რუსეთის ფედერაციის სამხედრო აგრესიის მიუხედავად, უკრაინა იყო და რჩება სანდო პარტნიორად და მზადაა უზრუნველყოს თავისუფალი შესაძლებლობები კასპიის ზღვიდან ევროკავშირში ბუნებრივი გაზის ტრანსპორტირების სტრატეგიულად მნიშვნელოვან პროცესში.
უკრაინის ენერგეტიკის სამინისტროს პრესსამსახურის ინფორმაციით, ამის შესახებ უკრაინის ენერგეტიკის მინისტრის მოადგილემ, მიკოლა კოლესნიკმა სამხრეთ გაზის დერეფნის მრჩეველთა საბჭოს ფარგლებში მე-9 მინისტერიალზე განაცხადა.
მონაწილეებმა განიხილეს ევროკავშირში გაზის ტრანსპორტირების შესაძლებლობების გაზრდის შედეგები და გეგმები.
„რამდენიმე თვეში ინექციების სეზონი დაიწყება. ევროკავშირის ქვეყნებში მიწისქვეშა გაზის საწყობების (UGS) უმეტესობა სავსეა, რაც ხელს უწყობს უკრაინის UGS-ის მიმართ ინტერესის ზრდას.
ძირითადი გადაწყვეტა ეფუძნება არსებული ინფრასტრუქტურის გამოყენებას - ტრანსბალკანური გაზსადენის სიმძლავრეს. უკრაინის GTS ოპერატორისთვის ეს არის შესაძლებლობა მოიზიდოს ახალი მომხმარებლები სერვისებისთვის სახელმწიფოთაშორისი კავშირის პუნქტების საშუალებით“, - თქვა კოლესნიკმა.
მინისტრის მოადგილემ ასევე ხაზი გაუსვა, რომ უკრაინა დღეს არის მხარეთა სრული პარტნიორი ნავთობისა და გაზის კომპლექსში თანამშრომლობის ფარგლებში.
„აზერბაიჯანთან თანამშრომლობის ფარგლებში ერთ-ერთი უმთავრესი ინფრასტრუქტურული პროექტი არის ევრაზიის ნავთობის სატრანსპორტო დერეფნის პროექტი, რათა შეიქმნას ახალი მარშრუტი ნავთობის ტრანსპორტირებისთვის კასპიის რეგიონიდან ევროკავშირის ბაზრებზე.
ჩვენ დაინტერესებული ვართ სამხრეთ გაზის დერეფნის პროექტის განხორციელებით და მზად ვართ ვითანამშრომლოთ ბუნებრივი გაზის მიწოდების მარშრუტების დივერსიფიკაციისთვის“, - დასძინა მან.
კოლესნიკმა ხაზგასმით აღნიშნა, რომ უკრაინის სტრატეგიული ინტერესია ევროკავშირთან, აშშ-სთან, თურქეთთან და აზერბაიჯანთან თანამშრომლობა, მათ შორის რუსეთის გავლენის შესუსტება.
გიორგი არაბული
