მთავარი » ფინანსები » საქართველოს მოსახლეობის 64,8% საფინანსო სექტორის ვალი აქვს – აქტიური მოსახლეობის 99%-ს სესხი ამძიმებს
საქართველოს მოსახლეობის 64,8% საფინანსო სექტორის ვალი აქვს - აქტიური მოსახლეობის 99%-ს სესხი ამძიმებს

საქართველოს მოსახლეობის 64,8% საფინანსო სექტორის ვალი აქვს – აქტიური მოსახლეობის 99%-ს სესხი ამძიმებს

საქართველოში მოსახლეობა სულ უფრო მეტად ხდება სესხებზე დამოკიდებული. თუ ცივილურ ქვეყნებში კრედიტი კეთილდღეობის ასამაღლებლად გამოიყენება, ჩვენთან ხშირად სესხს მოსახლეობა ყოველთვიური ხარჯების გასასტუმრებლად იღებს.

“კრედიტ-ინფოს” აღმასრულებელი დირექტორის, სანდრო გომიაშვილის ინფორმაციით, მათ ბაზაში საკრედიტო ჩანაწერების რაოდენობა ყოველწლიურად იზრდება. 2016 წლის იანვრისთვის ბაზაში 12 500 000 ჩანაწერი იყო, 2017 წლის აპრილისთვის კი ამ მაჩვენებელმა 20 000 000-მდე მოიმატა. რაც იმას ნიშნავს, რომ ერთ წელსა და 4 თვის განმავლობაში საფინანსო ორგანიზაციების მიერ გაცემული სესხების რაოდენობა 7,5 ერთეულით გაიზარდა. გომიაშვილი განცხადებით, ეს არის რეკორდული მაჩვენებელი. მათივე ინფორმაციით, ამ დროისთვის „კრედიტინფოში” ჩანაწერი  4 200 000 აქტიური სესხზე არსებობს.

„გაცემული სესხების ასეთი მაღალი ზრდა პრაქტიკულად, არც ერთ წელს არ ყოფილა. მართალია, 20 მილიონში ზოგი სესხი უკვე დაფარულია, თუმცა ფაქტია, რომ ზრდა დიდია. ასეთი მატება კი ონლაინ საკრედიტო ორგანიზაციების გააქტიურებით და საბანკო სესხების გაცემის გამარტივებით არის განპირობებული”, – განუცხადა „კომერსანტს” გომიაშვილმა.

მისივე განცხადებით, ამ ეტაპზე „კრედიტ-ინფოს” ბაზაში ჩანაწერი სულ 2 412 000 ფიზიკურ პირსა და 67 000 იურიდიულ პირზე არსებობს. ეს კი იმას ნიშნავს, რომ ამა თუ იმ ტიპის საკრედიტო ვალდებულება სწორედ ამდენ ადამიანს გააჩნია. ბოლო აღწერით საქართველოში სულ 3 718 200 ადამიანი ცხოვრობს, შესაბამისად, გამოდის, რომ სესხით მთლიანი მოსახლეობის დაახლოებით 64,8% სარგებლობს. თუ გავითვალისწინებთ იმას, რომ 20 წლამდე ასაკის ადამიანებზე სესხს, პრაქტიკულად, არც ერთი საფინანსო სტრუქტურა არ გასცემს, 70 წლის ზემოთ მყოფები კი კრედიტს აღარ იღებენ, გამოვა, რომ აქტიური მოსახლეობის 99%-ს სესხი ამძიმებს. სტატისტიკის სამსახურის მონაცემებით, საქართველოში 20-დან 70 წლამდე ასაკის 2,423 მლნ ადამიანი ცხოვრობს.

 

წყარო: commersant.ge