Home » საზოგადოება » უნგრეთის ელჩი – მივესალმებით საქართველოსთან უსაფრთხო დერეფნის შექმნის იდეას

უნგრეთის ელჩი – მივესალმებით საქართველოსთან უსაფრთხო დერეფნის შექმნის იდეას

საქართველო ძალიან კარგად უმკლავდება კორონავირუსის პანდემიის გამოწვევებს, – განაცხადა უნგრეთის ელჩმა, ვიქტორია ჰორვატმა საქართველოს ეკონომიკისა და მდგრადი განვითარების მინისტრ ნათია თურნავასთან შეხვედრის შემდეგ.

მისივე თქმით, მიესალმება უსაფრთხო დერეფნის შექმნის იდეას.

„ჩვენ დადებითად ვაფასებთ საქართველოს მთავრობის ინიციატივებს, რომელთა მეშვეობითაც შესაძლებელი გახდა ვირუსის გავრცელების დაბალი მაჩვენებლის შენარჩუნება. ჩვენ ასევე მივესალმებით უსაფრთხო დერეფნის შექმნის იდეას. მოხარული ვართ, რომ მონაწილეობას ვიღებთ ამ მოლაპარაკებებში და ვიქნებით ერთ-ერთი პირველები იმ ქვეყნებს შორის, რომლებიც თქვენს მშვენიერ ქვეყანაში გამოგზავნიან ბიზნესებსა და ტურისტებს“, – განაცხადა უნგრეთის ელჩმა.

შეხვედრაზე განსაკუთრებული ყურადღება გამახვილდა ორ ქვეყანას შორის პირდაპირი ავიამიმოსვლის აღდგენაზე, ასევე თანამშრომლობაზე ტურისტულ სფეროში უსაფრთხო სტანდარტების დანერგვისა და ორმხრივი მწვანე დერეფნის ჩამოყალიბების მიმართულებით.

Share