Home » საზოგადოება » ლევან იოსელიანი საპენსიო სესხებზე საგნობრივ საუბარს თავს არიდებს

ლევან იოსელიანი საპენსიო სესხებზე საგნობრივ საუბარს თავს არიდებს

საპენსიო სესხები და მათზე რიცხული საპროცენტო განაკვეთი ის ერთ-ერთი მთავარი საკითხია, რასაც პარტიამ „მოქალაქეები“ იმთავითვე დიდი ყურადღება მიაქცია და საკუთარი აქტივობებით, იქნებოდა ეს საჯარო განცხადებები თუ აწ უკვე საპარლამენტო ინსტრუმენტების გამოყენება, ცდილობს ერთი მხრივ, რელურად არსებულ მწვავე სოციალურ პრობლემაზე საზოგადოების ყურადღების კონცენტრირებას და მეორე მხრივ საკუთარ პოლიტიკურ აქტივში ქულების დაწერას. ამაში ცუდი არაფერია. მაგრამ ცუდია, ის, როცა პარტიის ლიდერშიფი საკითხს მხოლოდ ზედაპირულად, ანუ პოპულისტურად და ზერელედ უდგება და პრობლემაზე საგნობრივ საუბარს უბრალოდ გაურბის.

სამწუხაროდ, ასე მოხდა „მოქალაქეების“ ერთ-ერთი ლიდერის, პარლამენტის ვიცე-სპიკერის, ლევან იოსელიანისა და „ბანკები და ფინანსების“ ურთიერთობაში.

აქვე ხაზი უნდა გაესვას, რომ საპენსიო საკითხები მაღალი საზოგადოებრივი ინტერესით სარგებლობს. შესაბამისად, პოლიტიკოსების მხრიდან მნიშვნელოვანია საკითხის ირგვლივ კონკრეტული განხილვა ისმოდეს და არა მხოლოდ პოლიტიკური განცხადებები, რომლებიც ხშირ შემთხვევაში საგნობრივი მსჯელობისგან სრულად დაცლილია.

ბატონ ლევანთან 8 სექტემბერს გამოქვეყნებული ინტერვიუს კვალდაკვალ, სადაც მან განაცხადა, რომ ამ ეტაპზე მისი ამოცანაა, „ლიბერთი ბანკმა” დაბალ პროცენტში მისცეს პენსიონერებს სესხი”, ბუნებრივია, გაჩნდა დამატებითი დამაზუსტებელი კითხვები და რედაქციამ სწორედ მათზე პასუხების მიზნით, კვლავ მიმართა პარტიის მედიასთან ურთიერთობის სამსახურს, საიდანაც, საბოლოო ჯამში, მივიღეთ პასუხი, რომ ბატონი ლევანი ამ საკითხებზე სასაუბროდ მოცლას ვერ მოახერხებდა.

არადა, ამ რამდენიმე კითხვაზე პასუხის გაცემა ნამდვილად შეუწყობდა ხელს იმას, რომ „მოქალაქეების“ პოზიცია საპენსიო სესხების საპროცენტო განაკვეთთან დაკავშირებით და იმაზე, თუ რა კონკრეტული გზებითა და ბერკეტებით ფიქრობენ ისინი ამ გამოწვევის დაძლევას, უფრო მკაფიო და საგნობრივი გამხდარიყო. თორემ იმის თქმას, რომ „ამოცანაა, „ლიბერთი ბანკმა” დაბალ პროცენტში მისცეს პენსიონერებს სესხი”, არაფერი უდგას წინ. საქმე ის არის, პასუხი გაეცეს კითხვას – როგორ? – ეს იქნებოდა სწორედ საკითხისადმი საგნობრივი მიდგომა და პრობლემის დაძლევისკენ რეალურად გადადგმული ნაბიჯი.

„ბანკები და ფინანსები“ აქვე წარმოგიდგენთ იმ საკითხებს, რომლებზეც ლევან იოსელიანთან გვსურდა საუბარი. ცხადია, ნებისმიერ დროს, როცა ბატონი ლევანი მოახერხებს ამ მწვავე სოციალური პრობლემის საგნობრივად განსახილველად სასაუბრად მოცლას, ჩვენ მზად ვართ მასთან ვრცელი ინტერვიუს ჩასაწერად და მკითხველისთვის მის გასაცნობად.

ეს კი საკითხები, რომლებზეც „მოქალაქეებს“ ვთხოვთ პოზიციის მკაფიოდ და არაოზრავნოვნად დაფიქსირებას.

* რა არის მთავარი პრობლემა, პენსიის მოცულობა თუ საპენსიო სესხი?

* აცხადებთ, რომ ე.წ. საპენსიო სესხზე რიცხული ეფექტური საპროცენტო განაკვეთი მაღალია. რა გაძლევთ ამის თქმის საფუძველს, რა კონკრეტულ კვლევებსა თუ მოკვლევებს ეყრდნობით?

* აქვს თუ არა „მოქალაქეებს“ შესწავლილი სადღეისოდ არსებული ვითარება საკრედიტო ბაზარზე, საპროცენტო განაკვეთების თვალსაზრისით. კონკრეტულად, საუბარია მსგავსი ტიპის სესხებზე, ანუ 1000 ლარამდე მოცულობის არაუზრუნველყოფილ კრედიტებზე, მათ შორის 60 წელს გადაცილებული დაუსაქმებელი ან/და თვითდასაქმებული მოქალაქეებისთვის?

* აქვს თუ არა „მოქალაქეებს“ გამოკვლეული, თუ რა კომპონენტები განაპირობებს ე.წ. საპენსიო სესხზე დღეს არსებულ საპროცენტო განაკვეთს. ანუ არსებულ განაკვეთში რა წილი წილი უჭირავს რეფინანსირების კომპონენტს, რა წილი უჭირავს დაზღვევის კომპონენტს, რა წილი უჭირავს საოპერაციო ხარჯის კომპონენტს, რა წილი უჭირავს მოგების მარჟას და სხვ?

* ე.წ. საპენსიო სესხთან დაკავშირებით „ლიბერთი ბანკის“ გაცხადებული პოზიციაა, რომ ეს არის ჩვეულებრივი სამომხმარებლო ტიპის, არაუზრუნველყოფილი სესხი, რომელიც გამოირჩევა განსაკუთრებით მაღალი რისკიანობით და სწორედ ეს ფაქტორები განაპირობებს მასზე რიცხული საპროცენტო განაკვეთის არსებულ მოცულობას, კერძოდ ეფექტურ 30,65%-ს. ეთანხმებით თუ არა „ლიბერთი ბანკის“ ამ პოზიციას?

* თქვენს მიერ გაკეთებული განცხადება, რომ „ამ ეტაპზე ჩემი (თქვენი) ამოცანაა, „ლიბერთი ბანკმა” დაბალ პროცენტში მისცეს პენსიონერებს სესხი”,  შეიცავს თუ არა მკაფიო სოციალისტურ ნარატივს და სცდება თუ არა საბაზრო ურთიერთობის წესებით განსაზღვრულ ჩარჩოებს?

* რომ იყოთ გადაწყვეტილების ერთპიროვნული და უპირობო მიმღები აღნიშნულ საკითხთან, ე.წ. საპენსიო სესხების საპროცენტო განაკვეთთან დაკავშირებით, როგორ მოიქცეოდით, რა გადაწყვეტილებას მიიღებდით? – დააწესებდით მოჭრილ პროცენტს და საბაზროსთან მიმართებით სხვაობას დაასუბსიდირებდით, უბრალოდ უბრძანებდით ბანკს, რომ კონკრეტულ ფიქსირებულ პროცენტზე მეტად არ გასცეს სესხი, საერთოდ აკრძალავდით მსგავსი ტიპის საკრედიტო ურთიერთობას, თუ რაიმე სხვა კონკრეტულ გამოსავალს იპოვნიდით?

* ახლა, როცა „მოქალაქეები“ არ ხართ გადაწყვეტილების ერთპიროვნულად და უპირობიდ მიმღებნი, რა არის თქვენი კონკრეტული გეგმა ე.წ. საპენსიო სესხების საპროცენტო განაკვეთის საკითხთან დაკავშირებით?

* მიგაჩნიათ თუ არა, რომ განცხადება – „ამ ეტაპზე ჩემი ამოცანაა, „ლიბერთი ბანკმა” დაბალ პროცენტში მისცეს პენსიონერებს სესხი”, თავისი ერთგვარად იმპერატიული ხასიათით გარკვეულწილად ანტი საბანკო ნარატივის შემცველი განცხადებაა, რომელიც მნიშვნელოვნად აზიანებს სექტორს, რომლის სიმყარეზეც დიდწილად დგას ქვეყნის ეკონომიკა?

* რა პოზიცია აქვთ „მოქალაქეებს“, – თავისუფალი ბაზრის პრინციპების დარღვევა და კერძო სექტორში ჩარევა აზიანებს თუ არა ჯანსაღ ეკონომიკურ პროცესებს?

სულ ეს იყო, რაზეც გვსურდა ბატონ ალეკოსთან, შემდგომ ბატონ ლევანთან, კიდევ უფრო შემდგომ, პარტიიდან ვინმე კომპეტენტურთან საუბარი. ვწუხვართ, რომ „მოქალაქეებმა“ მწვავე საკითხთან დაკავშირებით მსგავს საგნობრივ დისკუსიას მედიასთან თავი აარიდეს. რა თქმა უნდა, აქ მოცემული კითხვებზე „მოქალქეების“ პასუხების მიღების შემთხვევაში, მათ სიამოვნებით გავაცნობთ ჩვენს მკითხველს.

სალომე ალადაშვილ

Share