Home » ბიზნესი » გაძვირდება თუ არა ბინები თბილისის ცენტრში

გაძვირდება თუ არა ბინები თბილისის ცენტრში

რას გულისხმობს K2 კოეფიციენტის გაზრდის შეზღუდვა

თბილისის მერიის გადაწყვეტილებით, დედაქალაქის ტერიტორიების გამოყენება-განაშენიანების წესები იცვლება. ერთ-ერთი ყველაზე მნიშვნელოვანი ცვლილება სამშენებლო კომპანიებისთვის თბილისის ცენტრალურ და ისტორიულ უბნებში K2 კოეფიციენტის გაზრდის შეზღუდვაა.

”ჩვენ მივიღეთ გადაწყვეტილება, რომლის თანახმადაც, ქალაქის ცენტრალურ ნაწილში წესდება დროებითი შეზღუდვა საცხოვრებელ სახლებზე K2 კოეფიციენტის გაზრდასთან დაკავშირებით, რაც საშუალებას მოგვცემს, შევცვალოთ წლების განმავლობაში დამკვიდრებული მანკიერი პრაქტიკა – თბილისის ცენტრალური და ისტორიული ნაწილის ქაოტური განაშენიანება, ისედაც მჭიდრო დასახლებებში”, – განაცხადა დავით ნარმანიამ. ამ სიახლის შესახებ გაზეთი ,,ბანკები და ფინანსები” დეველოპერებს დაუკავშირდა. პოზიციის დაფიქსირება ,,საქართველოს მენაშენეთა ასოციაციის” პრეზიდენტ ირაკლი როსტომაშვილსა და კომპანია ,,არსის” აღმასრულებელ დირექტორ თორნიკე აბულაძეს ვთხოვეთ.

13249396_1012982418783767_1102012173_n

ირაკლი როსტომაშვილი

,,საქართველოს მენაშენეთა ასოციაციის” პრეზიდენტი

ხშირად ისმის რომ მერია ცენტრალურ უბნებში მშენებლობის შეზღუდვას ცდილობს. ეს ასე არ არის, ყველას შეუძლია აშენოს რაც უნდა, მხოლოდ იმ ნორმების ფარგლებში, რაც დადგენილია კონკრეტული ტერიტორიისთვის. მერიამ შეზღუდა K2 კოეფიციენტის მომატების სამწუხარო პრაქტიკა, რომელიც წინა ხელისუფლების დროს დამკვიდრდა; და თუკი სამშენებლო კომპანიას რომელიმე მშენებლობისთვის K2 ექნება 3, ის ვეღარ შეძლებს რაიმე მაქინაციით ამ მაჩვენებლის გაზრდას. რა თქმა უნდა მერიის ეს ნაბიჯი დადებითად უნდა შეფასდეს, მაგრამ, მე თუ მკითხავთ, დაგვიანებულიცაა.

რაც შეეხება აზრს, რომ შესაძლოა შეზღუდვამ ფასების ზრდა გამოიწვიოს, არ ვეთანხმები. პირიქით, კი არ გაიზრდება, ფასები საცხოვრებელ სახლებზე შემცირდება. ნებისმიერი საღად მოაზროვნე კომპანია ეცდება, მშენებლობა დაიწყოს თბილისის არაცენტრალურ უბნებში. საშენი მასალებისა და მუშახელის თვალსაზრისით, მშენებლობას გლდანში და ვერაზე ერთი და იგივე ხარჯი სჭირდება. საცხოვრებელზე ფასის სხვაობა კი განპირობებულია ამ ორ რაიონში მიწის ფასის სხვაობით. ცენტრალურ უბნებში მშენებლობებზე გარკვეული შეზღუდვა ქალაქის დანარჩენი ნაწილის კაპიტალიზაციას გამოიწვევს და დაარეგულირებს და გარკვეულწილად შეამცირებს საცხოვრებელი ბინების ფასებს.

13250322_1012982415450434_1341107814_n

თორნიკე აბულაძე 

კომპანია ,,არსის” აღმასრულებელ დირექტორი

სამშენებლო კანონში ცვლილებების შეტანისას ჩვენ მერიის წარმომადგენლებთან რამდენიმე საინტერესო შეხვედრა გვქონდა. ,,მენაშენეთა ასოციაცია”, რომლის თავმჯდომარე კომპანიასაც ამ ეტაპზე ,,არსი” წარმოადგენს, აბსოლუტურად ვეთანხმებით და მხარს ვუჭერთ K2 კოეფიციენტის შესაღებ მიღებულ ცვლილებებს. თუმცა, მთლიანად ამ კანონ-პროექტში არის რაღაც დეტალები, რომელსაც ჩვენ არ ვეთანხმებით, მაგალითად ,,განაშენიანების ესთეტიკური პარამეტრების რეგულირება”, რომელის თანახმადაც იკრძალება შენობების გადახურვა მეტალო-კრამიტით, თუნუქით, ნებისმიერი სახის შიფრით და ა.შ. ეს აკრძალვა რომ ეხებოდეს მხოლოდ ძველ თბილის, სადაც დაბალი განაშენიანებაა აბსოლუტურად დავეთანხმებოდი, მაგრამ მთლიანად აკრძალვა იმ მასალისა, რომლის წარმოებაც დღეს საქართველოში გვაქვს, ჩემი აზრით, არ შეიძლება. იმედი გვაქვს რომ საკრებულოს განხილვებში ჩვენს აზრსაც გაითვალისწინებენ. რაც შეეხება K2 კოეფიციენტს, მისი მომატება ხდებოდა ქაოსურად. რა თქმა უნდა, არსებობს გამონაკლისი შემთხვევები, როდესაც დასაშვებია სამშენებლო კომპანიამ მერიას მიმართოს ამ მაჩვენებლის გასაზრდელად, მაგრამ ჩვენს რეალობაში მთელი თბილისი ასეთი ,,განსაკუთრებული შემთხვევა” აღმოჩნდა. სწორედ ამის მოწესრიგებას ემსახურება K2-ის ფიქსირებული მაჩვენებლის გაზრდის აკრძალვა.

ჩვენ მივესალმებით რეგულაციებს, რომლებიც წინ წაწევს ქალაქს; მაგრამ რეგულაციებს, რომლებიც არაფრისმომტანია და მხოლოდ დამატებით შეზღუდვებს წარმოადგენს, არ ვეთანხმებით.
რაც შეეხება საცხოვრებელი ბინების ფასებს, არამგონია აღნიშნულმა ცვლილებებმა მათი ცვლილება გამოიწვიოს. უკიდურეს შემთხვევაში შეიძლება ფასმა მცირედით მოიმატოს.

ავტორი: ეკა ტკაჩენკო

Share