Home » ბიზნესი » საქართველოს ბიზნესასოციაცია ხელისუფლებას ღამით გადაადგილებაზე შეზღუდვის 23:00 საათამდე გადაწევისკენ მოუწოდებს

საქართველოს ბიზნესასოციაცია ხელისუფლებას ღამით გადაადგილებაზე შეზღუდვის 23:00 საათამდე გადაწევისკენ მოუწოდებს

საქართველოს ბიზნესასოციაციაში ღამის საათებში გადაადგილებაზე შეზღუდვის სულ მცირე 2 საათით გადაწევის აუცილებლობაზე საუბრობენ. ბიზნესასოციაციაში აცხადებენ, რომ სახელმწიფოს მიერ სოციალური თუ სხვა ვალდებულებების დასაფინანსებლად და ზოგადად ქვეყნის საზოგადოებრივი განვითარებისა და საზოგადოების კეთილდღეობისათვის საჭიროა ძლიერი ეკონომიკის არსებობა, რის საფუძველსაც სწორედ რომ ბიზნესი ქმნის.

მათივე განცხადებით, ამის ფონზე, უკიდურესად მნიშვნელოვანია ხელისუფლებამ ხელი შეუწყოს ბიზნეს სექტორს, რომელიც, თავის მხრივ, პანდემიის გამო მნიშვნელოვნად დაზარალდა.

„ვიზიარებთ რა საქართველოს ბიზნეს ასოციაციის წევრი კომპანიების სამართლიან და ობიექტურ ინტერესებს, ვაცხადებთ, რომ დღეს ბიზნეს სექტორისთვის უმნიშვნელოვანესია ეკონომიკის სრული გახსნა და დაწესებული შეზღუდვების შემდგომი შემსუბუქება. უპირველეს ყოვლისა, კი აუცილებელია ღამის საათებში გადაადგილებაზე შეზღუდვის გაუქმება ან მისი სულ მცირე 2 საათით გადაწევა.

ღამის საათებში გადაადგილებაზე შეზღუდვის ამ შინაარსით არსებობა მნიშვნელოვნად ზრდის კომპანიების საოპერაციო ხარჯებს, არ იძლევა ეკონომიკური სარგებლის მიღების საშუალებას და შესაბამისად მძიმე ტვირთად აწვება და აუარესებს პანდემიის გამო კომპანიების ისედაც მძიმე ვითარებაში მყოფ ფინანსურ მდგომარეობას.

ღამის საათებში გადაადგილებაზე შეზღუდვის თუნდაც 23:00 საათამდე გადაწევა უაღრესად მნიშვნელოვანი გადაწყვეტილება იქნება იმისათვის, რომ ბიზნეს სუბიექტებმა თანდათანობით დაიწყონ ჩვეულებრივ რეჟიმში საქმიანობა და შეძლონ იმ ზარალის შემცირება, რომელიც უკანასკნელი თვეების განმავლობაში განიცადეს და დღესაც განიცდიან. აღნიშნული ასევე პირდაპირ პროპორციულ კავშირშია ბიზნეს სუბიექტების მიერ სამუშაო ადგილების შენარჩუნებისა და ახალი სამუშაო ადგილების შექმნასთან“, – აცხადებს საქართველოს ბიზნეს ასოციაციის პრეზიდენტი სოსო ფხაკაძე.

Share