Home » ახალი ამბები » სამტრედია-გრიგოლეთის პირველი მონაკვეთის მშენებლობა აქტიურად მიმდინარეობს
სამტრედია-გრიგოლეთის პირველი მონაკვეთის მშენებლობა აქტიურად მიმდინარეობს

სამტრედია-გრიგოლეთის პირველი მონაკვეთის მშენებლობა აქტიურად მიმდინარეობს

ჩქაროსნული ავტომაგისტრალის სამტრედია-გრიგოლეთის 11,5 კილომეტრიან მონაკვეთზე (პირველი ლოტი) მიმდინარე სამშენებლო სამუშაოები საავტომობილო გზების დეპარტამენტის თავმჯდომარის მოადგილემ ირაკლი ხერგიანმა დაათვალიერა.

როგორც “ინტრეპრესნიუსს” საავტომობილო გზების დეპარტამენტიდან აცნობეს, სამტრედია–გრიგოლეთის ტერიტორია ჭარბწყლიანი ნიადაგით ხასიათდება, რის გამოც აღნიშნული მონაკვეთის მშენებლობა თანამედროვე PVD ტექნოლოგიით მიმდინარეობს. აღნიშნული ტექნოლოგია გზის საფუძველ გრუნტში ვერტიკალური დრენაჟების მოთავსებას ითვალისწინებს, რაც ნიადაგიდან წყლის გამოდევნას უზრუნველყოფს და მომავალში გზის საფარის დეფორმაციის შესაძლებლობას ამცირებს.

პროექტი 4 ზოლიანი ასფალტ-ბეტონის გზის, 6 პარალელური ხიდის, 2 სატრანსპორტო კვანძის (გზაგამტარით) და ხელოვნური ნაგებობების მშენებლობას ითვალისწინებს.

ამ ეტაპზე მიმდინარეობს გზის საფუძვლის, ხელოვნური ნაგებობებისა და საკომუნიკაციო ქსელის მოწყობა.

ჩქაროსნული ავტომაგისტრალის აღნიშნული მონაკვეთი ქალაქ სამტრედიასა და სამტრედიისა და აბაშის მუნიციპალიტეტის სოფლებზე: ტოლებზე, გორმაღალაზე, პირველ მაისსა და გაუწყინარზე გადის.

საავტომობილო გზების დეპარტამენტის ინფორმაციით, პროექტის დასრულების შემდეგ გაუმჯობესდება ავტოტრანსპორტის უსაფრთხო გადაადგილება, შემცირდება საავტომობილო გადაზიდვების ხარჯი, რაც ხელს შეუწყობს სატრანზიტო მიმოსვლის ზრდას.

პროექტს, რომლის ღირებულება 153,5 მლნ. ლარია ევროპის საინვესტიციო ბანკის დაფინანსებით, უკრაინული კომპანია Road Building ALTCOM ახორციელებს.

ipn.ge

Share