„გირჩი” პარლამენტში საგამოძიებო კომისიის შექმნას ითხოვს, რომელიც „ეროვნული ბანკისა და კომერციული ბანკების შეთანხმებულ ქმედებას გამოიძიებს“

0
122

„გირჩი” პარლამენტში საგამოძიებო კომისიის შექმნას ითხოვს, რომელიც „ეროვნული ბანკისა და კომერციული ბანკების შეთანხმებულ ქმედებას გამოიძიებს“. ამის შესახებ პარლამენტში გამართულ ბრიფინგზე დეპუტატმა სანდრო რაქვიაშვილმა განაცხადა.

მისი თქმით, აუცილებელია შეიქმნას კომისია, რომელიც ეროვნული ბანკის პრეზიდენტის უფლებამოსილების ბოროტად გამოყენებასა და ფასების სტაბილურობის დარღვევის მიზანმიმართულ ქმედებას შეისწავლის.

„გირჩის“ დადგენილების პროექტის მიხედვით, პარლამენტში შეიქმნება დროებითი საგამოძიებო კომისია, რომელიც 3 თვის განმავლობაში საქმის შესწავლის ფარგლებში საჯაროდ გამოკითხავს საქმესთან აფილირებულ პირებს, შეიმუშავებს რეკომენდაციებს, გამოაქვეყნებს შესაბამის დასკვნას და საჭიროების შემთხვევაში მოახდენს შესაბამის რეაგირებას.

“2020-2021 წლებში საქართველოს ეროვნულმა ბანკმა მნიშვნელოვნად გაზარდა ფულის მიწოდება, რაც 2021 წლის მეორე ნახევარში ორნიშნა ინფლაციაში გამოიხატა. გაზრდილი ფულის მიწოდების პირობებში, კომერციულმა ბანკებმა რეკორდული მოგება მიიღეს. იმის გათვალისწინებით, რომ კომერციული ბანკების და მათთან აფილირებული ორგანიზაციების წარმომადგენლები მთელი ეს პერიოდი ეროვნული ბანკის პოლიტიკას იცავდნენ, არსებობს საფუძვლიანი ეჭვი, რომ ეროვნულ ბანკზე კონსტიტუციით დაკისრებული ვალდებულება – ფასების სტაბილურობის უზრუნველყოფა უგულებელყოფილი იყო საბანკო სისტემის სუბსიდირებისთვის.

სახეზეა კონსტიტუციის 68-ე მუხლის დარღვევა, რაც ვალდებულებას უჩენს პარლამენტს, გამოიძიოს აღნიშნული გადაწყვეტილებების გარემოებები,”- განმარტავენ “გირჩში”.

რაქვიაშვილმა ყველა საპარლამენტო პარტიას მოუწოდა მხარდაჭერისკენ. როგორც მან აღნიშნა, მას ჰქონდა გარკვეული კონსულტაციები და როგორც იცის, ოპოზიციის უმრავლესობა მხარს უჭერს, დანარჩენ ნაწილს კი ჯერ გადაწყვეტილება არ მიუღია, ამიტომ სექტემბრამდე დარჩენილ პერიოდს გამოიყენებს იმისთვის, რომ ისინი კომისიის შექმნის აუცილებლობაში დაარწმუნოს.