Home » ეკონომიკა » შვეიცარიული კომპანია Camille Bloch-ი საქართველოში თხილის პლანტაციას ინოვაციური მეთოდით გააშენებს

შვეიცარიული კომპანია Camille Bloch-ი საქართველოში თხილის პლანტაციას ინოვაციური მეთოდით გააშენებს

ეკონომიკისა და მდგრადი განვითარების მინისტრი ნათია თურნავა შოკოლადის მწარმოებელი შვეიცარიული კომპანიის Camille Bloch-ის პრეზიდენტს, დანიელ ბლოხს შეხვდა, სადაც საუბარი კომპანიას და ქართულ მხარეს შორის თანამშრომლობას, მათ შორის პროგრამის „აწარმოე საქართველოში“ ფარგლებში, შეეხო.

ნათია თურნავას თქმით, მისასალმებელია, რომ მსოფლიოში ისეთმა ცნობილმა შვეიცარიულმა კომპანიამ, როგორიც Camille Bloch-ია, საქართველოში თხილის პლანტაციის ინოვაციური მეთოდით გაშენება და საკუთარი წარმოების სწორედ საქართველოში გაფართოება გადაწყვიტეს.

მისივე თქმით, კომპანიამ სწორედ საქართველო შეარჩია იმ პლატფორმად, სადაც რამდენიმე ათეულ ჰექტარზე ინოვაციური მეთოდით გაშენებული თხილის პლანტაცია ექნებათ და ათობით ადამიანს დაასაქმებენ.

„ჩვენ მზად ვარ მაქსიმალურად გვერდში დავუდგეთ და დავეხმაროთ პროგრამა „აწარმოე საქართველოში“ ფარგლებში, მათ შორის დასაქმებული ადამიანების დატრენინგებასა და ახალი ცოდნის, ახალი ტექნოლოგიების დანერგვაში. ეს არის ზოგადად ის სიკეთე, რაც მოაქვთ ევროპელ ინვესტორებსა და ევროპულ ინვესტიციებს საქართველოსთვის არა მხოლოდ ახალი სამუშაო ადგილების შექმნით და ინვესტიცით, არამედ ახალი ცოდნის, ახალი ტექნოლოგიის დანერგვით, რაც ესოდენ მნიშვნელოვანია სოფლის მეურნეობის სფეროში“, – აღნიშნა ნათია თურნავამ.

ეკონომიკის სამინისტროს ცნობით, შოკოლადის მწარმოებელმა შვეიცარიულმა კომპანიამ Camille Bloch კახეთის რეგიონში, სიღნაღის მუნიციპალიტეტში, 40 მლნ ლარის ოდენობის ინვესტიცია განახორციელა და 50 ჰა მიწის ფართობზე, ინოვაციური ტექნოლოგიით თხილის ბაღების გაშენება დაიწყო.

ამასთან, ინფორმაციაში აღნიშნულია, რომ კომპანია თხილის პირველ მოსავალს 2025 წლისთვის ელოდება.

Share