Home » საზოგადოება » ”რუსთავი 2”-ის თანამშრომლები ლევან და გია ყარამანიშვილების შეთავაზებას უარით პასუხობენ
”რუსთავი 2”-ის თანამშრომლები ლევან და გია ყარამანიშვილების შეთავაზებას უარით პასუხობენ

”რუსთავი 2”-ის თანამშრომლები ლევან და გია ყარამანიშვილების შეთავაზებას უარით პასუხობენ

ტელეკომანია ”რუსთავი 2”-ის თანამშრომლები ძმებ ლევან და გია ყარამანიშვილების შეთავაზებას, წილების 40%-ის მათთვის გადაცემაზე უარით პასუხობენ. ამის შესახებ ”რუსთავი 2”-ის გენერალურმა დირექტორმა ნიკა გვარამიამ განაცხადა, რომელმაც არხის თანამშრომლების საპასუხო მიმართვა გააჟღერა.

როგორც მიმართვაშია აღნიშნული, წილების 40%-ის ტელეკომპანიის კოლექტივისთვის გადაცემა რეალურად სურათს ვერ შეცვლის, ვინაიდან აქციათა საკონტროლო პაკეტი მაინც ძმებ ყარამანიშვილების ხელში დარჩება.

”ჩვენი უარი ემყარება შემდეგ გარემოებებს: ამჟამად ყადაღის ქვეშ მყოფი ”რუსთავი 2”-ის წილების 40%-ის გადმოფორმება პრაქტიკულად განუხორციელებადია. ”რუსთავი 2”-ის წესდების თანახმად, წილების გამოდმოფორმებას სჭირდება ყველა მეწილის, მათ შორის 9% წილის მფლობელის, ნინო ნიჟარაძის თანხმობა, რაც არ არსებობს. შესაბამისად, წარმოდგენილი შემოთავაზება სამართლებრივი თვალსაზრისით წარმოადგენს ფიქციას, რაც სამწუხაროდ როგორც ჩანს ძმებ ყარამანიშვილებს მხედველობიდან გამორჩათ. რაც მთავარია, კომპანიის 40%-იანი წილის ფლობა, პრაქტიკულად, არ ცვლის საქმის ვითარებას, რამეთუ გადამწყვეტი ხმის უფლება ისევ რჩება ”ტელეკომპანია საქართველოს”, რომელიც კომპანიის საკონტროლო პაკეტს, 51%-იან წილს ფლობს. შესაბამისად, შემოთავაზება, იქიდან გამომდინარე, რომ ”ტელეკომპანია საქართველოც” ძმებ ყარამანიშვილებს ეკუთვნით, შინაარსობრივი თვალსაზრისითაც ფიქტიურია, ვინაიდან კოლექტივის ტელეკომპანიის მართვაში ჩართვის ვერანაირ გარანტიას ვერ ქმნის”, – განაცხადა ნიკა გვარამიამ.

ტელეკომპანია ”რუსთავი 2”-ის თანამშრომლები ძმებ ყარამანიშვილებს საპასუხო ინიციატივით მიმართავენ და სთავაზობენ, რომ მათ შპს ”ტელეკომპანია საქართველო” გადაეცეთ, რომელიც ”რუსთავი 2”-ის წილების საკონტროლო პაკეტს ფლობს. ”გადმოგვეცეს საკუთრებაში შპს ”ტელეკომპანია საქართველო”, რაც ერთადერთი გზაა, როგორც სამართლებრივად, ისე შინაარსობრივად, კომპანიაში საქმის ვითარების რეალურად და არა ფიქტიურად შესაცვლელად. შპს ”ტელეკომპანია საქართველო” არ არის დაყადაღებული. მის გასხვისებას არ სჭირდება მესამე პირთა თანხმობა და ის ფლობს საკონტროლო პაკეტს. ამის განხორციელების შემთხვევაში, საქართველოს ისტორიაში პირველად, მაუწყებლის მფლობელები თავად მისი თანამშრომლები გახდებიან, მათ მიერ საამისოდ შერჩეული პირების მეშვეობით. ამგვარი ნაბიჯის გადადგმით ასევე დასრულდება არაჯანსაღი და ხშირ შემთხვევაში, სრულიად უსაფუძვლო სპეკულაციები ”რუსთავი 2”-ის პარტიულ ან სხვაგვარ აფილაციებთან დაკავშირებით. ასევე, საფუძველი არ ექნება იმის მტკიცებას, რომ სარედაქციო პოლიტიკა ყალიბდება სხვა ადამიანების ჩარევით”, – განაცხადა გვარამიამ, რომელმაც ”რუსთავი 2”-ის თანამშრომლების მიმართვა გააჟღერა.

Share