Home » ბიზნესი » „თიბისიმ“ და „კომერცბანკმა”, ვაჭრობის დაფინანსების ქსელის – Marco Polo-ს საშუალებით, საპილოტე პროექტი განახორციელეს

„თიბისიმ“ და „კომერცბანკმა”, ვაჭრობის დაფინანსების ქსელის – Marco Polo-ს საშუალებით, საპილოტე პროექტი განახორციელეს

„თიბისიმ” და „კომერცბანკმა”, ვაჭრობის დაფინანსების ქსელის – Marco Polo-ს საშუალებით, პირველად რეგიონში, ორი სავაჭრო ტრანზაქცია განახორციელეს.

საპილოტე პროექტის ფარგლებში, „თეგეტა ჯგუფსა“ და MAN Truck and Bus-ს შორის, ბლოკჩეინ ტექნოლოგიის გამოყენებით, გერმანიიდან საქართველოში სატვირთო ტექნიკის ჩამოტანასთან დაკავშირებული სავაჭრო ოპერაცია განხორციელდა.

„თიბისი“ პირველი ბანკია რეგიონში, რომელიც ბლოკჩეინ ტექნოლოგიის პროექტებშია ჩართული.

„Marco Polo“ პლატფორმის წევრებს, ვაჭრობასთან და საბრუნავ კაპიტალთან დაკავშირებულ თანამედროვე გადაწყვეტებს სთავაზობს. სისტემა, რომელიც სრულად ეფუძნება ბლოკჩეინ ტექნოლოგიებს, ხელს უწყობს ვაჭრობის მონაწილეებს შორის უწყვეტი კავშირის დამყარებას, ინფორმაციის თავისუფლად მიმოცვლასა და ეფექტურ, მოქნილ თანამშრომლობას.

„ვაჭრობის დაფინანსების მიმართულებით, მსოფლიოს მასშტაბით, ყველა ძირითად საერთაშორისო ბანკთან და ფინანსურ ინსტიტუტთან თანამშრომლობით, პარტნიორებს შესაძლებლობას ვაძლევთ წარმატებით განახორციელონ საერთაშორისო ოპერაციები. თიბისის ვაჭრობის დაფინანსების გუნდი, თითოეულ მომხმარებელს და მის ტრანზაქციას ინდივიდუალურად ვუდგებით და ყველაზე მომგებიანი და ნაკლებ რისკიანი სტრუქტურის ჩამოყალიბებაში ვეხმარებით. „Marco Polo“-ს პლატფორმა, საშუალებას გვაძლევს ჩვენს მომხმარებლებს კიდევ უფრო მეტი ინოვაციური და ტექნოლოგიური გადაწყვეტა შევთავაზოთ, გავუმარტივოთ ცხოვრება და ვაჭრობის დაფინანსებასთან დაკავშირებული პროცესები კიდევ უფრო მოქნილი, მარტივი და ეფექტური გავხადოთ“, – ამის შესახებ თიბისის ვაჭრობის დაფინანსებისა და ფაქტორინგის დეპარტამენტის უფროსმა, თამარ ხიზანიშვილმა განაცხადა.

“Marco Polo პლატფორმის მიზანი სავაჭრო ოპერაციების ხელშეწყობა და პროცესში ჩართული ფინანსური ინსტიტუტებისთვის, მათი კორპორაციული კლიენტებისთვის და ზოგადად, ვაჭრობის ეკოსისტემისთვის – ღირებულების შექმნაა. მოხარულები ვართ, რომ თიბისიმ წარმატებით განახორციელა პლატფორმის სატესტო პროექტი და შედეგად, ხელი შეუწყო თანამედროვე ტექნოლოგიების შესახებ ცნობადობის გაზრდას ჩვენთვის სტრატეგიულად მნიშვნელოვან რეგიონში“, – აღნიშნა TradeIX-ის გაყიდვებისა და კლიენტებთან ურთიერთობის მმართველმა დირექტორმა, აუტარი მეგლემ.

„კლიენტების საჭიროებების შესაბამისად, ჩვენი პრიორიტეტია მომარაგების ქსელის მართვის ინოვაციური მეთოდების განვითარება, ასევე პროცესების ავტომატიზაცია და გაციფრულება. „Marco Polo“-ს ქსელთან წარმატებული თანამშრომლობის შედეგად, ბლოკჩეინის უდიდეს პოტენციალზე გვაქვს წვდომა. ვინაიდან, ვაჭრობის დაფინანსება თიბისი ბანკისა და კომერცბანკის პრიორიტეტული მიმართულებაა, აღნიშნული საპილოტე ოპერაცია ბუნებრივი თანხვედრა იყო“, – განაცხადა კომერცბანკის რეგიონალურმა უფროსმა, ჰანს კრონმა.

„თეგეტა ჯგუფი საავტომობილო ინდუსტრიის ლიდერია რეგიონში. საერთაშორისო ოპერაციები ჩვენი საქმიანობის უმნიშვნელოვანესი ნაწილია და თიბისი ამ მიმართულებით უკვე წლებია თეგეტას საიმედო პარტნიორია.

გვიხარია, რომ ბლოკჩეინის ინოვაციური ტექნოლოგიის გამოყენების შანსიც პირველებს ჩვენ მოგვეცა, ვინაიდან საერთაშორისო ოპერაციების განსახორციელებლად მარტივი და ეფექტური გზების გამოყენება კომპანიის ბიზნესპროცესებს კიდევ უფრო მოქნილსა და თანამედროვეს ხდის“, – აღნიშნა „თეგეტა ჯგუფის“ ინვესტორებთან ურთიერთობის მენეჯერმა, თინათინ ლაბარტყავამ.

„ვაჭრობის დაფინანსების პროცესების ოპტიმიზაციის მიზნით, დაინტერესებული ვართ ახალი ტექნოლოგიების დანერგვით. ჩვენ მივყვებით ციფრული განვითარების ტენდენციას. აღნიშნული საპილოტე პროექტის მსგავსი ინიციატივები, ჩვენთვის შესაძლებლობაა რომ ბიზნესპორცესები გავამარტივოთ“, – ნათქვამია „MAN Truck and Bus“-ის განცხადებაში.

Share