Home » საზოგადოება » „რამდენიმე ასეულ ადამიანს შესაძლოა, არასწორად მოეხსნას და იმავე რაოდენობას არასწორად დაენიშნოს სოციალური დახმარება“
„რამდენიმე ასეულ ადამიანს შესაძლოა, არასწორად მოეხსნას და იმავე რაოდენობას არასწორად დაენიშნოს სოციალური დახმარება“

„რამდენიმე ასეულ ადამიანს შესაძლოა, არასწორად მოეხსნას და იმავე რაოდენობას არასწორად დაენიშნოს სოციალური დახმარება“

რამდენიმე ასეულ ადამიანს შესაძლოა, არასწორად მოეხსნას და იმავე რაოდენობას არასწორად დაენიშნოს სოციალური დახმარება, – ამის შესახებ ჯანდაცვის მინისტრმა დავით სერგეენკომ პარლამენტის პლენარულ სხდომაზე განაცხადა, სადაც მისი ინტერპელაციის წესით მოსმენა მიმდინარეობს. მისი თქმით, არსებული მდგომარეობით, სოციალური დახმარებების მინიჭების მეთოდოლოგიაში ცდომილება 2,7%-ია.

„აბსოლუტური სიზუსტით ვერც ერთი სისტემა ვერ მოქმედებს, მათ შორის ვერც სოციალური დახმარების მინიჭების. ასე, რომ არის შემთხვევები, როდესაც არასწორად ეხსნება და შესაბამისად, არასწორად ენიშნება სოციალური დახმარება. ამის პროცენტიც იზომებოდა წლების განმავლობაში და 2015-2016 წლებში ცვლილებების გატარებამდე, ეს იყო 5,1% და ახლა შემცირდა 2,7%-მდე, თუმცა ესეც საკმაოდ დიდი ცდომილებაა. ეს ნიშნავს, რომ რამდენიმე ასეულ ადამიანს შესაძლოა არასწორად მოეხსნას და იმავე რაოდენობას არასწორად დაენიშნოს სოციალური დახმარება,“ – განაცხადა დავით სერგეენკომ.

მისივე ინფორმაციით, მას შემდეგ, რაც 2015 წელს სოციალური დახმარებების მინიჭების მეთოდოლოგიაში ცვლილებები განხორციელდა, იმ ბავშვთა რაოდენობა, რომლებიც საარსებო შემწეობას იღებენ, 108 ათასიდან 157 ათასამდე გაიზარდა. სერგეენკოს თქმით, ეს არ ნიშნავს, რომ ღარიბი ბავშვების რაოდენობა გაიზარდა.

„სოციალური დახმარებების მინიჭების მეთოდოლოგიის ცვლილების ძირითადი ნაწილი მიმართული იყო რამდენიმე სტრატეგიული მიზნის მისაღწევად. ერთი – მინიმუმამდე ჩამოსულიყო სუბიექტური გადაწყვეტილებების მიღების შესაძლებლობა შემფასებლისგან და მეორე – საჭიროებები ორიენტირებული ყოფილიყო უფრო მათზე, ვისაც მაქსიმალურად სჭირდებოდათ ეს,“ – განაცხადა მინისტრმა.

სერგეენკოს თქმით, სოციალური დახმარების მინიჭების არსებული მეთოდოლოგიის ერთ-ერთი უმთავრესი გამოწვევა რთულად გასაგები ფორმულაა, რის გამოც, მინისტრის თქმით, მიღებული გადაწყვეტილებების ახსნა მოსახლეობისთვის რთულია.

Share