Home » საზოგადოება » „თუ ჩვენი სიმდიდრე – წყლის, ქარისა და მზის რესურსი ეფექტიანად არ გამოვიყენეთ, დიდი გამოწვევების წინაშე დავდგებით“
„თუ ჩვენი სიმდიდრე - წყლის, ქარისა და მზის რესურსი ეფექტიანად არ გამოვიყენეთ, დიდი გამოწვევების წინაშე დავდგებით“

„თუ ჩვენი სიმდიდრე – წყლის, ქარისა და მზის რესურსი ეფექტიანად არ გამოვიყენეთ, დიდი გამოწვევების წინაშე დავდგებით“

„ვათვითცნობიერებთ, რომ ჩვენი ქვეყნის დემოკრატიზაციის კვალობაზე ძალიან მაღლა დგას და ვითარდება ადამიანის უფლებების დაცვის, ასევე გარემოს დაცვის სტანდარტები, ამ კუთხით საუკეთესო ევროპულ მაგალითებსაც ვუტოლდებით, მაგრამ ამავდროულად, აუცილებელია მეტი მუშაობა, რასაც ჩვენ ვახორციელებთ იმისთვის, რომ შედგეს პროდუქტიული დიალოგი მოსახლეობას, ინვესტორსა და არასამთავრობო ორგანიზაციებს შორის“, – ამის შესახებ ეკონომიკის მინისტრის მოადგილემ ნათია თურნავამ მედიის წარმომადგენლებთან განაცხადა.

„საბოლოო ჯამში, ყველა ამ სოციალური ასპექტის გათვალისწინებით ინვესტიციები უნდა დაჩქარდეს და ადგილობრივი ენერგეტიკის წყაროები განვითარდეს. თუ ჩვენი სიმდიდრე – წყლის, ქარისა და მზის რესურსი ეფექტიანად არ გამოვიყენეთ, რა თქმა უნდა, დიდი გამოწვევების წინაშე დავდგებით“ , – განაცხადა თურნავამ.

ჟურნალისტის კითხვაზე, რატომ ფერხდება ზოგჯერ რომელიმე ენერგეტიკული პროექტი, ნათია თურნავამ განმარტა, რომ ასეთი პრობლემა ყოველთვის კომპლექსურია და არ არის ერთ კონკრეტულ ასპექტზე დამოკიდებული.

„ერთი მხრივ, ჩვენი ბაზარი, ჩვენი საინვესტიციო გარემო არის ძალიან მიმზიდველი ინვესტორებისთვის და ამ თვალსაზრისით, ენერგეტიკა ყოველთვის არის ერთ-ერთი ლიდერი, მაგრამ მოხდა გარკვეული აცდენა სოციალური პრობლემის გათვალისწინებასთან. ვფიქრობ, რომ მოსახლეობასთან მეტი მუშაობა და დიალოგია საჭირო, ამას ინვესტორებიც ათვითცნობიერებენ. ჩვენ როლს ვხედავთ ამ დიალოგის ფასილიტაციაში ანუ ეს ორი კომპონენტი – სოციალურ/ეკოლოგიური მხარე და საინვესტიციო მიმზიდველობა უნდა დაეწიოს ერთმანეთს“ – განაცხადა მინისტრის მოადგილემ.

ნათია თურნავამ დღეს სასტუმრო „შერატონში“ კავკასიის რეგიონის ენერგეტიკული უსაფრთხოებისადმი მიძღვნილი კონფერენცია მისასალმებელი სიტყვით გახსნა და ისაუბრა იმ გამოწვევებსა თუ მნიშვნელოვან მიმართულებებზე, რომლებიც აქტუალურია საქართველოში ენერგეტიკულ საკითხებზე ცნობიერების ამაღლების კუთხით.

Share