BFM.GE ბანკები და ფინანსები
„ისთ გეით ჯგუფის“ სამეთვალყურეო საბჭოს თავმჯდომარე ირაკლი იაშვილი „ბიზნესპარტნიორთან“ აცხადებს, რომ ქვეყანაში მესამე „ლოქდაუნის“ გამოცხადების შემთხვევაში სერიოზულად დადგება გაღარიბების პრობლემა.
მისი განმარტებით, ეს ასევე ნეგატიურად აისახება ლარის კურსზე, რადგან მოთხოვნა-მიწოდება, ე.წ ბალანსი, რომელიც იყო 2 წლის წინ, დაირღვა, აირია ბაზარზე არსებული წონასწორობა, როგორც სავალუტო, საფინანსო, ისე სამომხმარებლო.
„ეს რეალურად შეცვლის მდგომარეობას, უკეთესობისკენ რომ არ შეცვლის, ფაქტია. ამ ფონზე სუბიექტური მიზეზების დამატება, სრულიად წარმოუდგენელია,“ – აცხადებს იაშვილი.
გამოსავალს „ისთ გეით ჯგუფის“ სამეთვალყურეო საბჭოს თავმჯდომარე მასობრივ ვაქცინაციაში ხედავს. მისი ინფორმაციით, აუცილებელია ქვეყანაში მოსახლეობის 70%-მდე აიცრას, წინააღმდეგ შემთხვევაში სიტუაცია არ გამოსწორდება.
„ვაქცინაციის გარეშე ვირუსი არ გაქრება. პროპაგანდა ცოტა დააკლეს აშკარად, ჯანდაცვის სამინისტროს ცოტა მეტი უნდა ემუშავა, შეეექმნა ვიდეო რგოლები და ახსნა-განმარტებითი სამუშაოები ჩაეტარებინა, ეგონათ, რომ ხალხი რიგში ჩადგებოდა ვაქცინაციისთვის. მით უმეტეს, ამას ტრაგიკული შემთხვევაც დაემთხვა. ამიტომ, მოსახლეობასთან გაათმაგებული მუშაობაა საჭირო. სხვანაირად პანდემია როგორ უნდა დავამარცხოთ?!“ – აცხადებს იაშვილი.
აღსანიშნავია, რომ შეზღუდვების ახალ ტალღაზე საუბარი ბოლო დღეებია საკმაოდ აქტიურად მიმდინარეობს.
business-partner.ge
