საქართველოს ბანკის მხარდაჭერით, LEAF-ის განათლების საერთაშორისო გამოფენა 10-11 ოქტომბერს თბილისში და ბათუმში გაიმართება

"თიბისი კაპიტალის მოლოდინების შესაბამისად, რეინვესტირებული შემოსავლების გამორიცხვით,მიმდინარე ანგარიშის სეზონურად შესწორებულმა ბალანსმა 2026 წლის მეორე კვარტალში მშპ-ის 0.4% შეადგინა და, უკვე ზედიზედ მეხუთე კვარტალია, პროფიციტში ნარჩუნდება. მკითხველს შევახსენებთ, რომ, პრაქტიკული თვალსაზრისით, მიმდინარე ანგარიშის პროფიციტი ნიშნავს, რომ საქართველო დანარჩენი მსოფლიოს მიმართ წმინდა კრედიტორი იყო, ანუ უცხოურ ვალუტაში რეზიდენტების ჯამური შემოსავლები ხარჯებს აღემატებოდა. 2025 წლამდე მიმდინარე ანგარიშის სეზონურად შესწორებული პროფიციტი მხოლოდ ერთხელ, 2022 წლის მესამე კვარტალში ფიქსირდებოდა, რუსეთ-უკრაინის ომის დაწყებიდან მალევე.ამავდროულად, სახეზეა გარკვეული შენელებაც - მეორე კვარტალის პროფიციტი მხოლოდ მცირედით აღემატება პირველი კვარტლის იმავე მაჩვენებელს (მშპ-ის 0.1%), ხოლო გასული წლის ანალოგიურ პერიოდთან შედარებით თითქმის უცვლელია. ეს პირდაპირი უცხოელი ინვესტორებისთვის გადახდილი დივიდენდების წლიურ ჭრილში ფაქტობრივად გაორმაგებას უკავშირდება, რამაც სხვა წყაროებით გაზრდილი შემოდინებები გადაფარა. ჯამურად, რეინვესტიციებისა და სეზონური ფაქტორების გამორიცხვით, მიმდინარე ანგარიშის ბალანსმა მიმდინარე წლის პირველ ნახევარში მშპ-ის 0.2% შეადგინა, რაც 2025 წლის მეორე ნახევარში დაფიქსირებულ 1.3%-იან მაჩვენებელს შესამჩნევად ჩამორჩება.თანხობრივად, იანვარ-ივნისში, წინა წლის ანალოგიურ პერიოდთან შედარებით, მიმდინარე ანგარიშის ბალანსი 158 მილიონი აშშ დოლარით გაუმჯობესდა. აღნიშნულში მთავარი წვლილი ინფორმაციისა და კომუნიკაციის ტექნოლოგიების (ICT) მომსახურების ექსპორტმა, ფულადმა გზავნილებმა და საქონლით ვაჭრობის შემცირებულმა დეფიციტმა შეიტანა. საპირისპირო მხარეს, გაიზარდა დივიდენდების გადახდა და შემცირდა ტრანსპორტირებისა და ტურიზმის წმინდა ექსპორტიდან მიღებული შემოსავლები. უფრო დეტალურად, წლის პირველ ნახევარში ICT მომსახურების წმინდა ექსპორტი წლიურად 73%-ით გაიზარდა და ეკონომიკურ ზრდაში მთავარი კომპონენტისპოზიციაც შეინარჩუნა, თუმცა 2025 წლის მეოთხე კვარტალიდან, დაახლოებით, ერთ დონეზე ნარჩუნდება. წლიურად 11%-ით გაიზარდა ფულადი გზავნილები, რაშიც უდიდესი წვლილი ევროკავშირიდან და აშშ-დან გადმორიცხულმა თანხებმა შეიტანა, ხოლო საქონლის ექსპორტის მძლავრი დინამიკისა და, მეტწილად ავტომობილების იმპორტის კლებით გამოწვეული, იმპორტის შედარებით სუსტი ზრდის ფონზე, შემცირდა საქონლით ვაჭრობის დეფიციტიც.თავის მხრივ, დივიდენდების წმინდა გადინება 2026 წლის პირველ ნახევარში წლიურად 55%-ით გაიზარდა და 816 მილიონ აშშ დოლარს მიაღწია. გარკვეული შემცირება დაფიქსირდა სატრანსპორტო მომსახურებიდან მიღებულ შემოსავლებშიც, ხოლო ახლო აღმოსავლეთში კონფლიქტის ესკალაციის ფონზე, ტურიზმიდან მიღებული წმინდა შემოსავლები წლიურად 2%-ით შემცირდა.მიუხედავად ამისა, გასული ხუთი კვარტლის განმავლობაში მიმდინარე ანგარიშის ჯამურმა პროფიციტმა, რეინვესტირებული შემოსავლების გამორიცხვით, 360 მილიონი აშშ დოლარი შეადგინა, რამაც ლარის გამყარებასა და ეროვნული ბანკის მიერ რეზერვების აქტიურ დაგროვებას შეუწყო ხელი. თუმცა, რეზერვების დაგროვების უდიდესი ნაწილი ფინანსური ანგარიშის, კერძოდ კი ბანკების მიერ მოზიდული უცხოური დაფინანსების, ხარჯზე მოხდა.ფინანსური ანგარიში აჩვენებს, თუ როგორ დაიხარჯა მიმდინარე ანგარიშის პროფიციტი საზღვარგარეთ ან როგორ დაფინანსდა დეფიციტი საზღვარგარეთიდან. თუ ფინანსური და მიმდინარე ანგარიშის ბალანსების ჯამი დადებითია, ეს სებ-ს სავალუტო რეზერვების დაგროვების საშუალებას აძლევს. 2026 წლის მეორე კვარტალში, ქვეყანაში ფინანსური ნაკადების წმინდა შემოდინებამ მიმდინარე ანგარიშის დადებით ბალანსზე მკვეთრად მეტი - დაახლოებით 0.9 მილიარდი აშშ დოლარი შეადგინა, რამაც სებ-ის მთლიანი რეზერვების რეკორდული, 969 მილიონი აშშ დოლარით ზრდა განაპირობა.პირველი კვარტალისგან განსხვავებით, როდესაც პორტფელური შემოდინებების ძირითადი წყარო რეზიდენტების მიერ უცხოური აქტივების გაყიდვა იყო, მიმდინარე წლის მეორე კვარტალში ფინანსური შემოდინებები ძირითადად საზღვარგარეთ ახალი ვალდებულებების აღებას ასახავდა, რომლის მთავარი წყაროც ბანკები იყვნენ. ბანკებმა 2026 წლის მეორე კვარტალში საზღვარგარეთიდან სესხების, ობლიგაციებისა და არარეზიდენტების დეპოზიტების სახით რეკორდული 921 მილიონი აშშ დოლარი მოიზიდეს, ხოლო უცხოურ აქტივებში მათ მიერ განხორციელებული ინვესტიციების გათვალისწინების შემდეგ, ამ არხიდან ქვეყანაში წმინდა შემოდინებამ 664 მილიონი აშშ დოლარი შეადგინა, რაც სებ-ის რეზერვების კვარტალური ნაზრდის ორ მესამედზე მეტია. თუმცა საბანკო ნაკადები ფინანსური ანგარიშის ყველაზე ცვალებადი კომპონენტია, რაც ნაწილობრივ ბანკების მიერ უცხოური ლიკვიდობის ბუფერების კორექტირებას ასახავს.გარდა ამისა, მეორე კვარტალში 156 მილიონი აშშ დოლარი შეადგინა წმინდა პირდაპირმა უცხოურმა ინვესტიციებმა რეინვესტიციების გამორიცხვით, ხოლო, ბოლო პერიოდში გაზრდილი ინტერესის შედეგად, არარეზიდენტების მიერ საქართველოს მთავრობის ფასიანი ქაღალდების შესყიდვამ მთავრობის მიერ საგარეო ვალის დაფარვას 57 მილიონი აშშ დოლარით გადააჭარბა. ამ ფონზე, ქვეყნის რეზიდენტებმა დამატებით 100 მილიონი აშშ დოლარი დააბანდეს უცხოურ აქციებსა და საინვესტიციო ფონდებში. ივნისის ბოლოსთვის, რეზიდენტების (მათ შორის ბანკების) მფლობელობაში არსებული უცხოური პორტფელური აქტივების ღირებულებამ, რომელიც 2022 წლის შემდეგ მკვეთრად გაიზარდა, 5.1 მილიარდ აშშ დოლარს, ანუ მშპ-ის 12.6%-ს მიაღწია.ჯამურად, ვინაიდან გასული ხუთი კვარტალის განმავლობაში მთლიანი სავალუტო შემოდინებები გასავლებს აღემატებოდა, სებ-ის სავალუტო რეზერვები 2.6 მილიარდი აშშ დოლარით გაიზარდა, საიდანაც მიმდინარე ანგარიშის დადებითი ბალანსის წვლილი 0.4 მილიარდს უტოლდებოდა, წმინდა პირდაპირი უცხოური ინვესტიციების წვლილი 0.6 მილიარდს, ბანკების წვლილი 1.2 მილიარდს, ხოლო მთავრობის წვლილი 0.3 მილიარდ აშშ დოლარს. სხვა სიტყვებით რომ ვთქვათ, რეინვესტიციების გამორიცხვით მიმდინარე ანგარიშის დადებითმა ბალანსმა რეზერვებზე სავალუტო გადინებების ზეწოლა მოხსნა, ხოლო დამატებითი რეზერვების დაგროვება კაპიტალის, განსაკუთრებით კი საბანკო, ნაკადების ზრდის შედეგად გახდა შესაძლებელი.აღსანიშნავია, რომ რეზერვების დაგროვება კვლავ გრძელდება. ეროვნულმა ბანკმა ივლისსა და აგვისტოში სავალუტო ბაზარზე დამატებით 1 მილიარდი აშშ დოლარი შეისყიდა, რის შედეგადაც, მთლიანი რეზერვები 8.1 მილიარდ დოლარამდე, წმინდა რეზერვები კი 5.6 მილიარდ დოლარამდე გაიზარდა. სარეზერვო ოქროს ფასის შემცირების მიუხედავად, ბოლო მონაცემებით, რეზერვების ზრდა გაგრძელდა სექტემბერშიც და მთლიანმა მოცულობამ 8.2 მილიარდი აშშ დოლარი შეადგინა, რაც საერთაშორისო სავალუტო ფონდის მიერ შეფასებული რეზერვების ადეკვატურობის დონის 128.7%-ს უტოლდება.თიბისი კაპიტალის შეფასებით, მიმდინარე ანგარიშის პროფიციტი მესამე კვარტალში კიდევ უფრო გაუმჯობესდება, ძირითადად ტურიზმიდან მიღებული შემოსავლების აღდგენის ფონზე, რამაც რუსეთიდან და ყირგიზეთიდან ფულადი გზავნილების სანქციებით გამოწვეული კლება დააბალანსა. ამ ნაკადის კუთხით, მოსალოდნელია, რომ შემოდინებები გაგრძელდება, თუმცა მათი ნაწილი სავარაუდოდ სხვა ფულადი გზავნილების სისტემებზე, ნაწილი კი სხვა არხებზე გადაინაცვლებს, ამიტომ გაურკვევლობის დონე მაღალია. ამავდროულად, ICT ექსპორტის მაღალი საბაზო ეფექტი და დივიდენდების გაზრდილი გადინება მიმდინარე ანგარიშის გაუმჯობესებაზე, სავარაუდოდ, მცირედით უარყოფითად იმოქმედებს. შესაბამისად, თიბისი კაპიტალის განახლებული პროგნოზით, რეინვესტიციების გამორიცხვით მიმდინარე ანგარიშის პროფიციტი წელს მშპ-ის 1.0%-ის ნაცვლად დაახლოებით 0.7-0.8%-ს გაუტოლდება.იხილეთ პუბლიკაციის სრული ვერსია შემდეგ ბმულზე: https://tbccapital.ge/ge/publications/all-publications/singleview/30007726-macro-update-georgia

1791538726

დავით სონღულაშვილმა ყურადღება გაამახვილა მცენარეთა დაცვის საშუალებების ხარისხის კონტროლისა და მათი სწორად გამოყენების მნიშვნელობაზეც. მინისტრის განცხადებით, აღნიშნულ მიმართულებას სახელმწიფო შესაბამისი მექანიზმებით აკონტროლებს, მათ შორის, სურსათის ეროვნული სააგენტო ახორციელებს მცენარეთა დაცვის საშუალებების კონტროლს როგორც ქვეყანაში შემოტანისა და სერტიფიცირების, ისე რეალიზაციის ეტაპზე.„სურსათის ეროვნული სააგენტო ძალიან აქტიურად მუშაობს არა მხოლოდ საზღვარზე პესტიციდების შემოტანისა და სერტიფიცირების, არამედ მათი შემდგომი რეალიზაციის კონტროლის მიმართულებითაც. ამასთან, ერთ-ერთი მნიშვნელოვანი გამოწვევაა ცოდნაზე და კვალიფიციურ აგრონომიულ მომსახურებაზე ხელმისაწვდომობა. ფერმერმა უნდა იცოდეს, რა დაავადებასთან აქვს საქმე და კონკრეტულ შემთხვევაში რომელი საშუალება და რა დოზით გამოიყენოს. შესაძლოა, პრეპარატი იყოს ხარისხიანი, მაგრამ მისი არასწორად გამოყენების შემთხვევაში სასურველ შედეგს ვერ მივიღებთ. სწორედ ამიტომ, მნიშვნელოვანია პესტიციდების სწორად და შესაბამისი რეკომენდაციების გათვალისწინებით გამოყენება“, - განაცხადა დავით სონღულაშვილმა.მინისტრის განცხადებით, ფერმერთა მხარდაჭერა ასევე მოიცავს მექანიზაციის ხელმისაწვდომობის ზრდას, გადამუშავების შესაძლებლობების გაძლიერებას და ქართული პროდუქციის საექსპორტო ბაზრებზე პოზიციების განმტკიცებას. მისი თქმით, ამ მიმართულებით სახელმწიფო ფინანსური მხარდაჭერის მექანიზმებს აძლიერებს, რაც ფერმერებს წარმოებისა და გადამუშავების შესაძლებლობების გაუმჯობესებაში დაეხმარება.„მექანიზაციის მიმართულებით აქტიურად ვმუშაობთ. ამ ეტაპზე უკვე 20-ზე მეტი მიმართულება გვაქვს და ეს შესაძლებლობები კიდევ უფრო გაიზრდება, რადგან შესაბამისი ფინანსური მხარდაჭერის მექანიზმები შევქმენით. ასევე მნიშვნელოვანია მცირე და საშუალო მარნების მხარდაჭერა, რათა მეურნეებს დამატებითი ღირებულების შექმნის შესაძლებლობა ჰქონდეთ“, - განაცხადა დავით სონღულაშვილმა.მინისტრის განცხადებით, სახელმწიფო ასევე მუშაობს ქართული ღვინის საექსპორტო პოტენციალის გაძლიერებასა და ახალი ბაზრების ათვისებაზე.„საერთაშორისო ბაზრებზე ქართული ღვინის პოზიციების კიდევ უფრო გაძლიერება და ახალი ბაზრების ათვისება ჩვენი ერთ-ერთი მნიშვნელოვანი მიმართულებაა. სხვადასხვა მხარდაჭერის მექანიზმით, მათ შორის საერთაშორისო გამოფენებში მონაწილეობით, ხელს ვუწყობთ მეღვინეებს, კიდევ უფრო გაზარდონ ექსპორტი, აითვისონ ახალი ბაზრები და უკვე არსებულ ბაზრებზე თავიანთი პოზიციები გააძლიერონ“, - აღნიშნა დავით სონღულაშვილმა.

1791538302

ფესტივალის ჟიურის წევრები იქნებიან: კინორეჟისორი ანა ურუშაძე, პროდიუსერი და მსახიობი ჯასტინ ვედელი, კინოოპერატორი რეინ კოტოვი, პროდიუსერი რინგაილე ლესჩინსკიენე, მსახიობი ლუკა ჩიქოვანი; კინორეჟისორი და საქართველოს კინოინსტიტუტის პრეზიდენტი ნუცა ალექსი-მესხიშვილი კი ჟიურის თავმჯდომარე იქნება.ფესტივალის პროგრამა აერთიანებს ევროპული კინოს არაერთ მნიშვნელოვან მიმართულებას: მაყურებელი იხილავს უნგრული ახალი ტალღის ფილმებს, იტალიურ კინოკლასიკას, კრის მარკერის რეტროსპექტივას, გერმანული ექსპრესიონიზმის გამორჩეულ ნამუშევარს - ფ.ვ. მურნაუს „ფაუსტს“, რომელსაც ცოცხალი მუსიკის თანხლებით გაიმართება. მაყურებელი ასევე იხილავს სტუდენტურ მოკლემეტრაჟიანი ფილმებს.ფესტივალის პროგრამა გარდა კინოჩვენებებისა აერთიანებს საჯარო ლექციებს, შეხვედრებს და დისკუსიებს კინემატოგრაფისტებთან, მასტერკლასებს, კინოსახელოსნოებსა და მუსიკალურ საღამოებს.ქუთაისის საერთაშორისო მოკლემეტრაჟიანი ფილმების ფესტივალზე განსაკუთრებული ადგილი დაეთმობა ქართული კინოს მემკვიდრეობას. რეზო გაბრიაძის 90-ე, ნანა მჭედლიძის, ლევან პაატაშვილისა და სესილია თაყაიშვილის 100 წლის იუბილეები სპეციალური ჩვენებებით აღინიშნება. ფესტივალის გახსნისას მაყურებელი ლევან გაბრიაძის „ჰარი-ჰარალე, დედაო!“ ნახავს, პროგრამაში კი კლასიკურ ქართულ ფილმებთან ერთად უახლესი მოკლემეტრაჟიანი და სრულმეტრაჟიანი ნამუშევრებიც იქნება წარმოდგენილი.ფესტივალის სტუმრებს შესაძლებლობა ექნებათ პირველად იხილონ რამდენიმე ქართული ფილმი, მათ შორის უტა ბერიას „ცრემლსადენი გაზი“, ანა ურუშაძის „მეორეხარისხოვანი როლი“ და ნანა ჯანელიძის „ქმნილების ხელოსანი“, რომლითაც ფესტივალი დაიხურება.ფესტივალის გამარჯვებულები, 22 ოქტომბერს,19:00 საათზე, კინოთეატრ „საქართველოში“ გამართულ საზეიმო ღონისძიებაზე გამოვლინდებიან.თიბისისთვის კულტურის მხარდაჭერა მხოლოდ ცალკეული ღონისძიებების ხელშეწყობას არ გულისხმობს. ბრენდისთვის ეს არის გრძელვადიანი ხედვა, რომლის მიზანია შეიქმნას მეტი სივრცე ახალი იდეებისთვის, შემოქმედებითი დიალოგისა და განსხვავებული გამოცდილებების გასაზიარებლად. ქუთაისის საერთაშორისო მოკლემეტრაჟიანი ფილმების ფესტივალიც სწორედ ასეთი სივრცეა, სადაც კინო ქალაქს ახალ ენერგიას სძენს, განსხვავებულ ისტორიებს აერთიანებს და ეკრანს ადამიანების შეხვედრის ადგილად აქცევს.

1791537413

„პროტესის ორგანიზება სხვადასხვა ჯგუფების საშუალებით მოხდა და იყო მოწოდებები, რომ შეკრებილიყვნენ. 30 თეთრად ჩასაბარებელი ყურძენი, ღვინისა და სპირტის წარმოებისთვის გამოუსადეგარია“, - განაცხადა დავით სონღულაშვილმა.მინისტრმა ყურადღება  ყურძნის ხარისხობრივი კატეგორიების მიხედვით შეფასების მნიშვნელობაზეც გაამახვილა.დავით სონღულაშვილის განმარტებით, ვენახის მოვლა დიდ ფიზიკურ შრომას მოითხოვს, ამიტომ მნიშვნელოვანია, მევენახემ მიღებული მოსავლის ხარისხის შესაბამისი ანაზღაურება მიიღოს. მისი თქმით, ყურძნის ხარისხობრივი დიფერენციაციის მიზანი სწორედ მაღალი ხარისხის პროდუქციის წარმოების წახალისება და მევენახეებისთვის შესაბამისი მოტივაციის შექმნაა.„ყურძნის ხარისხობრივი დიფერენციაციით მოტივაცია გავაჩინეთ იმის, რომ მევენახემ რაც შეიძლება მაღალი ხარისხის ყურძენი მოიყვანოს. სხვაობაც იმხელაა საშუალო და უმაღლესი ხარისხის ყურძენს შორის, რომ მევენახე მაქსიმალურად ეცადოს, უმაღლესი ხარისხის მოსავალი მიიღოს“, - განაცხადა დავით სონღულაშვილმა.

1791536063

„წელს საუკეთესო ხარისხის მოსავალი გვექნება, ერთ-ერთი გამორჩეული და ყველაზე დიდი მოსავალი დამოუკიდებელი საქართველოს ისტორიაში. ქართული ღვინო აუცილებლად უნდა იყოს ხარისხიანთან ასოცირებული. გასულ წლებში, რაც მეტ ყურძენს მოიყვანდა მევენახე, მეტ შემოსავალს იღებდა და მას არ ჰქონდა ინტერესი, ეწარმოებინა ხარისხიანი ყურძენი. არ შეიძლება, რომ ქართული ღვინო გათვლილი იყოს რაოდენობაზე და ეს თითოეულმა მევენახემ და მეღვინემ არაჩვეულებრივად იცის. მეღვინეობის დარგის რეფორმის მიზანიც სწორედ ეს არის - ვაწარმოოთ ხარისხიანი ყურძენი, რომლის საზომიც არის შაქრიანობა“,  - აღნიშნა გარემოს დაცვისა და სოფლის მეურნეობის მინისტრმა დავით სონღულაშვილმა რთველის მიმდინარეობაზე საუბრისას.მისი განცხადებით, კახეთში რთველი პიკურ ფაზაშია და მოსავლის დაბინავების პროცესი ორგანიზებულად მიმდინარეობს.„კახეთში ყურძნის გადამუშავებამ 206 ათას ტონას გადააჭარბა. რთველის საკოორდინაციო შტაბი და ღვინის საწარმოები 24 საათიან რეჟიმში მუშაობენ. წლევანდელი რთველი გამოირჩევა რაოდენობრივი და ხარისხობრივი მაჩვენებლებით.  ხარისხიანი ღვინის მიღება შეუძლებელია ხარისხიანი ყურძნის გარეშე - ხარისხიანი ღვინო იბადება ვენახში. სწორედ ამას ემსახურება ყურძნის ხარისხის მიხედვით დიფერენცირებული ფასების სისტემის დანერგვა, რაც მევენახეებს აძლევს მოტივაციას, უფრო მეტად იზრუნონ ყურძნის ხარისხზე“,- აღნიშნა მინისტრმა.

1791535523

ღონისძიების მთავარი თემა იყო ბიზნესისთვის ერთი შეხედვით მარტივი, თუმცა კრიტიკულად მნიშვნელოვანი კითხვა - რამდენი უჯდება კომპანიას რეალურად ერთი გავლილი კილომეტრი? PPK მოდელი საბურავის ღირებულებას მხოლოდ შესყიდვის საწყისი ფასით არ აფასებს. ის ითვალისწინებს საბურავის რესურსს, გამძლეობას, ექსპლუატაციის ხანგრძლივობასა და, საბოლოოდ, თითოეულ გავლილ კილომეტრზე გაწეულ დანახარჯს.„თეგეტას“ მიერ წარმოდგენილი შედეგების მიხედვით, Bridgestone-ის პრემიუმ კლასის სატვირთო საბურავების გამოყენება, მათი საექსპლუატაციო რესურსისა და გამძლეობის გათვალისწინებით, ბიზნესებისთვის კილომეტრზე გაწეულ ხარჯს დაახლოებით 30%-მდე ამცირებს.ეკატერინე ქავთარაძე, „თეგეტა ჰოლდინგის“ მთავარი აღმასრულებელი ოფიცერი: „ჩვენი მიზანია, პარტნიორებს არა მხოლოდ ხარისხიანი პროდუქტი შევთავაზოთ, არამედ დავეხმაროთ, რომ ავტოპარკი უფრო ეფექტიანად, უსაფრთხოდ და პროგნოზირებადად მართონ. ბიზნესისთვის გადაწყვეტილების მიღებისას მნიშვნელოვანია არა მხოლოდ პროდუქტის საწყისი ფასი, არამედ ის, თუ რა უჯდება ის კომპანიას მთელი ექსპლუატაციის პერიოდში.სწორედ ამას აჩვენებს PPK მოდელი - რეალურ მონაცემებზე დაყრდნობით გვაძლევს შესაძლებლობას, შევაფასოთ დანახარჯი თითოეულ გავლილ კილომეტრზე. დიდი ავტოპარკებისთვის ეს განსაკუთრებით მნიშვნელოვანია, რადგან მათთვის მცირე სხვაობაც კი წლიურ ჭრილში საგრძნობ ფინანსურ ეფექტად გარდაიქმნება“.„თეგეტასა“ და Bridgestone-ს შორის თანამშრომლობა 1998 წელს დაიწყო და დღემდე გრძელდება. დღეს „თეგეტა“ Bridgestone-ის ოფიციალური დისტრიბუტორია რეგიონში. პარტნიორობა, პროდუქტის მიწოდებასთან ერთად, მოიცავს ტექნიკურ ექსპერტიზას, სერვისებსა და ავტოპარკების საოპერაციო ეფექტიანობაზე ორიენტირებულ გადაწყვეტილებებს.თანამშრომლობის კიდევ ერთი მნიშვნელოვანი ეტაპი იქნება Bandag-ის საბურავების აღდგენის ქარხნის ამოქმედება, რომელიც 2027 წლიდან იგეგმება. პროექტი სატვირთო საბურავების სრული სასიცოცხლო ციკლის მართვას გააძლიერებს და ბიზნესებს საშუალებას მისცემს, საბურავის რესურსი კიდევ უფრო ეფექტიანად გამოიყენონ, შეამცირონ კილომეტრზე დანახარჯი და ოპერაციები უფრო მდგრადი გახადონ.ფელიქს სამოილოვი, Bridgestone-ის გაყიდვების მენეჯერი ახლო აღმოსავლეთის, აფრიკისა და CIS-ის რეგიონში: „ბიზნესისთვის ერთ კილომეტრზე დანახარჯის განსაზღვრა ბევრად უფრო მნიშვნელოვანი მაჩვენებელია, ვიდრე მხოლოდ საბურავის საწყისი ფასი. პროდუქტის რეალური ღირებულება მისი სრული სასიცოცხლო ციკლით უნდა შეფასდეს.Bridgestone-ის გლობალური ტექნიკური გამოცდილებისა და „თეგეტას“ ადგილობრივი ბაზრის ღრმა ცოდნის გაერთიანებით ავტოპარკების მფლობელებს ეფექტიან, მათ საჭიროებებზე მორგებულ გადაწყვეტილებებს ვთავაზობთ“.იაპონური ხარისხი „თეგეტას“ პორტფელში - UD Trucksსაირმეში გამართული შეხვედრის კიდევ ერთი მთავარი თემა იყო UD Trucks-ის წარდგენა. „თეგეტა“ იაპონური კომერციული ავტომობილების მწარმოებლის ექსკლუზიური წარმომადგენელია საქართველოში, სომხეთსა და აზერბაიჯანში. პარტნიორობის ფარგლებში კომპანია მომხმარებლებს სამივე ბაზარზე UD Trucks-ის ავტომობილებს, სათადარიგო ნაწილებსა და სრულ სერვისულ მხარდაჭერას სთავაზობს.იაპონური კომპანია ბაზარზე თავდაპირველად ორი მოდელით - UD Quester და UD Croner - იქნება წარმოდგენილი. UD Quester მძიმე ტვირთამწეობის ოპერაციებისთვის, მათ შორის სამშენებლო სამუშაოებისთვისაა განკუთვნილი. UD Croner კი საშუალო ტვირთამწეობის მრავალფუნქციური სატვირთო ავტომობილია, რომელიც ურბანულ და რეგიონულ დისტრიბუციაზე, მუნიციპალურ და სპეციალიზებულ ოპერაციებზეა მორგებული.ბექა ბერიძე, „თეგეტა ჰოლდინგის“ სატვირთო, კომერციული და ავტობუსების მიმართულების ხელმძღვანელი: „UD Trucks-ის დამატება ჩვენს პორტფელს კიდევ უფრო მრავალფეროვანს ხდის და ბიზნესს სატვირთო ტრანსპორტის მიმართულებით ახალ არჩევანს სთავაზობს. ჩვენთვის მნიშვნელოვანია, სხვადასხვა საჭიროების მქონე კომპანიებს მივაწოდოთ მათ ოპერაციებზე მორგებული ტექნიკა და, ამასთანავე, უზრუნველვყოთ მისი გრძელვადიანი მხარდაჭერა სერვისით, ნაწილებითა და ტექნიკური ექსპერტიზით.Quester და Croner სხვადასხვა ტიპის საოპერაციო საჭიროებას პასუხობს, თუმცა ორივე შემთხვევაში მთავარი აქცენტი საიმედოობაზე, ეფექტიანობასა და ბიზნესის ყოველდღიური ოპერაციების უწყვეტობაზე კეთდება“.ღონისძიების მონაწილეებს ასევე შესაძლებლობა ჰქონდათ, ადგილზე გასცნობოდნენ  Farizon-ს, საქართველოში პირველ სრულად ელექტრულ კომერციულ სატრანსპორტო და სადისტრიბუციო ავტომობილს. ბრენდის დილერია Farizon Center Tegeta.საირმეში გამართული შეხვედრა „თეგეტას“ კორპორაციულ პარტნიორებთან თანამშრომლობის განვითარების ნაწილია. კომპანიის მიდგომა პროდუქტის ან ტექნიკის ერთჯერად გაყიდვას სცდება და ბიზნესისთვის სრული საოპერაციო ღირებულების შემცირებაზეა ორიენტირებული - იქნება ეს საბურავის ხარჯი თითო კილომეტრზე, ტექნიკის საიმედოობა, სერვისი თუ ავტოპარკის საერთო ეფექტიანობა.„თეგეტა ჰოლდინგის” შესახებ: უმსხვილესი საავტომობილო კომპანია კავკასიასა და ცენტრალურ აზიაში მომხმარებელს საავტომობილო ეკოსისტემის სრულ სპექტრს სთავაზობს, რაც მსუბუქ, სატვირთო და სამშენებლო, ასევე კომერციულ, სამგზავრო და ინდუსტრიულ ტრანსპორტს მოიცავს. მთელი ქვეყნის მასშტაბით „თეგეტას” 28 სერვისცენტრი აქვს. „თეგეტა“ ექსკლუზიურად წარმოადგენს ცნობილ ბრენდებს Porsche, Lamborghini, Bentley, Volvo, Toyota, Mazda, Geely, Zeekr. სატვირთო და სპეცტექნიკის მიმართულებით ჰოლდინგის პარტნიორები არიან ისეთი დიდი ბრენდები, როგორებიცაა: MAN, JCB, HINO, LIEBHERR, BOMAG და სხვები. „თეგეტა” მსოფლიოს 300-ზე მეტი წამყვანი საავტომობილო ბრენდის იმპორტიორია საქართველოში. „თეგეტა ჰოლდინგი”, 3 000-მდე თანამშრომლით, დღეს საქართველოში ერთ-ერთი უმსხვილესი დამსაქმებელია.

1791534600