“ცენტრალური ბანკების მიერ გამოშვებული ციფრული ვალუტები უფრო მეტ საიმედოობას გვთავაზობს”

0
25

“ცენტრალური ბანკების მიერ გამოშვებული ციფრული ვალუტები უფრო მეტ საიმედოობას გვთავაზობს”, – ამის შესახებ საქართველოს ეროვნული ბანკის პრეზიდენტმა, კობა გვენეტაძემ Euromoney-ის ცენტრალური და აღმოსავლეთ ევროპის ყოველწლიურ ფორუმში მონაწილეობისას განაცხადა.

ეროვნული ბანკის პრეზიდენტმა მონაწილეობა მიიღო დისკუსიაში – “ცენტრალური ბანკის ციფრული ვალუტა: როგორ და რატომ?”. საქართველოს ეროვნული ბანკის პრეზიდენტმა ისაუბრა ციფრული ვალუტის მნიშვნელობაზე  და ყურადღება გაამახვილა ციფრული ლარის განვითარების მიმართულებით ეროვნული ბანკის მიერ გადადგმულ ნაბიჯებზე.

“ფინანსური ჩართულობა ნამდვილად შეიძლება ცენტრალური ბანკის ციფრული ვალუტის (CBDC) ერთ-ერთ უპირატესობად ჩაითვალოს. თანამედროვე ტექნოლოგიები ბევრად უფრო სწრაფ და ხელმისაწვდომ სერვისს გვთავაზობს, ვიდრე ტრადიციული საბანკო სერვისები; ასევე არსებობს ციფრული ვალუტით ინტერნეტის გარეშე სარგებლობის საშუალებები.

შესაბამისად, მოსახლეობის იმ ნაწილზე წვდომა, რომელიც ამ შესაძლებლობას მოკლებულია, უფრო მარტივდება. თუმცა, საქართველოსთვის ფინანსური ჩართულობა  CBDC-ის   მთავარი სარგებელი  ნამდვილად არ არის.  ცენტრალური ბანკის ციფრული ვალუტის ერთ-ერთი მთავარი ღირებულებაა, რომ ის თანამედროვე ტექნოლოგიებს იმგვარად იყენებს, რომ საბოლოო მომხმარებლებისთვის ფინანსური მომსახურება უფრო ეფექტიანი, იაფი და მარტივი გახადოს და არა-ფინანსურ სექტორში ზოგიერთი პროცესიც კი ჩაანაცვლოს  მაგალითად, როგორიცაა ქონების რეგისტრაცია.

ამასთან, დარწმუნებული ვარ, რომ ამ ვალუტების მთავარი მახასიათებელი, რომელიც ინვესტორებს იზიდავს, მათი ანონიმურობა და სპეკულაციური ბუნებაა. მეორე მხრივ, CBDC-ებმა იგივე ან მსგავსი ტექნოლოგიით მეტი გამჭვირვალობა და ღირებულების მეტი სტაბილურობა უნდა უზრუნველყოს. ნებისმიერი აქტივი ფულად რომ ჩაითვალოს, ღირებულების მარაგი უნდა უზრუნველყოს. აშკარაა, რომ ცენტრალური ბანკების მიერ გამოშვებული ვალუტები უფრო მეტ საიმედოობას გვთავაზობს,“ – განაცხადა კობა გვენეტაძემ.

24-25 მაისს, Euromoney-ის ცენტრალური და აღმოსავლეთ ევროპის ყოველწლიურ ფორუმი ჩატარდა. შეხვედრას ესწრებოდნენ  ინვესტორები, პოლიტიკოსები, ფინანსისტები და ცენტრალური ბანკის მმართველები სხვადასხვა ქვეყნიდან.