Home » ფინანსები » აზიის განვითარების ბანკი „საქართველოს რკინიგზის“ მწვანე ობლიგაციებში 20 მლნ დოლარის ინვესტიციას ახორციელებს

აზიის განვითარების ბანკი „საქართველოს რკინიგზის“ მწვანე ობლიგაციებში 20 მლნ დოლარის ინვესტიციას ახორციელებს

აზიის განვითარების ბანკმა სს „საქართველოს რკინიგზის“ მიერ გამოშვებულ მწვანე ობლიგაციებში 20 მილიონი აშშ დოლარის ინვესტირება განახორციელა.

აზიის განვითარების ბანკის ინფორმაციით, მიღებული თანხა მოხმარდება ტირაჟირებული ევრობონდების რეფინანსირებას, რომელიც რკინიგზის ხაზების გაუმჯობესებისთვის იქნა გამოშვებული და მიმდინარე მოდერნიზაციის შემადგენელი ნაწილია.

მათივე ცნობით, ADB-ის ინვესტიცია წარმოადგენს „საქართველოს რკინიგზის“ მიერ გამოშვებული 500 მილიონი აშშ დოლარის ღირებულების შვიდწლიანი მწვანე ობლიგაციების ნაწილს. ეს საქართველოს სახელმწიფოს კუთვნილებაში არსებული ორგანიზაციის და ამავდროულად სატრანსპორტო კომპანიის მიერ გამოშვებული პირველი მწვანე ობლიგაციაა საქართველოსა და სამხრეთ კავკასიაში და განთავსდება ლონდონის საფონდო ბირჟაზე.

როგორც ADB-ის კერძო სექტორის ოპერაციების დეპარტამენტის სამხრეთ, ცენტრალურ და დასავლეთ აზიის ინფრასტრუქტურის დაფინანსების დირექტორმა, შანტანუ ჩაკრაბორტიმ განაცხადა, საქართველო ევროპისა და აზიის გასაყარზე მდებარეობს და მნიშვნელოვან სავაჭრო და სატრანსპორტო დერეფანს ქმნის.

როგორც ADB-ის მუდმივი წარმომადგენლობის დირექტორმა საქართველოში, შეინ როზენტალმა აღნიშნა, ობლიგაციების გამოშვებაში მხარდაჭერას წინ უძღოდა ADB-ის ტექნიკური დახმარება, რომელიც საქართველოს რკინიგზის მგზავრთა მომსახურების დაგეგმვის გაუმჯობესებას ისახავს მიზნად.

„მწვანე ობლიგაციების გამოშვება „საქართველოს რკინიგზას“ საშუალებას მისცემს განაგრძოს სარკინიგზო ქსელის მოდერნიზაცია, რადგან ქვეყნის, ისევე როგორც რეგიონის ეკონომიკისთვის სასიცოცხლოდ მნიშვნელოვანია უფრო სწრაფი და უსაფრთხო სარკინიგზო ტრანსპორტი“,-აღნიშნავს ის.

„საქართველოს რკინიგზის“ აღმასრულებელმა დირექტორმა დავით ფერაძემ აღნიშნა, რომ ტრანზაქციამ ინვესტორების დიდი ყურადღება მიიპყრო.

„მოხარული ვარ, რომ პირველად საქართველოს ტრანსპორტის ორგანიზაციების ისტორიაში, საქართველოს რკინიგზამ მწვანე ობლიგაციები გამოუშვა. ტრანზაქციამ ინვესტორების დიდი ყურადღება მიიპყრო, რაც პანდემიით გამოწვეულ ამ უჩვეულო ვითარებაში საქართველოს რკინიგზას კაპიტალურ ბაზრებზე წვდომაში დაეხმარება. მადლობას ვუხდით ADB-ის, რომელმაც როგორც წამყვანმა ინვესტორმა, მნიშვნელოვანი როლი შეასრულა“, – აცხადებს დავით ფერაძე.

აზიის განვითარების ბანკის ინფორმაციით, „საქართველოს რკინიგზა“ ერთადერთი სარკინიგზო კომპანიაა საქართველოში და მისი 100%-იანი წილის მფლობელია საპარტნიორო ფონდი — საქართველოს სახელმწიფო საკუთრებაში არსებული საინვესტიციო ფონდი. „საქართველოს რკინიგზა“ ახორციელებს ტვირთების გადაზიდვას, სხვადასხვა სახის ტრანსგადაზიდვას უმეტესად კასპიის ზღვიდან და ცენტრალური აზიიდან შავ ზღვამდე.

ის ასევე უზრუნველყოფს ადგილობრივ და საერთაშორისო მგზავრთა მომსახურებას. მისივე ცნობით, ADB-ის მიზანია, ხელი შეუწყოს აზიისა და წყნარი ოკეანის რეგიონის წარმატებულ, მრავალმხრივ, მედეგ და მდგრად განვითარებას. ამავდროულად, ის კვლავაც აგრძელებს მუშაობას რეგიონში უკიდურესი სიღარიბის აღმოსაფხვრელად.

1966 წელს დაარსებული ორგანიზაცია აერთიანებს 68 ქვეყანას, მათ შორის 49 აზიის რეგიონიდანაა წარმოდგენილი.

Share