Home » საზოგადოება » სოფლების ხვანის, ჭალოვანის, ბერეთისას, ნიგვზარასა და კორბოულის სიახლოვეს ქარის ელექტროსადგურები აშენდება
სოფლების ხვანის, ჭალოვანის, ბერეთისას, ნიგვზარასა და კორბოულის სიახლოვეს ქარის ელექტროსადგურები აშენდება

სოფლების ხვანის, ჭალოვანის, ბერეთისას, ნიგვზარასა და კორბოულის სიახლოვეს ქარის ელექტროსადგურები აშენდება

საქართველოს მთავრობამ დღეს  განკარგულება დაამტკიცა, რომლითაც იმერეთის მხარეში სოფლების – ხვანის, ჭალოვანის, ნიგვზარას, ბერეთისა და კორბოულის სიახლოვეს ქარის ელექტროსადგურის მშენებლობის კონცეფცია მოიწონა.

ეკონომიკისა და მდგრადი განვითარების მინისტრის მოადგილის,  დავით თვალაბეიშვილის განცხადებით, მიუხედავად იმისა, რომ საქართველოში ქარის ენერგეტიკული პოტენციალი შეფასებულია დაახლოებით 1500 მგვტ, წლიური 5 მლრდ. კვტ.სთ გამომუშავებით, ჩატარებული კვლევების შედეგად, დადგინდა, რომ საქართველოს ენერგოსისტემაში 2021 წლის ჩათვლით, შესაძლებელია მხოლოდ 350 მგვტ-მდე სიმძლავრის ქარის სადგურების ინტეგრირება სისტემაში არსებული დღევანდელი რეზერვების გათვალისწინებით.

„სამომავლოდ რეზერვების ზრდასთან ერთად, ქარის სადგურების მშენებლობა უფრო მეტი ინტენსივობით იქნება შესაძლებელი. დღეის მდგომარეობით, დაახლოებით 330-350 მგვტ.ქსელში ინტეგრირებასთან დაკავშირებით უკვე მიმდინარეობს კერძო კომპანიებთან სამშენებლო მემორანდუმების გაფორმების პროცესი,“ – განაცხადა დავით თვალაბეიშვილმა.

მინისტრის მოადგილის თქმით, ქარის ენერგეტიკის პარალელურად, საქართველოს მთავრობა აქტიურად თანამშრომლობს ინვესტორებთან როგორც ჰიდრო, ასევე თბოელექტროსადგურების მშენებლობის მიმართულებით. 2018-2019 წლებში ექსპლუატაციაში შევიდა 11 ჰესი, რომელთა დადგმულმა სიმძლავრემ დაახლოებით 100 მვტ-ი, ხოლო ინვესტიციების ჯამურმა მაჩვენებელმა 210,7 მლნ აშშ დოლარი შეადგინა.

„მნიშვნელოვანია, რომ საქართველოში ელექტროენერგიის გაზრდილი მოხმარების დაკმაყოფილება ადგილობრივი რესურსებით მოხდეს. ჩვენ საქართველოს ენერგოსექტორში დაახლოებით 1 მლრდ აშშ დოლარის ინვესტიციის განხორციელების შესახებ მემორანდუმები გავაფორმეთ. ჩვენი ვარაუდით, მომავალი 3 წლის განმავლობაში ჩვენს სისტემას 500 მგვტ-მდე დამატებითი სიმძლავრე შეემატება და რამდენიმე ათეული ჰესი და სხვა ენერგოობიექტი აშენდება“, – განაცხადა ეკონომიკისა და მდგრადი განვითარების მინისტრის მოადგილემ, დავით თვალაბეიშვილმა.

ეკონომიკის სამინისტროს ინფორმაციით, 2018-2019 წლებში საქართველოში ენერგეტიკული ობიექტების მშენებლობაში უკვე 201 მლნ აშშ დოლარზე მეტი ინვესტიცია განხორციელდა. უწყების გათვლებით, უკვე გაფორმებული ურთიერთგაგების მემორანდუმების ჯამური ღირებულება მილიარდ დოლარზე მეტ ინვესტიციას მოიტანს. ასევე, მიმდინარე წლის აპრილში წარმატებით დასრულდა მოლაპარაკება საქართველოში ნამახვანი ჰესების კასკადის მშენებლობაზე. გარდა ამისა, 2020 წელს ექსპლუატაციაში შევა 230 მვტ სიმძლავრის თბოელექტროსადგური გარდაბანში.

„ენერგეტიკა არის ის სფერო, სადაც ძალიან სწრაფად ვითარდება ტექნოლოგიები და ჩვენ ამ მიმართულებით ხელს ვუწყობთ დარგის დივერსიფიკაციას და განახლებას,“ – განაცხადა მინისტრის მოადგილემ.

Share