Home » საზოგადოება » უკრაინა საქართველოს ეროვნული ბანკის გამოცდილების გაზიარებას იწყებს
უკრაინა საქართველოს ეროვნული ბანკის გამოცდილების გაზიარებას იწყებს

უკრაინა საქართველოს ეროვნული ბანკის გამოცდილების გაზიარებას იწყებს

საქართველოს უკრაინის ეროვნული ბანკის პრეზიდენტი, იაკივ სმოლი ეწვია, – ამის შესახებ „ინტერპრესნიუსს“ საქართველოს ეროვნული ბანკიდან აცნობეს. მათი ინფორმაციით, ოფიციალურ სტუმრებს საქართველოს ეროვნული ბანკი მასპინძლობს.

როგორც ინფორმაციაშია აღნიშნული, უკრაინის დელეგაციის ვიზიტის მთავარი მიზანი საქართველოს ეროვნული ბანკის მიერ გატარებული რეფორმების გაცნობა და განხორცილებული წარმატებული პროექტების შესახებ გამოცდილების გაზიარებაა.

კობა გვენეტაძისა და იაკივ სმოლის შევედრაზე ორი ქვეყნის ცენტრალური ბანკის ხელმძღვანელმა ურთიერთთანამშრომლობის საკითხები, რეგიონის ეკონომიკური მდგომარეობა და მიმდინარე მაკროეკონომიკური ტენდენციები განიხილა.

ვიზიტის ფარგლებში დაგეგმილია უკრაინის ცენტრალური ბანკის დელეგაციის სამუშაო შეხვედრები საქართველოს ეროვნული ბანკის მაკროეკონომიკისა და სტატისტიკის და ფინანსური სტაბილურობის ანალიზის დეპარტამენტების წარმომადგენლებთან. უკრაინელი კოლეგების განსაკუთრებული ინტერესის საგანს მომხმარებელთა უფლებების დაცვისა და ფინანსური განათლების მიმართულებით საქართველოს ეროვნული ბანკის მიერ განხორცილებული პროექტების გაცნობა წარმოადგენს.

დღეს უკრაინის ცენტრალური ბანკის დელეგაცია ეროვნული ბანკის საკასო ცენტრს ეწვევა და დეტალურად გაეცნობა ცენტრის საქმიანობას.

“ეს არის ჩემი პირველი ვიზიტი საქართველოს ეროვნულ ბანკში. დღევანდელი შეხვედრის მთავარია მიზანია, მივიღოთ ინფორმაცია და გავიზიაროთ საქართველოს ეროვნული ბანკის გამოცდილება სხვადასხვა მიმართულებით. შეხვედრაზე ვიმსჯელეთ ისეთ ძირითად საკითხებზე, როგორიცაა მონეტარული პოლიტიკა, ფინანსური სტაბილურობა, ინფლაციის თარგეთირება და ეროვნული ბანკის მიერ სხვადასხვა მიმართულებით განხორციელებული წარმატებული რეფორმები”, – განაცხადა იაკივ სმოლიმ.

Share