Home » საზოგადოება » „ფრიდომ ჰაუსის“ ანგარიშში კვლავაც რჩება არასწორი ფაქტები, რაც აუცილებლად უნდა გასწორდეს“
„ფრიდომ ჰაუსის“ ანგარიშში კვლავაც რჩება არასწორი ფაქტები, რაც აუცილებლად უნდა გასწორდეს“

„ფრიდომ ჰაუსის“ ანგარიშში კვლავაც რჩება არასწორი ფაქტები, რაც აუცილებლად უნდა გასწორდეს“

საერთაშორისო ორგანიზაცია „ფრიდომ ჰაუსის“ ანგარიშისა და ამავე ორგანიზაციის მიერ პირველ არხთან მიმართებაში დაშვებული შეცდომის გამოსწორების შესახებ პირველი არხის გენერალური დირექტორი განცხადებას ავრცელებს.

ვასილ მაღლაფერიძის განცხადებას უცვლელად გთავაზობთ.

„ფრიდომ ჰაუსმა“ გუშინ ნაწილობრივ გამოასწორა ერთი ფაქტობრივი შეცდომა, რომელიც თავის ანგარიშში დაუშვა პირველ არხთან მიმართებაში, რაც კარგი და მისასალმებელი ამბავია, თუმცა, სრულიად არასაკმარისი, ვინაიდან, ამ ანგარიშში კვლავაც ვხვდებით კატეგორიულად მცდარ ან ძალიან საკამათო ფაქტებს და მათგან გამომდინარე შეფასებებს.

აქედან გამომდინარე, ბუნებრივად ჩნდება სურვილი და მოთხოვნა, რომ ღია და გამჭვირვალე გახდეს ის პროცედურა, თუ როგორი ფორმით და ვინ აწვდის ამ ორგანიზაციას ინფორმაციებს, ვინაიდან, საზღვარგარეთ, ხშირად, სწორედ ამ ტიპის ანგარიშებიდან იქმნიან წარმოდგენას საქართველოში არსებული მდგომარეობის შესახებ.

ძალიან მნიშვნელოვანია, ინფორმაციის მიმწოდებელთა მიუკერძოებლობა და კომპეტენტურობა, მით უმეტეს, რუსეთიდან ისედაც მომდინარე დეზინფორმაციული პროპაგანდის ფონზე და თუ ამას დაემატება “ფრიდომ ჰაუსის” მიერ გავრცელებული არასწორი ფაქტები და ინტერპრეტაციები, ეს ძალიან დააზიანებს მოვლენების სწორად აღქმის პროცესს.

გუშინ შეტანილი შესწორების მიუხედავად “ფრიდომ ჰაუსის” ანგარიშში კვლავაც რჩება არასწორი ფაქტები, მათ შორის, მედიასთან და კონკრეტულად პირველ არხთან მიმართებაში, რის შესახებაც აუცილებელია, გაგრძელდეს დისკუსია, მაგრამ განსაკუთრებით შემაშფოთებელია ტელეკომპანია “იმედთან” დაკავშირებით გამოთქმული ერთი შეფასება, რომელიც მხოლოდ “იმედს” არ ეხება და საქართველოს უახლესი ისტორიის გაყალბებას და თავდაყირა დაყენებას ნიშნავს.

ანგარიშში წერია, რომ თითქოს 2012 წლამდე ტელეკომპანია „იმედი“ კრიტიკული იყო „ნაციონალური მოძრაობის“ ხელისუფლების მიმართ და ხელისუფლების შეცვლის შემდეგ ლოიალური გახდა მოქმედი ​​​​მთავრობისადმი.

შინ თუ გარეთ ყველასთვის ცნობილია, როგორ მოხდა ყველას თვალწინ “იმედში” შეჭრა, შემდეგ მისი მიტაცება ხელისუფლების მიერ, რასაც, პარალელურად, ფონად გასდევდა სხვა ჟურნალისტების შანტაჟი, დევნა და დაპატიმრება. ეს შეუძლებელია, ვინმემ არ იცოდეს, ამიტომ, ნათელია, რომ ამ შემთხვევაში საქმე გვაქვს ფაქტების განზრახ გაყალბებასთან, რაც პირდაპირ დემოკრატიის წინააღმდეგ მიმართული ქმედებაა.

საქართველომ მტკივნეულად, თუმცა, მაინც დააღწია თავი იმ სამარცხვინო პერიოდს, როდესაც მთელ მედიასივრცეზე ერთიანი სახელმწიფო კონტროლი იყო დაწესებული და ვინც დღეს “ფრიდომ ჰაუსს” და სხვა ავტორიტეტულ ორგანიზაციებს მთლიანად “გადაბრუნებულ” ინფორმაციას აწვდის, ცხადია, რომ იგი ცდილობს შავის გათეთრებას და ისტორიის თავიდან გადაწერას მისი უკან დაბრუნების მიზნით.

რამდენადაც ვიცი, “ფრიდომ ჰაუსის” აღნიშნული ანგარიშის წარდგენა დაგეგმილია ამა წლის 18 აპრილს ვაშინგტონში. სწორედ ამიტომ, ძალიან მნიშვნელოვანია დროული და აქტიური კომუნიკაცია იმავე “ფრიდომ ჰაუსთან“, რომ დროულად გასწორდეს ანგარიშში შეტანილი დამახინჯებული ფაქტები, ვიდრე მათი ცნობიერებაში დალექვა დაიწყება და გაირკვეს რეალური მიზეზები, თუ რატომ მოხვდა ანგარიშში გაყალბებული ინფორმაციები“, – აღნიშნულია განცხადებაში, რომელსაც ვასილ მაღლაფერიძე „ფეისბუქზე“ ავრცელებს.

საერთაშორისო არასამთავრობო ორგანიზაცია „ფრიდომ ჰაუსმა“ გარდამავალ ეტაპზე მყოფი ქვეყნების შესახებ 2017 ანგარიშში საზოგადოებრივ მაუწყებელთან დაკავშირებით დაშვებული შეცდომა აღიარა და ჩაასწორა.

ანგარიშში აღნიშნული იყო, რომ ვასილ მაღლაფერიძემ საზოგადოებრივი მაუწყებლის დირექტორად არჩევის შემდეგ დახურა მეორე არხი, რომელიც პარლამენტის სხდომებს გადასცემდა.

„აღნიშნული ანგარიშის წინა ვერსიაში არასწორად იყო ნათქვამი, რომ საზოგადოებრივი მაუწყებლის მეორე არხი დაიხურა. არხი ამ დრომდე ოპერირებს, თუმცა მისი კონტენტი შემცირებულია“, – აღნიშნულია „ფრიდომ ჰაუსის“ ​ ანგარიშის შესწორებაში, რომელიც ანგარიშს ერთვის.

1tv.ge

Share