GMAT. 2026-2027 წლის Fulbright-ის სამაგისტრო პროგრამაზე აპლიკაციების შევსება 2025 წლის 1 აგვისტომდე არის შესაძლებელი. ამისათვის, ეწვიეთ საერთაშორისო განათლების ინსტიტუტის (IIE) პორტალს. 

1747825620

„მისიამ, რომელსაც ხელმძღვანელობს ალეხანდრო ჰაჟდენბერგი, პირველი შეხვედრა ფინანსთა მინისტრთან, ლაშა ხუციშვილთან გამართა.მიმდინარე მისიის მიზანია, საერთაშორისო სავალუტო ფონდის მიერ საქართველოში არსებული მაკროეკონომიკური მდგომარეობის, ქვეყნის ფისკალური და მონეტარული პოლიტიკის განხილვა.ლაშა ხუციშვილმა მისიის წევრებს გააცნო ეკონომიკაში არსებული ვითარება, 2025 წლის  ბიუჯეტის შესრულების მაჩვენებლები და საშუალოვადიანი პერიოდის პროგნოზები.შეხვედრას ქართული მხრიდან დაესწრნენ ფინანსთა მინისტრის მოადგილეები გიორგი კაკაურიძე, ეკატერინე გუნცაძე, მაკროეკონომიკური ანალიზისა და ფისკალური პოლიტიკის დაგეგმვის დეპარტამენტის ხელმძღვანელი ვახტანგ ჩალაფეიქრიშვილი“ – ნათქვამია ინფორმაციაში.

1747824878

მინისტრი ქვემო ქართლში მცხოვრებ იმ ფერმერებს შეხვდა, რომლებმაც სოფლის განვითარების სააგენტოს პროგრამებით ისარგებლეს. ფერმერებმა სახელმწიფოს მხარდაჭერის მნიშვნელობაზე ისაუბრეს და მინისტრისგან სამომავლოდ დაგეგმილ პროგრამებზე მიიღეს ინფორმაცია.დავით სონღულაშვილმა აგრარული დარგის განვითარების ხელშეწყობისთვის სახელმწიფოს მხრიდან სხვადასხვა მიზნობრიობის აქტივობაზე გაამახვილა ყურადღება და აღნიშნა, რომ ქართული პროდუქციის წარმოების ზრდის ტენდენცია, დიდწილად, სწორედ ამ მხარდაჭერის შედეგია. როგორც მინისტრმა აღნიშნა, ქვემო ქართლს ვაშლის, ატმის, ვაშლატამას, კაკლოვნების და სხვა პროდუქციის წარმოების დიდი პოტენციალი აქვს. ამ პოტენციალის გამოყენების მიზნით, სახელმწიფომ ქვემო ქართლის რეგიონში ახალი მრავალწლოვანი ბაღების გაშენება 4600 ჰექტარზე მეტ ფართობზე 30 მლნ ლარზე მეტით დააფინანსა. შედეგად, ქართული ვაშლი ადგილობრივი ბაზრის მოთხოვნის უმეტეს ნაწილს აკმაყოფილებს და ექსპორტზეც აქტიურად გადის. ბოლო ათი თვის განმავლობაში, საქართველოდან ექსპორტზე 18.0 ათასი ტონა ვაშლი გავიდა, რომლის ღირებულებამაც 11.3 მლნ აშშ დოლარი შეადგინა.შპს „Cadel Business“ გარემოს დაცვისა და სოფლის მეურნეობის სამინისტროს სოფლის განვითარების სააგენტოს ბენეფიციარია.სახელმწიფო პროგრამების ხელშეწყობით კომპანიამ რამდენიმე წლის წინ ვაშლის ბაღი 11,2 ჰექტარზე გააშენა, რისთვისაც 2 მლნ ლარის ინვესტიცია განახორციელა. ბაღის გაშენებისა და სასოფლო-სამეურნეო ტექნიკის შესაძენად შეღავათიანი აგროკრედიტის პროგრამის ფარგლებში აგრო სესხმა დაახლოებით ნახევარი მილიონი ლარი შეადგინა, ხოლო პროგრამით „დანერგე მომავალი“ მეწარმემ 100,000 ლარის თანადაფინანსება მიიღო.კომპანიამ „Cadel Business“ გასულ წელს ვაშლის მოსავალი ადგილობრივ ბაზარზე გაყიდა, ძირითადად, ქსელურ მაღაზიებში „ნიკორასა“ და „ორ ნაბიჯში“. ვაშლის ბაღებიდან წელს კომპანია 500 ტონა ვაშლის მოსავალს ელოდება.დავით სონღულაშვილმა, კომპანიის მსხლის თანამედროვე სტანდარტების ინტენსიური ბაღიც დაათვალიერა, სადაც მსხლის ევროპული ჯიშები – კაიზერი, კონფერენსი და ვილიამსია გაშენებული. მინისტრი კომპანიის ვენახშიც იმყოფებოდა. სასუფრე ყურძნის ჯიშის ვენახი სახელმწიფო პროგრამის ფარგლებში, 2020 წელს, 5 ჰექტარზე გაშენდა. სახელმწიფო თანადაფინანსებამ 27,700 ლარი შეადგინა.გარემოს დაცვისა და სოფლის მეურნეობის მინისტრ დავით სონღულაშვილთან ერთად მინისტრის მოადგილე ლაშა დოლიძე, ქვემო ქართლის მხარეში სახელმწიფო რწმუნებული ლევან ხარაბაძე და აგრარულ საკითხთა კომიტეტის თავმჯდომარე გელა სამხარაული იმყოფებოდნენ.

1747824521