მეღვინეობის დარგში შემოღებული ყველა რეგულაცია ემსახურება ხარისხის გაუმჯობესებას. რეფორმა აზღვევს როგორც ინვესტორს, ისე მომხმარებელს, იმ ობიექტური პირობების გათვალიწინებით, როდესაც საერთაშორისო ბაზრებზე იკლო ღვინის მოხმარებამ და გაზდრილია კონკურენცია, – განაცხადა ღვინის ეროვნული სააგენტოს თავმჯდომარემ, ლევან მეხუზლამ.
„ვაზისა და ღვინის შესახებ კანონში“ შესული ცვლილებებით, 2026 წლის პირველი მაისიდან სამეწარმეო ვენახის გაშენება შესაძლებელი იქნება მხოლოდ ღვინის ეროვნული სააგენტოს თანხმობის საფუძველზე.
ლევან მეხუზლას განცხადებით, შეთანხმების მიღება მარტივია და ეხება მხოლოდ იმ მევენახეს, რომელიც გეგმავს, ვენახი გააშენოს მიმდინარე წლის პირველი მაისის შემდგომ პერიოდში.
„შეთანხმების მისაღებად საჭიროა ნიადაგის ლაბორატორიული ანალიზები. საქართველოში არსებობს ლაბორატორიები, რომლებიც ნიადაგის ანალიზებს ძალიან წარმატებით და ეფექტიანად აკეთებენ და არიან აკრედიტებული ამ სფეროში. ერთ-ერთი მოთხოვნაა, რომ ნიადაგის წყლის დგომა არ იყოს ერთ მეტრზე ნაკლები, რაც არის სრულიად სამართლიანი, რადგან წყლიან ნიადაგზე გაშენებული ვენახი იძლევა უხარისხო ყურძენს. შეთანხმების მისაღებად განაცხადის წარმოსადგენ დროს ასევე აუცილებელია ნაკვეთის ფლობის დამდასტურებელი დოკუმენტაცია“, – აღნიშნა ლევან მეხუზლამ.
მისი თქმით, ვენახის გაშენების მსურველებს არ ექნებათ ვაზის ნერგების შერჩევის პრობლემა.
„კანონით აკრძალულია მხოლოდ ჰიბრიდული ჯიშების გაშენება და სხვა ჯიშებზე არ იქნება შეზღუდვა. ჩვენ რთველის განმავლობაში ურთიერთობა გვაქვს 20 000-მდე მევენახესთან და პრაქტიკაში გვხდება შეცდომები, როდესაც ვენახი გაშენებული ჭალაში, ან ზღვის დონიდან მაღალ სიმაღლეზე, რაც ემსახურება რაოდენობის ზრდას და არა ხარისხის გაუმჯობესებას. ჩვენი მიზანია, ქართული ღვინის ხარისხის გაუმჯობესება და ქართული ღვინის პოზიციონერების გაუმჯობესება გლობალურ ბაზარზე“, – აღნიშნა ღვინის ეროვნული სააგენტოს თავმჯდომარემ.
მისი თქმით, სააგენტო უფლებამოსილია, სამეწარმეო ვენახის გაშენების თაობაზე არ გასცეს თანხმობა, თუ განმცხადებელი ვერ წარადგენს სამეწარმეო ვენახის გაშენების წესით განსაზღვრულ სრულ დოკუმენტაციას ან წარმოდგენილი დოკუმენტები არ შეესაბამება ამ წესის დადგენილ მოთხოვნებს.
