როგორც სააგენტო Report-ი SOCAR-ზე დაყრდნობით იუწყება, აღნიშნული მაჩვენებელი შედის კომპანიის მონაცემებში, რომლებიც 2026 წლის მესამე კვარტალში ბურღვის, მოპოვების, გადამუშავებისა და ექსპორტის შესახებ ინფორმაციას მოიცავს.ეს მოცულობა 128 366 159 კუბური მეტრით — ანუ 16,9%-ით — ნაკლებია 2025 წლის ივლისიდან სექტემბრამდე პერიოდის მაჩვენებელთან შედარებით.შედარებისთვის, წინა წლის მესამე კვარტალში SOCAR-მა 760 098 800 კუბური მეტრი გაზი გადაამუშავა.

1793619363

როგორც სააგენტო Report-ი SOCAR-ზე დაყრდნობით იუწყება, აღნიშნული მაჩვენებლები ასახულია კომპანიის მონაცემებში, რომლებიც მიმდინარე წლის მესამე კვარტალში ბურღვის, მოპოვების, გადამუშავებისა და ექსპორტის შედეგებს მოიცავს.ინფორმაციის თანახმად, ეს მაჩვენებელი 184 629 ტონით (4,5%-ით) ნაკლებია იმ მოცულობაზე, რომელიც 2025 წლის ივლისი-სექტემბრის პერიოდში დაფიქსირდა.საანგარიშო კვარტალში ქვეყნიდან ბუნებრივი აირის ექსპორტმა 5 738 088 093 კუბური მეტრი შეადგინა, რაც წინა წლის ანალოგიურ პერიოდთან შედარებით 548 830 597 კუბური მეტრით (8,7%-ით) ნაკლებია.აღსანიშნავია, რომ 2025 წლის მესამე კვარტალში SOCAR-მა უცხოურ ბაზრებზე 4 101 377 ტონა ნავთობი და 6 286 918 690 კუბური მეტრი ბუნებრივი აირი გაიტანა.

1793618821

მისივე თქმით, “როდესაც მოქალაქეების მნიშვნელოვანი ნაწილისთვის მძიმე ტვირთად იქცა პროდუქტების, მედიკამენტებისა და კომუნალური მომსახურების ხარჯები, როდესაც პენსიონერების შემოსავლები ხშირად ელემენტარული საჭიროებების დასაკმაყოფილებლადაც არასაკმარისია, ბუნებრივად ჩნდება კითხვა, რატომ მიიჩნია სახელმწიფომ პრიორიტეტულად საგადასახადო შეღავათების დაწესება სწორედ აზარტული თამაშების ბიზნესისთვის”.კახა კახიშვილის პოსტს უცვლელად გთავაზობთ:„28 ოქტომბერს საქართველოს პარლამენტმა დაჩქარებული წესით მიიღო საკანონმდებლო ცვლილებები, რომლებიც საერთაშორისო აზარტული ტურნირებისთვის საგადასახადო და სხვა შეღავათებს ითვალისწინებს.ჩემი აზრით, ეს არასწორი გადაწყვეტილებაა. საქართველო მრავალსაუკუნოვანი ისტორიის, კულტურისა და ტრადიციების მქონე ქვეყანაა, რომელსაც ტურიზმის განვითარების უდიდესი შესაძლებლობები აქვს, მაგრამ ტურისტების მოზიდვა და დამატებითი შემოსავლების მიღება არ ნიშნავს, რომ სახელმწიფომ ნებისმიერი საქმიანობა უნდა წაახალისოს.მსოფლიოში არაერთი საქმიანობა არსებობს, რომელსაც შეუძლია ეკონომიკური შემოსავლის მოტანა, მაგრამ ამავე დროს საზოგადოების ისტორიულ, კულტურულ და ზნეობრივ ღირებულებებთან შეუთავსებელი აღმოჩნდეს. თუ მხოლოდ შემოსავლით ვიხელმძღვანელებთ, ხვალ შეიძლება სხვა ისეთი საქმიანობის წახალისებაც გამართლდეს, რომელიც გარკვეულ ქვეყნებში შეზღუდულია, მაგრამ ტურისტების მოზიდვის საშუალებად ჩაითვლება.ტურიზმის განვითარება ქვეყნის ეკონომიკურ წინსვლას უნდა ემსახურებოდეს და არა საზოგადოების ჯანმრთელობისა და ინტერესების შესაძლო დაზიანებას. განსაკუთრებით მაშინ, როდესაც საუბარია აზარტულ თამაშებზე, რომელთა მძიმე სოციალური შედეგები კარგად არის ცნობილი.ჯანდაცვის მსოფლიო ორგანიზაციის მონაცემებით, მსოფლიოში ზრდასრული მოსახლეობის დაახლოებით 1,2%-ს აზარტულ თამაშებთან დაკავშირებული აშლილობა აქვს. ამავე ორგანიზაციის შეფასებით, აზარტულ თამაშებში დაკარგული თანხების დაახლოებით 60% იმ ადამიანებზე მოდის, რომლებიც თამაშით გამოწვეულ ზიანს განიცდიან.ჯანდაცვის მსოფლიო ორგანიზაცია ასევე მიუთითებს, რომ აზარტულ თამაშებთან დაკავშირებული ზიანი მხოლოდ ფინანსური დანაკარგებით არ შემოიფარგლება. მას შეიძლება მოჰყვეს ფსიქიკური ჯანმრთელობის პრობლემები, ოჯახური ურთიერთობების გაუარესება, ვალები, ქონების დაკარგვა და მძიმე სოციალური შედეგები.ამ ყველაფერში ყველაზე მძიმე ის არის, რომ ადამიანების მცირე ჯგუფი ამ საქმიანობით მილიონებს გამოიმუშავებს, სხვებს კი შესაძლოა მთელი ცხოვრება დასჭირდეთ აზარტული თამაშების გამო დაგროვილი ვალების გასასტუმრებლად და ისიც საკითხავია, შეძლებენ თუ არა მათ ოდესმე სრულად დაფარვას. ამას ემატება დაკარგული ქონება, დანგრეული ოჯახები და ადამიანების გაუბედურებული ცხოვრება.სამწუხაროდ, იმ ადამიანებისა და ოჯახების რაოდენობა, რომლებიც აზარტული თამაშების მძიმე შედეგებს საკუთარ თავზე იწვნევენ, შესაძლოა გაცილებით მეტი აღმოჩნდეს, ვიდრე იმ მცირე ჯგუფის წარმომადგენლებისა, რომლებიც ამ ბიზნესით მილიონებს გამოიმუშავებენ.სწორედ ამიტომ სახელმწიფომ მხოლოდ ის კი არ უნდა დაითვალოს, რამდენ შემოსავალს მიიღებს ამ საქმიანობიდან, არამედ ისიც უნდა გაითვალისწინოს, რა სოციალური ფასი შეიძლება ჰქონდეს მის გადაწყვეტილებას.ამ გარემოებებზე გაამახვილა ყურადღება სახალხო დამცველმაც 27 ოქტომბრის განცხადებაში. მისი შეფასებით, კანონპროექტის განმარტებით ბარათში სათანადოდ არ იყო წარმოდგენილი საზოგადოებრივ ჯანმრთელობაზე შესაძლო ზემოქმედების, სოციალური ზიანისა და მისი პრევენციის ხარჯების ანალიზი. ასევე არ იყო უზრუნველყოფილი შესაბამისი სპეციალისტების სათანადო მონაწილეობა საკითხის განხილვაში.სახალხო დამცველმა პარლამენტს მოუწოდა, არ გაეგრძელებინა კანონპროექტის მიღება ასეთი ფორმით. მიუხედავად ამისა, ცვლილებები მეორე დღესვე მიიღეს.ახალი რეგულაციით, საერთაშორისო აზარტული ტურნირის მონაწილეთა არანაკლებ 80% უცხო ქვეყნის მოქალაქე უნდა იყოს. კანონით გათვალისწინებული პირობების შესრულების შემთხვევაში, 3 მილიონ ლარზე მეტი საპრიზო ფონდის მქონე ტურნირებისთვის დაწესებულია კონკრეტული საგადასახადო და მოსაკრებლის შეღავათები.კანონპროექტის განმარტებით ბარათში საუბარია ტურიზმის განვითარებაზე, უცხოელი მონაწილეების მოზიდვასა და ეკონომიკური აქტივობის ზრდაზე. მაგრამ რატომ უნდა გახდეს სწორედ აზარტული თამაშების ბიზნესი სახელმწიფოს მხრიდან დამატებითი შეღავათების მიმღები?კანონით გათვალისწინებული 80%-იანი მოთხოვნა არ ნიშნავს, რომ საქართველოს მოქალაქეები ამ ტურნირებში ვერ მიიღებენ მონაწილეობას.თუ ტურნირში 1000 ადამიანი მონაწილეობს, მათგან 200 შეიძლება საქართველოს მოქალაქე იყოს. თუ მონაწილეთა რაოდენობა 1200 იქნება, საქართველოს მოქალაქეთა რაოდენობამ შეიძლება 240-ს მიაღწიოს. შემდეგ ტურნირში შესაძლოა სხვა მოქალაქეები მონაწილეობდნენ, მომდევნოში კიდევ სხვები. თუ ასეთი ტურნირები რეგულარულად ჩატარდება, რამდენი ჩვენი მოქალაქე შეიძლება აღმოჩნდეს დროთა განმავლობაში ამ პროცესში ჩართული?ამასთან, კანონით განსხვავებული საგადასახადო რეჟიმი დაწესდა. თუ საერთაშორისო ტურნირის საპრიზო ფონდი 3 მილიონ ლარს აღემატება, უცხო ქვეყნის მოქალაქის მიერ მიღებული შესაბამისი დასაბეგრი შემოსავალი საშემოსავლო გადასახადისგან თავისუფლდება, ხოლო საქართველოს მოქალაქის მიერ მიღებული დასაბეგრი შემოსავალი 20%-ით იბეგრება.კანონპროექტის ერთ-ერთმა ინიციატორმა საქართველოს მოქალაქეებისთვის დაწესებულ შეზღუდვებზე ისაუბრა, მაგრამ თუ სახელმწიფოს მიზანია, ჩვენი მოქალაქეები ასეთი ტურნირებისგან დაიცვას, მაშინ რატომ უშვებს საერთოდ მათ მონაწილეობას?თუ ხელისუფლება განსხვავებულ საგადასახადო რეჟიმსაც მოქალაქეების მონაწილეობის შემაკავებელ საშუალებად განიხილავს, რამდენად რეალურია ასეთი მიდგომა? მართლა ფიქრობს ვინმე, რომ ადამიანი, რომელიც მრავალმილიონიანი საპრიზო ფონდის მქონე აზარტულ ტურნირში მონაწილეობას გადაწყვეტს, უარს მხოლოდ იმიტომ იტყვის, რომ შესაძლო მოგებიდან 20%-ის გადახდა მოუწევს?აზარტულ თამაშში მონაწილეობის გადაწყვეტილების მიღებისას ადამიანი, როგორც წესი, პირველ რიგში შესაძლო მოგებაზე ფიქრობს და არა იმაზე, რა ოდენობის გადასახადი დაეკისრება მოგების შემთხვევაში.გამოდის, რომ უცხოელ მონაწილეს საგადასახადო შეღავათს ვთავაზობთ, ხოლო საქართველოს მოქალაქეს იმავე ტურნირში ასეთი შეღავათი არ ეკუთვნის. რამდენად ეფექტიანია მოქალაქეების დაცვის ასეთი მექანიზმი?მაგრამ საკითხი მხოლოდ უშუალო მონაწილეებით არ შემოიფარგლება.საქართველოში აზარტული თამაშების რეკლამაზე კანონით შეზღუდვები მოქმედებს, მათ შორის სოციალურ ქსელებსა და ინტერნეტსივრცეშიც, მაგრამ ერთი რამ არის კანონით აკრძალვის დაწესება და სრულიად სხვაა მისი რეალურად აღსრულება.პირადად მე სოციალურ ქსელებში ხშირად მხვდება აზარტულ თამაშებთან დაკავშირებული სარეკლამო მასალა. ამიტომ ბუნებრივად მიჩნდება კითხვა: ვინ აკონტროლებს ამ სფეროს, რამდენად სისტემატურად ხდება ასეთი რეკლამის გამოვლენა და რა რეაგირება მოჰყვება დარღვევებს?განსაკუთრებით საყურადღებოა ის გარემოება, რომ საუბარია საერთაშორისო ტურნირებზე. მათი რეკლამა შეიძლება განთავსდეს არა საქართველოში, არამედ სხვა ქვეყნებიდან, უცხოური კომპანიებისა და საერთაშორისო ინტერნეტპლატფორმების მეშვეობით. ამავე დროს, ეს რეკლამა შეიძლება ხელმისაწვდომი იყოს საქართველოს მოქალაქეებისთვისაც, მათ შორის სოციალურ ქსელებში.ასეთ შემთხვევაში ვინ და როგორ უზრუნველყოფს საქართველოში მოქმედი სარეკლამო შეზღუდვების დაცვას? რა მექანიზმები ექნება სახელმწიფოს უცხოეთიდან გავრცელებულ რეკლამაზე რეაგირებისთვის და რამდენად ეფექტიანი იქნება ეს მექანიზმები?დღეს ახალგაზრდები და არასრულწლოვნები გაცილებით მეტ დროს ატარებენ სოციალურ ქსელებში, ვიდრე ტელევიზორის წინ. შესაბამისად, სწორედ ამ სივრცეში გავრცელებულმა ინფორმაციამ შეიძლება განსაკუთრებული გავლენა მოახდინოს მათ დამოკიდებულებაზე აზარტული თამაშების მიმართ.ამას თუ დავუმატებთ საერთაშორისო აზარტული ტურნირების გაშუქებას, გამარჯვებულების წარმატების ისტორიებსა და მრავალმილიონიანი საპრიზო ფონდების წარმოჩენას, ჩნდება კითხვა: როგორ აპირებს სახელმწიფო არასრულწლოვნებისა და ახალგაზრდების დაცვას აზარტული თამაშების პოპულარიზაციის შესაძლო გავლენისგან?არასრულწლოვნებს დღეს ასეთ თამაშებში მონაწილეობის უფლება არ აქვთ, თუმცა ეს არ ნიშნავს, რომ ისინი აზარტული თამაშების პოპულარიზაციის გავლენისგან დაცული არიან. როდესაც არასრულწლოვანი ხედავს მრავალმილიონიან საპრიზო ფონდებსა და გამარჯვებულების წარმატების ისტორიებს, შესაძლოა ჩამოუყალიბდეს წარმოდგენა, რომ აზარტული თამაშები გამდიდრების მიმზიდველი გზაა. მან შეიძლება უკვე დღეს იფიქროს, რომ როგორც კი კანონით დადგენილ ასაკს მიაღწევს, თავადაც მიიღებს მონაწილეობას მსგავს ტურნირში.ამიტომ მნიშვნელოვანია არა მხოლოდ ის, ვის აქვს დღეს თამაშის უფლება, არამედ ისიც, რა დამოკიდებულება ყალიბდება აზარტული თამაშების მიმართ მომავალ თაობაში. ვინ და რამდენად საფუძვლიანად შეაფასა ასეთი ტურნირების შესაძლო გრძელვადიანი გავლენა ახალგაზრდებზე, არასრულწლოვნებსა და მთლიანად საზოგადოებაზე?ცალკე საკითხია მრავალმილიონიანი საპრიზო ფონდების ფინანსური კონტროლი.საქართველოში მოქმედებს ფულის გათეთრებისა და ტერორიზმის დაფინანსების აღკვეთის კანონმდებლობა, რომლის მოთხოვნების შესრულებაც აზარტული თამაშების ორგანიზატორებს ევალებათ.მაგრამ როდესაც საუბარია მრავალმილიონიან საპრიზო ფონდებზე, უცხოელ მონაწილეებსა და საერთაშორისო ფინანსურ ოპერაციებზე, რამდენად ეფექტიანად იქნება შესაძლებელი თანხების წარმომავლობის, რეალური გამარჯვებულებისა და მოგების სახით გადარიცხული თანხების კონტროლი?არ შეიძლება გამოირიცხოს წინასწარ შეთანხმებული შედეგების, ფიქციური მოგებებისა და საეჭვო ფინანსური ოპერაციების მცდელობები. რა დამატებითი კონტროლის მექანიზმები იმოქმედებს ასეთი ტურნირების შემთხვევაში და რამდენად იქნება შესაძლებელი შესაძლო დარღვევების დროულად გამოვლენა?შევხედოთ სპორტის მაგალითს. ფეხბურთსა და სპორტის სხვა სახეობებში ათწლეულებია მოქმედებს საერთაშორისო ფედერაციები, დისციპლინური კომისიები, სპეციალური მონიტორინგის სისტემები და შეთანხმებული შედეგების წინააღმდეგ ბრძოლის მექანიზმები. მიუხედავად ამისა, დღემდე ვერ ხერხდება მატჩების შედეგებით მანიპულაციისა და უკანონო გარიგებების სრულად აღმოფხვრა.თუ ასეთი მრავალწლიანი გამოცდილებისა და კონტროლის მიუხედავად სპორტშიც არსებობს მანიპულაციების რისკი, რა საფუძველი გვაქვს ვიფიქროთ, რომ მრავალმილიონიან აზარტულ ტურნირებში მსგავსი საფრთხეები არ იარსებებს?ვინ გააკონტროლებს არა მხოლოდ მონაწილეთა ვინაობასა და ფორმალური მოთხოვნების შესრულებას, არამედ თავად თამაშის მიმდინარეობის კეთილსინდისიერებას, შესაძლო შეთანხმებულ შედეგებსა და საეჭვო ფინანსურ ოპერაციებს?არ ვამტკიცებ, რომ ასეთი დანაშაულები აუცილებლად მოხდება, მაგრამ სახელმწიფოს მხრიდან საგადასახადო შეღავათების დაწესებამდე მნიშვნელოვანია იმის დასაბუთება, რომ არსებული კონტროლის მექანიზმები ამ რისკებთან გასამკლავებლად საკმარისია.ამ ყველაფერს ემატება ქვეყანაში არსებული სოციალური მდგომარეობა.როდესაც მოქალაქეების მნიშვნელოვანი ნაწილისთვის მძიმე ტვირთად იქცა პროდუქტების, მედიკამენტებისა და კომუნალური მომსახურების ხარჯები, როდესაც პენსიონერების შემოსავლები ხშირად ელემენტარული საჭიროებების დასაკმაყოფილებლადაც არასაკმარისია, ბუნებრივად ჩნდება კითხვა, რატომ მიიჩნია სახელმწიფომ პრიორიტეტულად საგადასახადო შეღავათების დაწესება სწორედ აზარტული თამაშების ბიზნესისთვის.ეს კითხვა განსაკუთრებით აქტუალურია იმ ფონზე, როდესაც მოქალაქეებს უწევთ გაზრდილ ჯარიმებთან, სანქციებთან და სხვა ფინანსურ ვალდებულებებთან გამკლავება.წლების განმავლობაში არაერთხელ დამდგარა ომის ვეტერანებისთვის, პენსიონერებისთვის, შეზღუდული შესაძლებლობის მქონე პირებისთვის, მარტოხელა მშობლებისა და სოციალურად დაუცველი ოჯახებისთვის დამატებითი საგადასახადო შეღავათებისა და სხვა სახის ფინანსური მხარდაჭერის დაწესების საკითხი. მიუხედავად ამისა, ამ ადამიანების მნიშვნელოვანი ნაწილისთვის არსებული დახმარება კვლავ არასაკმარისია.რატომ ვერ მოიძებნა დღემდე საკმარისი შესაძლებლობა იმ ადამიანებისთვის დამატებითი შეღავათების დასაწესებლად, რომლებმაც საკუთარი ჯანმრთელობა ქვეყნის სამსახურში დაკარგეს, რომლებიც მთელი ცხოვრება შრომობდნენ და დღეს მინიმალური შემოსავლით ცხოვრობენ, ან რომლებიც მარტო ზრდიან შვილებს და ყოველდღიურად მძიმე ფინანსურ პრობლემებს ებრძვიან?რატომ აღმოჩნდა საერთაშორისო აზარტული ტურნირებისთვის ხელსაყრელი საგადასახადო პირობების შექმნა უფრო სწრაფად გადასაწყვეტი საკითხი, ვიდრე ამ ადამიანების მდგომარეობის გაუმჯობესება?ამ ყველაფერს ემატება საწვავისა და ენერგორესურსების გაძვირებით გამოწვეული პრობლემები. მსოფლიოში არსებული ვითარების ფონზე ზოგიერთმა სახელმწიფომ მოსახლეობის ფინანსური ტვირთის შესამსუბუქებლად საწვავზე აქციზის დროებითი შემცირების ან შეჩერების გადაწყვეტილება მიიღო.რატომ არ განიხილავს საქართველოს ხელისუფლება მსგავსი დროებითი შეღავათების დაწესებას, რათა საწვავის გაძვირებით გამოწვეული ფინანსური ტვირთი ნაწილობრივ მაინც შეუმსუბუქოს მოსახლეობას?საქართველოში საწვავის გაძვირება პირდაპირ აისახება ტრანსპორტირების, პროდუქტებისა და მომსახურების ფასებზე. ამავე დროს, მოქალაქეებს აწუხებთ გაზისა და სხვა კომუნალური მომსახურების ტარიფები, მზარდი ხარჯები, ჯარიმები და ფინანსური ვალდებულებები.რატომ არ განიხილება ასეთივე ოპერატიულობით მოსახლეობის ფინანსური მდგომარეობის შემსუბუქების შესაძლებლობები, როგორც საერთაშორისო აზარტული ტურნირებისთვის საგადასახადო შეღავათების დაწესება?ჩემი აზრით, სწორედ ასეთი გადაწყვეტილებებით ჩანს სახელმწიფოს პრიორიტეტები. როდესაც საქმე საერთაშორისო აზარტულ ტურნირებს ეხება, საგადასახადო შეღავათების დაწესება დაჩქარებული წესით ხდება, ხოლო როდესაც საუბარია მოქალაქეების ყოველდღიური ფინანსური ტვირთის შემსუბუქებაზე, მსგავსი გადაწყვეტილებები გაცილებით რთულად მიიღება.განა საქართველოს არ აქვს საკმარისი ისტორიული, კულტურული, ბუნებრივი და სხვა შესაძლებლობები იმისთვის, რომ ტურიზმის განვითარება სწორედ მათზე დავაფუძნოთ, ნაცვლად ისეთი საქმიანობის დამატებითი წახალისებისა, რომელიც მნიშვნელოვან სოციალურ რისკებთან არის დაკავშირებული?ამ საკითხების ფონზე განსაკუთრებით გაუგებარია, რატომ გახდა აუცილებელი კანონპროექტის დაჩქარებული წესით განხილვა. საზოგადოებისთვის ასეთი მნიშვნელოვანი საკითხი, რომელიც აზარტული თამაშების ბიზნესს, საგადასახადო პოლიტიკას, მოქალაქეების ჯანმრთელობასა და სოციალურ მდგომარეობას ეხება, გაცილებით ფართო განხილვას საჭიროებდა.განსაკუთრებით საინტერესოა პრემიერ-მინისტრ ირაკლი კობახიძის განცხადება, რომ კანონპროექტის შესახებ მისი ინიცირების შემდეგ შეიტყო და საკითხს ფართო განხილვისთვის საკმარისად მნიშვნელოვნად არ მიიჩნევდა.არ ვფიქრობ, რომ პრემიერ-მინისტრს არ ესმოდეს აზარტულ თამაშებთან დაკავშირებული სოციალური რისკების სიმძიმე. სწორედ ამიტომ მისი განცხადება ჩემთვის კითხვებს აჩენს.ისეთი შთაბეჭდილება მრჩება, თითქოს პრემიერი უკვე მიღებული გადაწყვეტილებისგან გამიჯვნას ცდილობს, რათა მომავალში მის შესაძლო უარყოფით შედეგებზე პოლიტიკური პასუხისმგებლობა არ დაეკისროს.გასათვალისწინებელია ისიც, რომ ის მხოლოდ პრემიერ-მინისტრი არ არის. ის მმართველი პარტიის, „ქართული ოცნების“ თავმჯდომარეცაა.როგორც პრემიერ-მინისტრს, მას მთავრობის საქმიანობის ხელმძღვანელობა და მინისტრების მუშაობის კოორდინაცია ევალება. როგორც მმართველი პარტიის თავმჯდომარეს კი განსაკუთრებული პოლიტიკური პასუხისმგებლობა აკისრია საპარლამენტო უმრავლესობის მიერ მხარდაჭერილ მნიშვნელოვან გადაწყვეტილებებზე.ამიტომ ჩემთვის ძნელად გასაგებია, როგორ შეიძლება სახელმწიფო ბიუჯეტთან, საგადასახადო პოლიტიკასთან, აზარტული თამაშების ბიზნესსა და საზოგადოებრივ ჯანმრთელობასთან დაკავშირებული ასეთი საკითხი მთავრობის შესაბამის უწყებებსა და საპარლამენტო უმრავლესობაში განიხილებოდეს ისე, რომ პრემიერ-მინისტრი სათანადოდ ინფორმირებული არ იყოს.თუ საკითხი მასთან შეთანხმებული იყო, მისი განცხადება დამატებით განმარტებას საჭიროებს, ხოლო თუ გადაწყვეტილება მართლაც მისი სათანადო ინფორმირებისა და მონაწილეობის გარეშე მომზადდა და მიიღეს, ეს მთავრობისა და საპარლამენტო უმრავლესობის მუშაობის კოორდინაციასთან დაკავშირებით კიდევ უფრო სერიოზულ კითხვებს აჩენს.ორივე შემთხვევაში პოლიტიკური პასუხისმგებლობის საკითხი დღის წესრიგში რჩება.ჩემი აზრით, ბოლო პერიოდში საზოგადოებისთვის მნიშვნელოვანი საკითხების დაჩქარებული წესით განხილვის პრაქტიკა სულ უფრო მეტ კითხვას აჩენს. კანონით ასეთი პროცედურის დაშვება თავისთავად არ ნიშნავს, რომ მისი გამოყენება ყველა შემთხვევაში მიზანშეწონილია.სახელმწიფოსა და საზოგადოების ურთიერთობა მხოლოდ უკვე მიღებული გადაწყვეტილებების განმარტებით არ უნდა შემოიფარგლებოდეს, განსაკუთრებით ისეთ საკითხებზე, რომლებიც მოქალაქეების ჯანმრთელობას, სოციალურ მდგომარეობასა და ფინანსურ უსაფრთხოებას ეხება.ვფიქრობ, რაც უფრო აქტიური იქნება მთავრობისა და საპარლამენტო უმრავლესობის ურთიერთობა საზოგადოებასთან და რაც უფრო მეტად გაითვალისწინებენ ადამიანების მოსაზრებებს გადაწყვეტილებების მიღებამდე, მით უკეთესი იქნება როგორც საზოგადოებისთვის, ისე თავად ხელისუფლებისთვის.კანონი უკვე მიღებულია, მაგრამ ეს არ ნიშნავს, რომ საკითხი დახურულია. ხელისუფლებამ საზოგადოებას უნდა განუმარტოს, რატომ გახდა აუცილებელი სწორედ საერთაშორისო აზარტული ტურნირებისთვის საგადასახადო შეღავათების დაწესება, რა ეკონომიკურ სარგებელს ელოდება ამ გადაწყვეტილებისგან და რა მექანიზმებით აპირებს მისი შესაძლო სოციალური და ფინანსური შედეგების კონტროლს.მიმაჩნია, რომ მიღებული გადაწყვეტილება გადახედვას საჭიროებს. ტურიზმის განვითარება აუცილებელია, მაგრამ არა ნებისმიერ ფასად. სახელმწიფოს ეკონომიკური პოლიტიკის წარმატება მხოლოდ მოზიდული ტურისტებისა და მიღებული შემოსავლების რაოდენობით არ უნდა იზომებოდეს. მისი მთავარი საზომი უნდა იყოს ის, რამდენად უმჯობესდება საკუთარი მოქალაქეების ცხოვრება.თუ სახელმწიფო მზად არის საგადასახადო შეღავათები დაუწესოს საერთაშორისო აზარტულ ტურნირებს, მაშინ საზოგადოებას სრული უფლება აქვს მოითხოვოს პასუხი, რატომ ვერ პოულობს ის ასეთივე შესაძლებლობებს იმ ადამიანების დასახმარებლად, რომლებსაც ეს მხარდაჭერა გაცილებით მეტად სჭირდებათ”, - წერს ყოფილი დეპუტატი კახა კახიშვილი.

1793612222

მთავრობის მეთაურის თქმით, აღნიშნულ საკითხზე სემეკთან კონსულტაციები მიმდინარეობს.„გაზის ტარიფთან დაკავშირებით გადაწყვეტილებას იღებს სემეკი და ჩვენ ყველა ვალდებულები ვართ, დაველოდოთ სემეკის გადაწყვეტილებას, ეს არ არის ჩვენი პრეროგატივა. ჩვენ კონსულტაციები გვაქვს სემეკთან, თუმცა, გადაწყვეტილებას იღებს სემეკი და აქედან გამომდინარე, უნდა დაველოდოთ სემეკის გადაწყვეტილებას. გადაწყვეტილებას იღებს სემეკი, კონსტიტუცია ადგენს ამას და სემეკის ნაცვლად მე არ მაქვს განცხადების გაკეთების უფლება“, - განაცხადა პრემიერმა. 

1793354021

„პარლამენტში ინიციირებული კანონპროექტის ერთი ნაწილი, უბრალოდ, მოქმედი ნორმის გაგრძელებაა. ეს ეხება სასმელი წყლის და წყალარინების ტარიფებს, რომელიც გულისხმობს, რომ კომისიას აქვს უფლება ჯვარედინი სუბსიდირება გამოიყენოს ტარიფის დადგენის დროს. მისი ვადა გრძელდება, რადგანაც არსებული ტარიფები წყალმომარაგების სექტორში უკვე დადგენილია იმ სახით, რომ ძირითადად, კომერციულ ტარიფზე არის ტვირთი გადატანილი. შესაბამისად, 2026 წლის დეკემბერში ამ ნორმას ვადა გასდის და ჩვენ, უბრალოდ, მას ვადას ვუგრძელებთ.მეორე ნაწილი რაც არის, ეს არის უკვე უშუალოდ, რომ მოხდეს სხვადასხვა ტიპის ტარიფის დადგენა, მოცულობის მოხმარებასთან დაკავშირებით.დღეს, როგორც ვიცი, უკვე უნდა დამტკიცდეს ეს კანონი და შევა ძალაში. ამის შემდეგ, რა თქმა უნდა, უკვე მოხდება, კანონიდან გამომდინარე, გარკვეული ცვლილებები ჩვენს ნორმატიულ აქტებში, კონკრეტულად, ტარიფების დადგენის მეთოდოლოგიაში და შემდეგ უკვე, ასე ვთქვათ, გამოისახება რა ტიპის სტრუქტურა იქნება ტარიფების მიმართ, როგორც ბუნებრივი გაზის სექტორში, ისე წყალმომარაგების სექტორში.თუ კანონი იქნა მიღებული, ამ კანონის საფუძველზე დაიწყება ადმინისტრაციული წარმოება ზუსტად იმ საფუძვლებით, რაც კანონის განმარტებით ბარათს ახლავს და უკვე ახალი მეთოდოლოგიით, ახალი სატარიფო სტრუქტურით დამტკიცდება ტარიფები ბუნებრივი აირისა და წყალმომარაგების სექტორებში.ახლა მიმდინარეობს აქტიური მუშაობა უშუალოდ ტარიფებთან დაკავშირებით, მიმდინარეობს როგორც მარეგულირებელი აუდიტი, ისე ტარიფის შემადგენელი ძირითადი კომპონენტების დათვლა და დეკემბრის ბოლოს, როგორც ყოველთვის, უკვე გვექნება ზუსტი სურათი, როგორი იქნება ტარიფები მომხმარებლებისთვის.ზოგადად, არსებობს ძალიან ბევრი ტიპის ტარიფი, რომ ავიღოთ მსოფლიო პრაქტიკა, მაგალითისთვის გეტყვით, არსებობს დღეღამური ტარიფი, რაც აპრობირებულია დასავლეთში, არსებობს ფიქსირებული ტარიფები, ასევე, მოხმარების მიუხედავად როცა იხდი გარკვეულ თანხას, იგივე ინფრასტრუქტურის მზადყოფნის ტარიფი და ა.შ.ჩვენ დღეს საქართველოში რაც გვაქვს, ეს არის ერთადერთი - საფუხერებრივი ტარიფი, რაც არის ელექტროენერგეტიკაში. მოგეხსენებათ, სამი საფეხურია, რომელიც ყოველთვე ანგარიშდება. ეს იმას ნიშნავს, რომ ყოველი მომდევნო თვიდან ვიწყებთ ახალ ათვლას.რაც შეეხება ბუნებრივი აირის და წყალმომარაგების ტარიფებს, ჩვენ მეთოდოლოგიის დამტკიცების შემდეგ, გვეცოდინება უკვე იმიტომ, რომ არსებობს რამდენიმე სცენარი, რომლებითაც შეიძლება განვითარდეს მოვლენები, ჩვენი ამოსავალი წერტილი ეს არის სოციალური საკითხების გათვალისწინება, მოწყვლადი მომხმარებლების ინტერესების გათვალისწინება, ასევე, ძალიან მნიშვნელოვანია, რომ შემოვიღოთ ისეთი მექანიზმები, რომლებიც ხელს შეუწყობს ენერგოეფექტურობას ანუ ენერგიის დაზოგვის საშუალებას.მეთოდოლოგიაში გვაქვს რამდენიმე სცენარი გათვალისწინებული და რომელსაც დავამტკიცებთ, რა თქმა უნდა, მოსახლეობას გავაცნობთ“, - აღნიშნა გიორგი ფანგანმა.

1793192357

„კანონპროექტი რომელიც ინიცირებულია პარლამენტში დავიწყებ იქედან რომ მისი ერთი ნაწილი არის უბრალოდ მოქმედი ნორმის გაგრძელება ეს ეხება სასმელი წყლის და წყალარინების ტარიფებს რომელიც გულისხმობს რომ კომისიას აქვს უფლება ჯვარედინი სუბსიდირება გამოიყენოს ტარიფის დადგენის დროს იმისი ვადა გრძელდება რადგანაც არსებული ტარიფები წყალმომარაგების სექტორში უკვე დადგენილია იმ სახით რომ ძირითადად კომერციულ ტარიფზე არის ტვირთი გადატანილი. შესაბამისად 2026 წლის დეკემბერში ამ ნორმას ვადა გასდის და ვადა უგრძელდება ამ ნორმას. მეორე ნაწილი რაც არის ეს არის უკვე უშუალოდ იმის უფლებამოსილება კომისიის დელეგირება რომ მოხდეს სხვადასხვა ტიპის ტარიფების დადგენა მოცულობის მოხმარებასთან დაკავშირებით.დღეს როგორც ვიცი უკვე უნდა დამტკიცდეს ეს კანონი და შევა ძალაში ამის შემდეგ რა თქმა უნდა უკვე მოხდება კანონიდან გამომდინარე გარკვეული ცვლილებები ჩვენს ნორმატიულ აქტებში კონკრეტულად ტარიფების დადგენის მეთოდოლოგიაში და და შემდეგ უკვე გამოისახება რა ტიპის სტრუქტურა იქნება ტარიფების მიმართ როგორც ბუნებრივი გაზის სექტორში, ასევე წყალმომარაგების სექტორში.თუ კანონი იქნა მიღებული, არ მაქვს ინფორმაცია არის თუ არა დამტკიცებული კანონი რა თქმა უნდა ამ კანონის საფუძველზე დაიწყება ადმინისტრაციული წარმოება ზუსტად იმ საფუძვლებით რაც მათ შორის კანონის განმარტებით ბარათს ახლავს და უკვე ახალი მეთოდოლოგიით, ახალი სატარიფო სტრუქტურით დამტკიცდება ტარიფები ბუნებრივი გაზისა და წყალმომარაგების სექტორებში, რადგანაც მათ ტარიფებს ვადა გასდით ზუსტად მიმდინარე წლის დეკემბერში.ახლა მიდის აქტიური მუშაობა უშუალოდ ტარიფებთან დაკავშირებით მიდის როგორც მარგველებელი აუდიტი, ასევე სხვა ტარიფის ძირითადი შემადგენელი კომპონენტების დათვლა და დეკემბრის ბოლოს როგორც ყოველთვის უკვე გვექნება ზუსტი სურათი იმასთან დაკავშირებით თუ როგორი იქნება ტარიფები მომხმარებლებისთვის.გაზის შემთხვევაში იყო ტარიფები დადგენილი რამოდენიმე ტიპის ხოლო ჩვენს შემთხვევაში ახლა რაზც ვსაუბრობთ ვადა გასდის 2026 წელს.საერთოდ არსებობს ძალიან ბევრი ტიპის ტარიფი რომ ავიღოთ მსოფლიო პრაქტიკა მაგალითისთვის გეტყვით დღე-ღამური ტარიფი არსებობს ძალიან აპრობირებული არის იგივე დასავლეთში, არსებობს ფიქსირებული ტარიფები, არის მომხმარების მიუხედავად იხდი გარკვეულ თანხას ამას უწოდებენ ინფრასტრუქტურის მზადყოფნის ტარიფს და ასე შემდეგ. ჩვენ დღეს საქართველოში რაც გვაქვს, გვაქვს ერთადერთი საფეხურებრივი ტარიფი ეს არის ელექტროენერგეტიკაში მოგეხსენებათ რომ სამი საფეხურია რომელიც ყოველთვე ანგარიშდება. ეს იმას ნიშნავს რომ ყოველი მომდევნო თვიდან იწყებთ ახალ ათვლას.რაც შეეხება ბუნებრივი გაზის და წყალმომარაგების ტარიფებს ჩვენ მეთოდოლოგიის დამტკიცების შემდეგ გვეცოდინება უკვე იმიტომ რომ არსებობს რამოდენიმე სცენარი რომლითაც შეიძლება განვითარდეს მოვლენები რა თქმა უნდა ჩვენი ამოსავალი წერტილი ეს არის სოციალური საკითხების გათვალისწინება მოწყვლადი მომხმარებლების ინტერესების გათვალისწინება, ასევე ეს არის ძალიან მნიშვნელოვანი რომ შემოვიღოთ ისეთი მექანიზმები, რომელიც ხელს შეუწყობს ენერგოეფექტურობას, ენერგიის დაზოგვის საშუალებას.ერთ ციფრს მოგიყვანთ უბრალოდ საქართველოში საშუალოდ დღეს მოხმარება ერთ მომხმარებელზე გვაქვს 192 კუბური მეტრი როდესაც ევროპაში, დასავლეთ ევროპაში არის 140 კუბური მეტრი ანუ ამას საქართველოში უყაირათო მომხმარება ჰქვია. აი ბევრი მომენტი არის. ეხლა ამ ეტაპზე ძალიან რთულია რამეზე საუბარი, რადგანაც ჯერ კიდევ არ არის მეთოდოლოგია, ვერც იქნებოდა სანამ კანონი არ იქნება მიღებული. მეთოდოლოგიაში უკვე გვაქვს რამოდენიმე სცენარი მოაზრებული და რომელსაც დავამტკიცებთ რა თქმა უნდა პირველ რიგში საზოგადოებას გავაცნობთ“, - აცხადებს გიორგი ფანგანი.

1793190126

მისი თქმით, აუცილებელია რეგულაციის პროცესი შეეხოს გაზის იმპორტის საკითხსაც.“გაზის იმპორტის სქემების დამუშავებისას, ელექტროენერგიის იმპორტისგან განსხვავებით, არის შესაძლებლობა, რომ გამარტივებულმა სქემამ ტარიფზეც პირდაპირი ასახვა ჰპოვოს. ეს, დღევანდელ საკმაოდ გაძვირებულ ენერგეტიკულ ცხოვრებაში, ძალიან მნიშვნელოვანი იქნება, როგორც მოსახლეობისთვის, ისე ბიზნესსექტორისთვის. მით უფრო იმის გათვალისწინებით, რომ მიმდინარე ეტაპზეც, მარეგულირებლის მიერ დაანონსებულია ბუნებრივი აირის ტარიფის გადახედვა მისი კიდევ უფრო გაძვირების მიმართულებით”, - აღნიშნავს ჭიჭინაძე.ენერგეტიკოსი იმ ორ მნიშვნელოვან, თავის დროზე მიღებულ, დანაშაულის ტოლფას გადაწყვეტილებაზეც საუბრობს, რამაც გაზის იმპორტის საკითხში კორუფციული გარიგებების დაშვების ალბათობა კრიტიკულად გაზარდა.“პირველი, რბილად რომ ითქვას, შეცდომა (შეგნებული) 2007 წელს იქნა დაშვებული, როცა ენერგეტიკის მაშინდელი მინისტრის, ალექსანდრე ხეთაგურის გადაწყვეტილებით (შორს ვარ იმ აზრისგან, რომ ეს მისი პირადი ინიციატივა და გადაწყვეტილება იყო, მაგრამ ხელისმოწერის სიმძიმე სწორედ მასზეა), “ბუნებრივი გაზის ბაზარზე კონკურენციის გაზრდის მოტივით” შეწყდა გაზის ფასის რეგულირება მარეგულირებლის მიერ და საბითუმო და საცალო ტარიფი (გარდა საყოფაცხოვრებო მომხმარებლის რეგულირებადი ნაწილისა და თბოელექტროსადგურებისა) მომხმარებელს მომწოდებლის მიერ შეთავაზებული ტარიფით. ამან, ქართულ წარმოებას, კონკურენტული პროდუქციის შექმნის შანსი ერთი-ათად შეუმცირა.მეორე, ასევე რბილად ნათქვამი იქნება, - შეცდომა (შეგნებული) არის ის, რომ 2017 წლიდან საქართველო რუსეთიდან სომხეთისთვის მიწოდებული გაზის გატარების საფასურს, ნაცვლად ნატურისა, იღებს ფულადი გამოსახულებით, რაც ჯამში მინიმუმ 2/3 -ით გვაზარალებს. ფულად გამოხატულებაში კი ეს ამბავი შემდეგნაირად გამოიყურება: თუ ტრანზიტის საფასურად, წლიურად უნდა მიგვეღო 40 მილიონი დოლარის ბუნებრივი აირი, ამ გადაწყვეტილების შემდეგ ვიღებთ საშუალოდ 12,4 მილიონ აშშ დოლარს. ამ გადაწყვეტილებაში ეკონომიკური ლოგიკა, არ მგონია, ვინმემ იპოვოს. თუ სხვა რამ დევს ამ გადაწყვეტილების მიღმა, საზოგადოება იმსახურებს ამ მიზეზების შესახებ ამომწურავ ინფორმაციას. და თუ ასეთ ინფორმაციას ქართული ენერგეტიკის მესვეურები არ გასცემენ, ეს მხოლოდ კითხვებს ამძაფრებს კორუფციული დაშვებების თაობაზე”, - ხაზს უსვამს თემურ ჭიჭინაძე.“ბუნებრივი გაზის იმპორტის საკითხს რომ დავუბრუნდეთ, ფაქტია, მოქმედი სქემა გადატვირთულია რამდენიმე სრულიად ზედმეტი შუამავალი კომპანიით.იხილეთ, თავის დროზე, ალექსანდრე ხეთაგურის მიერ შემუშავებული სქემა და თავად განსაჯეთ - კომპანიები, რომლებიც მხოლოდ დამატებით ბიუროკრატიულ ბარიერებს ქმნიან და ფინანსურად ზრდიან წნეხს ტარიფზე. კერძოდ, “სოკარ ჯორჯია გაზი”, “გაზექსპორტი” და “სოკარგაზ ექსპორტ-იმპორტი” ზედმეტი რგოლებია არსებულ სქემაში.ჩვენი ხედვით შემუშავებულ სქემაში კი გაზრდილია საქართველოს ნავთობისა და გაზის კორპორაციის როლი. სწორედ მან უნდა მიიღოს სრულად, შემოსული აირი და შემდგომ მანვე უნდა გაანაწილოს იგი გაზის გამანაწილებელ კომპანიებზე, პირდაპირ მომხმარებლებზე და სხვა ტიპის მომხმარებლებზე.ამ შემთხვევაში, სქემა დაიწმინდება და შემდეგ სახეს მიიღებს:ეს იქნება საკითხის მართებული გადაწყვეტა და ეს კეთილმყოფელად იმოქმედებს, როგორც კორუფციული რისკების შემცირების თვალსაზრისით, ისე მათ შორის, ბუნებრივი აირის ტარიფის შემცირების შესაძლებლობაზეც.“კიდევ სხვა საკითხია ის, რომ - ბუნებრივი აირის მომხმარებლები არაფრით არიან დაცული ისეთი შემთხვევებისგან, როცა მოწოდებული პროდუქტი არ შეესაბამება სტანდარტებს, ანუ არ არის შესაბამისად კალორიული. ამ დროს, გამოდის რომ მომხმარებლის  მიერ გადახდილი აირის საფასურში გარკვეული, (არცთუ მცირე) წილი, უბრალოდ ჰაერის ფასია, რომელიც აირს მოჰყვება, ანუ მომხმარებელი ტყუვდება და იხდის ზედმეტს - განმკითხავი არავინაა.ამ საკითხის დარეგულირებაც შესაძლებლად მიმაჩნია, თუკი იქნება კეთილი ნება და ბუნებრივი აირის მიმწოდებელი ვალდებული იქნება თითოეულ მომხმარებელთან გააფორმოს ხელშეკრულება, სადაც კონკრეტულად იქნება გაწერილი უხარისხო პროდუქტის მიწოდების დაფიქსირების შემთხვევაში მიმწოდებლის ვალდებულება”, - აღნიშნავს თემურ ჭიჭინაძე.“აუცილებლად უნდა მოხდეს მოწოდებული ბუნებრივი აირის რეგულაცია, რაც ავტომატურად ამოაგდებს საშუამავლო რგოლებს. ასევე, სავსებით შესაძლებლად მიმაჩნია, სომხეთისკენ მიმართული რუსული აირის ტრანზიტის საფასურის კვლავ ნატურით მიღებული საკითხის დასმაც და ბუნებრივი აირის აზერბაიჯანიდან იმპორტის სქემიდან სრულიად ზედმეტი შუამავალი კომპანიების ჩახსნაც. მოვუწოდებ მთავრობას, ამ მიმართულებებით კიდევ უფრო თამამი და თანმიმდევრული ისეთი ნაბიჯები გადადგას, რაც საქართველოს სახელმწიფოს და საქართველოს თითოეული მოქალაქის ინტერესებშია”, - დასძენს ენერგეტიკოსი. 

1793178394

ელექტროსადგურზე დამონტაჟდა Goldwind-ის ექვსი GWH182-7.2MW მოდელის ტურბინა, რომელთაგან თითოეულის სიმძლავრე 7.2 მგვტ-ია. ტურბინების მონტაჟი კომპანია GOLDWIND INTERNATIONAL GEORGIA - მ განახორციელა. აღსანიშნავია, რომ ბრეთის ქარის ელექტროსადგური საქართველოში ყველაზე მასშტაბური ქარის ელექტროსადგურია, რომელიც სრულად ადგილობრივი კომერციული ბანკის დაფინანსებით განხორციელდა.პროექტი საქართველოს ბანკის ფინანსური მხარდაჭერით ხორციელდება.„მოხარული ვართ, რომ საქართველოში კიდევ ერთი თანამედროვე განახლებადი ენერგიის პროექტი განხორციელდა, რომელიც სულ მალე ჩაერთვება ქვეყნის ერთიან ენერგოსისტემაში. მადლობას ვუხდით ყველა ჩართულ მხარეს, განსაკუთრებით კი კომპანია Goldwind-ს და საქართველოს ბანკს გაწეული მხარდაჭერისა და პროექტის წარმატებით განხორციელებაში შეტანილი მნიშვნელოვანი წვლილისთვის“, - აცხადებს ზაქარია ავალიანი, ვენტო ენერჯის დირექტორი.„ბრეთის ქარის ელექტროსადგურის პროექტი კიდევ ერთი მნიშვნელოვანი ნაბიჯია საქართველოში განახლებადი ენერგიის განვითარების მიმართულებით და ასახავს Goldwind-ის გრძელვადიან ხედვას საქართველოს ენერგეტიკული ტრანსფორმაციის პროცესში. ქართულ ბაზარზე 2024 წელს შემოსვლის შემდეგ, ჩვენ უკვე გავაფორმეთ ცხრა ქარის ელექტროსადგურის პროექტზე შეთანხმება, რომელთა ჯამური სიმძლავრე 438 მგვტ-ს შეადგენს. მომავალშიც გავაგრძელებთ საქართველოში ქარის ენერგიის პროექტების განხორციელებაში მონაწილეობას, რათა ჩვენი ტექნოლოგიური გამოცდილებით ხელი შევუწყოთ ქვეყნის ენერგოდამოუკიდებლობასა და მდგრად განვითარებას. მინდა მადლობა გადავუხადო ვენტო ენერჯის, საქართველოს ბანკსა და ყველა პარტნიორს ნდობისა და თანამშრომლობისთვის“, - აცხადებს პიტერ გუო, Goldwind Georgia-ს ბიზნესის განვითარების დირექტორი.„ქარის ენერგიის განვითარება საქართველოს ენერგეტიკული დამოუკიდებლობის მისაღწევად ერთ-ერთი გადამწყვეტი მიმართულებაა. ქარის ენერგიის გენერაცია ავსებს ზამთრის ენერგოდეფიციტს და ამცირებს იმპორტზე დამოკიდებულებას. საქართველოს ბანკისთვის აღნიშნული მიმართულება სტრატეგიული მნიშვნელობის მქონეა. შესაბამისად, ბრეთის ქარის ელექტროსადგურის პროექტის დაფინანსებით ხელს ვუწყობთ საქართველოში ქარის ენერგიის განვითარებასა და ქვეყნის ენერგოდამოუკიდებლის განმტკიცებას“, - აცხადებს ბონდო ტაბატაძე, საქართველოს ბანკის კორპორაციული გაყიდვების სექტორის უფროსი.

1793103404

ბერეკაშვილმა დღეს განაცხადა ისიც, რომ მთავარი აქცენტი სოციალურ კომპონენტზე უნდა გაკეთდეს. მისი თქმით, განსაკუთრებული მიდგომა იქნება ის, რომ სოციალური კომპონენტი, რომელიც უაღრესად მნიშვნელოვანია, შენარჩუნდეს.“კანონპროექტი მოქმედების არეალსა და საკანონმდებლო ჩარჩოს განსაზღვრავს. აქცენტი მოხმარების მოცულობაზე კეთდება, რაც კომისიას სატარიფო პოლიტიკის განსაზღვრის შესაძლებლობას აძლევს. ტარიფს და საბოლოო ფასს სემეკი განსაზღვრავს. დღეს საქართველოში ფიზიკური პირებისთვის გაზის სამომხმარებლო ტარიფი საშუალოდ 55-56 თეთრს შეადგენს. აღნიშნული ტარიფი 7.5-8-ჯერ უფრო დაბალია, ვიდრე საშუალოდ ევროკავშირში. იმის მიუხედავად, რომ ჩვენ ბუნებრივი გაზი არ გაგვაჩნია, საქართველოს მთავრობის წარმატებული მოლაპარაკებების შედეგად, დღეის მდგომარეობით, უაღრესად დაბალი ტარიფი გვაქვს“, - განაცხადა შოთა ბერეკაშვილმა.პარლამენტი დაჩქარებული წესით განიხილა და პირველი მოსმენით მიიღო პროექტი, რომლის მიხედვით, სემეკი უფლებამოსილი იქნება 2036 წლის 1-ელ იანვრამდე - წყალმომარაგების, ხოლო 2038 წლის 1-ელ იანვრამდე ბუნებრივი გაზის შემთხვევაში, ტარიფის დადგენის დროს, საყოფაცხოვრებო მომხმარებლების მიერ მოხმარებულ მოცულობის მიხედვით განსხვავებული მომსახურების ღირებულება დაადგინოს.ინიციატორთა განმარტებით, კანონპროექტი ხელს შეუწყობს საყოფაცხოვრებო მომხმარებელთა სოციალური ინტერესების დაცვასა და კომუნალური მომსახურების ხელმისაწვდომობის შენარჩუნებას.“დღეის მდგომარეობით, საყოფაცხოვრებო მომხმარებლებისათვის დგინდება ბუნებრივი გაზის მოხმარების ტარიფები განაწილების ლიცენზიანტების ოპერირების არეალების მიხედვით და თითოეული მოხმარებული კუბური მეტრი ბუნებრივი გაზის მოხმარების ტარიფი არ იცვლება მოხმარებული ბუნებრივი გაზის რაოდენობის მიხედვით.აღნიშნული ცვლილების აუცილებლობა განპირობებულია საყოფაცხოვრებო მომხმარებლების, მათ შორის მოწყვლადი ჯგუფების სოციალური ინტერესების დაცვის და საბაზისო მომსახურებასა და პროდუქტზე ხელმისაწვდომობის შენარჩუნების საჭიროებით. კანონპროექტით გათვალისწინებული ცვლილება არ ცვლის სატარიფო რეგულირების ძირითად პრინციპებს და წარმოადგენს მხოლოდ გარდამავალ პერიოდში მოქმედ მექანიზმს, რომელიც მიზნად ისახავს სოციალური რისკების შემცირებასა და მომხმარებელთა კატეგორიებს შორის ტარიფების ცვლილების ეტაპობრივ განხორციელებას.მოსახლეობის მსყიდველუნარიანობის, კომუნალური ხარჯებისადმი მაღალი მგრძნობელობისა და სატარიფო რეგულირების პერიოდების გათვალისწინებით, მიზანშეწონილია კომისიას შეუნარჩუნდეს უფლებამოსილება წყალმომარაგებისა და წყალარინების მომსახურებების ღირებულება სხვადასხვა კატეგორიის მომხმარებლებზე გადაანაწილოს განსხვავებული პროპორციით, ასევე, 2036 წლის 1 იანვრამდე წყალმომარაგების, ხოლო 2038 წლის 1 იანვრამდე – ბუნებრივი გაზის შემთხვევაში საყოფაცხოვრებო მომხმარებლების მიერ მოხმარებული მოცულობის გათვალისწინებით დაადგინოს განსხვავებული ტარიფები“, - ვკითხულობთ კანონის პროექტზე თანდართულ განმარტებით ბარათში.

1793103100

„გაცნობებთ, რომ შპს „საქართველოს გაზის ტრანსპორტირების კომპანია“ ზუგდიდის გაზგამანაწილებელ სადგურში სარემონტო-სარეაბილიტაციო სამუშაოებს განახორციელებს.აღნიშნულის გათვალისწინებით, 28 ოქტომბერს 07:00 საათიდან 21:00 საათამდე ბუნებრივი გაზის მიწოდება შეუწყდებათ ზუგდიდის მუნიციპალიტეტის შემდეგ დასახლებებს: ქალაქი ზუგდიდი, ახალაბასთუმანი, ახალსოფელი, ბაში, ზედაეწერი, ინგირი, კორცხელი, კოლხიდა, ნაცატუ, ნაწულუკუ, ოდიში, ოირემე, ოფაჩხაფუ, რიყე, რუხი, უჩაშონა, ტყაია, ურთა, აბასთუმანი, შამადელა, შამგონა, ჩხორია, ჩხოუში, ცაიში, ცაცხვი, ძველი აბასთუმანი, ძველი ხიბულა, ჭაქვინჯი, ჭითაწყარი, ჭკადუაში, ხეცერა, ჯუმი.საქართველოს გაზის ტრანსპორტირების კომპანია უზრუნველყოფს სამუშაოების ოპერატიულ შესრულებას გაზის მიწოდების უმოკლეს დროში აღსადგენად“, - ნათქვამია განცხადებაში.

1793009969