Home » ახალი ამბები » კომუნიკაციების კომისიის ორგანიზებით, 25-29 ოქტომბერს მედიაწიგნიერების კვირეული ჩატარდება

კომუნიკაციების კომისიის ორგანიზებით, 25-29 ოქტომბერს მედიაწიგნიერების კვირეული ჩატარდება

25-29 ოქტომბერს კომუნიკაციების კომისიის ორგანიზებით, საქართველოში პირველად მედიაწიგნიერების კვირეული ჩატარდება.

კომუნიკაციების კომისიის ინფორმაციით, მედიისა და ინფორმაციული წიგნიერების გლობალური კვირეული 2021 წელს გაერო-ს მიერ მიღებული რეზოლუციის ფარგლებში ტარდება. მედიაწიგნიერების კვირეულის მიზანია, გაერო-ს წევრ ქვეყნებში გაიზარდოს ცნობიერება მედიაწიგნიერების საჭიროებებისა და როლის შესახებ.

მედიაწიგნიერების კვირეულში კომუნიკაციების კომისიასთან ერთად ჩართულია განათლებისა და მეცნიერების სამინისტრო, მასწავლებელთა პროფესიული განვითარების ეროვნული ცენტრი, საინფორმაციო ცენტრი ნატო-სა და ევროკავშირის შესახებ, გაეროს ბავშვთა ფონდი – იუნისეფი, ევროკავშირი, საერთაშორისო ექსპერტები, არასამთავრობო ორგანიზაციები, უნივერსიტეტები და სკოლები.

კვირეულის ფარგლებში, საერთაშორისო პარტნიორებისა და ექსპერტების მონაწილეობით ჩატარდება ორი კონფერენცია, რომელთა მიზანია ისეთი აქტუალური საკითხების განხილვა, როგორიცაა დეზინფორმაცია, უსაფრთხო ინტერნეტი, სიძულვილის ენა, სიტყვის თავისუფლება და მედიის მიუკერძოებლობის სტანდარტები. ასევე, შეჯამდება მედიაწიგნიერების მიმართულებით საქართველოში განხორციელებული საქმიანობა და პროექტები.

გარდა კონფერენციებისა, მედიაწიგნიერების კვირეულის ფარგლებში განხორციელდება სხვადასხვა საგანმანათლებლო და ცნობიერების ასამაღლებელი ღონისძიება მოსწავლეების, სტუდენტებისა და პედაგოგებისთვის თბილისსა და რეგიონებში.

Share