Home » საზოგადოება » ჯანდაცვის საყოველთაო პროგრამაში ცვლილებები 1 მარტს ამოქმედდება
ჯანდაცვის საყოველთაო პროგრამაში ცვლილებები 1 მარტს ამოქმედდება

ჯანდაცვის საყოველთაო პროგრამაში ცვლილებები 1 მარტს ამოქმედდება

ცნობილი გახდა იმ ცვლილებების დეტალები, რომელიც საყოველთაო ჯანდაცვის პროგრამაში შედის. პროექტი მთავრობის სხდომაზე განიხილეს. ცვლილების მიხედვით, 2017 წლის 1 ივლისიდან საყოველთაო და კერძო პაკეტები ერთმანეთისგან გაიმიჯნება. როგორც ხელისუფლებაში აცხადებენ, ამის განხორციელება მონაცემთა ბაზების განახლების შემდეგ გახდა შესაძლებელი.

თავიდანვე, 2013 წლის 1 ივლისიდან, საყოველთაო ჯანდაცვის პროგრამის მოსარგებლეებად განისაზღვრნენ პირები, რომლებსაც, 2013 წლის 1 ივლისის მდგომარეობით, არ ჰქონდათ კერძო დაზღვევა, ხოლო ის პირები, რომლებიც, 1 ივლისის მდგომარეობით, კერძო დაზღვევით სარგებლობდნენ, ვერ გახდნენ საყოველთაო ჯანდაცვის პროგრამის ბენეფიციარები.

როგორც სამინისტროში აცხადებენ, პრინციპი უცვლელი რჩება: 2013 წლის 1 ივლისის მონაცემებით, ბაზების განახლებამდე კერძო დაზღვევით სარგებლობდა 500 ათასამდე პირი ( 496 061 ), თუმცა შემდეგ ნაწილი, ვისაც ამა თუ იმ მიზეზით კერძო დაზღვევა შეუწყდა ( მაგალითად, დაკარგეს სამსახური და ა.შ ), გახდნენ საყოველთაო ჯანდაცვის პროგრამის მხოლოდ მინიმალური პაკეტით მოსარგებლეები (დაახლოებით, 120 000 ადამიანი),ერთ ნაწილს კი, ვინც 2013 წლის 1 ივლისისთვის არ ფიქსირდებოდა კერძო დაზღვეულთა შორის და შემდეგ აიღო პოლისი, ე.წ. ორმაგი დაზღვევა გაუჩნდა.

ამ მოცემულობის შესაბამისად, სამინისტროს განცხადებით, დღის წესრიგში დადგა 2013 წლის 1 ივლისის მდგომარეობით არსებული სიების განახლება პროგრამის შემდგომი რეფორმირებისთვის და მისი ძირეული მიზნის მისაღწევად, რაც გულისხმობს საყოველთაოობას და არადაზღვეული მოსახლეობისთვის ჯანდაცვის სერვისებზე ხელმისაწვდომობას.

ხელისუფლების ვერსიით, ცვლილების შედეგი ასეთია: 2013 წლის 1 ივლისიდან დღემდე 120 ათასამდე (115 771 ) პირს, ვისაც არ ჰქონდა კერძო დაზღვევა და სარგებლობდა საყოველთაო ჯანდაცვის მხოლოდ მინიმალური პაკეტით, მიეცემა საშუალება გახდეს საბაზისო ( ანუ სრული ) პაკეტის მომხმარებელი. მეორე მხრივ, წარმოდგენილი ცვლილებით, ე.წ. „საბაზისო პაკეტით“ მოსარგებლეები, ნაცვლად 2013 წლის 1 ივლისისა, ხდებიან 2017 წლის 1 იანვრის მდგომარეობით დაზღვევის არმქონე პირები. ანუ ვინც ორმაგი დაფინანსებით სარგებლობდა ( კერძო და საყოველთაო), გაიმიჯნება და დარჩება მხოლოდ კერძო დაზღვევის მფლობელი.

გარდა ამისა, ხელისუფლება ამბობს, რომ ბენეფიციართათვის პირობების გაუარესების თავიდან ასაცილებლად ამ დადგენილების ამოქმედებამდე ე.წ. „საბაზისო“ ან „მინიმალური“ პაკეტის ფარგლებში დამდგარი პროგრამული შემთხვევები, რომლებიც ამ პერიოდისთვის არ დასრულებულა, ანაზღაურდება იმავე პაკეტის შესაბამისად, რომლითაც დაიწყო მომსახურება, ხოლო გეგმიურ მომსახურებაზე გაცემული საგარანტიო ფურცელი ვალიდური რჩება ვადის ამოწურვამდე.

პროექტით გათვალისწინებული ცვლილებები ამოქმედდება 2017 წლის 1 მარტიდან. ჯანდაცვის სამინისტროს მიერ გავრცელებულ ინფორმაციაში არ არის ნათქვამი, რა მოხდება იმ შემთხვევაში, თუ პირი სამსახურს და კერძო დაზღვევას წლის რომელიმე შუა თვეში, მაგალითად, 2017 წლის აპრილში ან ივნისში დაკარგავს.

ჯანდაცვის მინისტრის დავით სერგეენკოს განცხადებით, თანხა, რომელსაც სახელმწიფო ხარჯავს თავისი მოქალაქეების ჯანმრთელობაზე, მაქსიმალურად ეფექტურად უნდა იყოს გამოყენებული. თანხის მაქსიმალური რაოდენობა უნდა მივიდეს პაციენტამდე და მოემსახუროს იმას, რომ მოქალაქეებმა მიიღონ მაღალი ხარისხის სამედიცინო დახმარება.

„ასევე გათვალისწინებული უნდა იყოს ასეთი სტრუქტურებისა და ჯანდაცვის სისტემის თანამშრომლობის საერთაშორისო პრეცედენტები. ჩვენ გვაქვს კონკრეტული სამუშაო გეგმა, რომელსაც ძალიან მალე ავამოქმედებთ. ის რეალურად დიდ პოზიტიურ გავლენას იქონიებს ჩვენი ქვეყნის ჯანდაცვის სისტემის, აგრეთვე თითოეული მოქალაქის ჯანმრთელობის დაცვის ეფექტურობის ამაღლებაზე“, – განაცხადა სერგეენკომ.

„ჩვენთვის პრინციპულად მნიშვნელოვანია, რომ ბიუჯეტი, რომელიც გამოყოფილია მაქსიმალურად მოხმარდეს ჩვენს მოქალაქეებს. შესაბამისად, საყოველთაო ჯანდაცვა, რომლითაც ჩვენ ყველანი ვამაყობთ, რა თქმა უნდა, ასეთი უნდა იყოს. ამიტომ ჩვენ შევქმენით სამუშაო ჯგუფი, რომელიც ამ მიმართულებით ძალიან ბევრ ქმედებას განახორციელებს“, – განაცხადა ფინანსთა მისიტრმა დიმიტრი ქუმსიშვილმა.

ზოგადად 2017 წელი საყოველთაო ჯანდაცვის სისტემაში მნიშვნელოვანი ცვლილებით დაიწყო. თებერვლიდან სახელმწიფო დაზღვევას ის კლინიკები გამოეთიშნენ, რომლებიც ვერ უზრუნველყოფდნენ სამინისტროს მიერ შემუშავებული კრიტერიუმების შესრულებას.

პარლამენტის ჯანდაცვისა და სოციალურ საკითხთა კომიტეტის თავმჯდომარის მოადგილის დიმიტრი ხუნდაძის განმარტებით, პროგრამაში ჩართული კლინიკების შემოწმების პროცესი წელიწადნახევრის წინ დაიწყო.

„ჯანდაცვის სამინისტრომ 1,5 წლის წინ დაიწყო მონიტორინგი და იყო რეკომენდაციის მექანიზმები. ბევრმა კლინიკამ ეს გაითვალისწინა, მაგრამ ზოგიერთმა კლინიკამ არ გაითვალისწინა, ანუ ისინი ვერ ასრულებენ მოთხოვნებს, რასაც სახელმწიფო აყენებს. ასეთ შემთხვევაში, თუკი ისინი ვერ უზრუნველყოფენ მაღალი სამედიცინო მომსახურეობის მიწოდებას მოსახლეობისათვის, რა თქმა უნდა, ეთიშებიან პროგრამას“, – განაცხადა ხუნდაძემ.

რაც შეეხება სადაზღვევო ინდუსტრიას, ის საქართველოს მთავრობის 9 თებერვალს მიღებული #73 დადგენილების შეჩერებას ითხოვს. ინდუსტრიამ N73-ე დადგენილების გავლენის თაობაზე პრესკონფერენცია გამართა.

“კერძო დაზღვევით მოსარგებლეთა მნიშვნელოვანი ნაწილი სარგებლობს ე.წ. „დაშენებული“ პაკეტით, რაც მხოლოდ შეზღუდულ სერვისებს ითვალისწინებს და არ ფარავს მსხვილ სამედიცნო ხარჯებს. ეს დაზღვეულები დარჩებიან ხშირად კატასტროფული ხარჯების დაფინანსების გარეშე, რომლებიც მაგალითად დაკავშირებულია ჰოსპიტალურ და ონკოლოგიურ სამედიცინო სერვისებთან.

მნიშვნელოვანია ასევე ის, რომ დადგენილება ითვალისწინებს პროგრამიდან გამიჯვნას უკანა თარიღით, რაც იმას ნიშნავს, რომ დაზღვევის მოსარგებლეები, ყოველგვარი გაფრთხილების გარეშე, აღმოჩნდებიან ამ მდგომარეობაში და მათ არ ექნებათ რაიმე თადარიგის დაჭერის შესაძლებლობა. სადაზღვევო კომპანიებს მოუწევთ მოქმედი სადაზღვევო კონტრაქტების გადახედვა, რაც ასევე უარყოფითად აისახება დაზღვეულებზე.

სადაზღვევო ინდუსტრია მიიჩნევს, რომ ეს მიდგომა მნიშვნელოვან სისტემურ პრობლემას წარმოადგენს სამომავლოდაც – ბაზრიდან გაქრება ე.წ. „დაშენებული“ სადაზღვევო პროდუქტები და 3 მილიონზე მეტი მოქალაქე დარჩება მხოლოდ საყოველთაო ჯანდაცვის პროგრამის ამარა. მათ მოუწევთ ჯიბიდან გადაიხადონ ყველა იმ სამედიცინო სერვისის თანხები, რომელიც საყოველთაო ჯანდაცვის სახელმწიფო პროგრამით არ ფინანსდება (მაღალტექნოლოგიური კვლევები, მედიკამენტები, სტომატოლოგია და სხვა).

ჩვენი აზრით აღნიშნული დადგენილება სტიმულს მისცემს უამრავ ადამიანს გააუქმოს კერძო დაზღვევა ან აღარ შეიძინოს ინდივიდუალური პაკეტი, რაც გამოიწვევს დაზღვეულების გადადინებას საყოველთაო ჯანდაცვის სახელწმიფო პროგრამაში და შედეგად საბიუჯეტო დანახარჯების ზრდას”, – ნათქვამია სადაზღვევო ინდუსტრიის მიერ გავრცელებულ განცხადებაში.

სადაზღვევო ინდუსტრია მიმართავს საქართველოს მთავრობას, შეჩერდეს ან გადაიხედოს აღნიშნული დადგენილება:

– გათვალისწინებული იქნეს იმ ბენეფიციართა ინტერესები, რომლებიც რჩებიან მსხვილი კატასტროფული რისკების დაფინანსების გარეშე;
– შენარჩუნდეს ე.წ. დაშენებული პაკეტები, რათა საყოველთაო ჯანდაცვის პროგრამის ბენეფიციარები არ დარჩნენ მხოლოდ პროგრამის ამარა და არ მოუწიოთ ყველა სხვა სერვისში თანხების ჯიბიდან გადახდა და/ან სახელმწიფო დახმარების მოთხოვნა;
– აქტიურად გაგრძელდეს მუშაობა საყოველთაო ჯანდაცვის განვითარებაზე ღია პლატფორმის ფარგლებში, რათა შეთანხმებულ იქნას საქართველოში უნივერსალური ჯანდაცვის (ბაზისურ სამედიცინო სერვისებზე უნივერსალური წვდომის) განხორციელების ეფექტური და ეფექტიანი გეგმა.

ელენე ციგრიაშვილი

Share