Home » საზოგადოება » უბისა-შორაპანის მშენებელ კომპანიას გაფრთხილება მიეცა

უბისა-შორაპანის მშენებელ კომპანიას გაფრთხილება მიეცა

საქართველოს რეგიონული განვითარებისა და ინფრასტრუქტურის მინისტრის პირველი მოადგილე, საავტომობილო გზების დეპარტამენტის თავმჯდომარე ირაკლი ქარსელაძე, რიკოთის საუღელტეხილო გზის უბისა-შორაპანის მონაკვეთის მშენებელი და საზედამხედველო კომპანიების წარმომადგენლებს შეხვდა. შეხვედრაზე, სოფელ უბისაში მომხდარ ფაქტთან დაკავშირებით, მშენებელი და ზედამხედველი კომპანიების წარმომადგენლებმა დეტალური ინფორმაცია წარმოადგინეს და შრომის უსაფრთხოების გაუმჯობესების მიმართულებით დეპარტამენტის მხრიდან შესაბამისი მითითებები მიიღეს.

14 თებერვალს, დილის საათებში, სოფელ უბისაში, უბისა-შორაპანის მონაკვეთის მშენებელი კომპანიის „China Road and Bridge Corporation“-ის საამქროს თუნუქის სახურავი ჩამოიშალა, რის შედეგადაც მსუბუქად დაზიანდა „Road and Bridge Corporation“-ის დასაქმებული ჩინეთის ორი მოქალაქე, ხოლო საქართველოს ერთმა მოქალაქემ შედარებით მძიმე დაზიანებები მიიღო.   

„როგორც მშენებელ, ასევე ზედამხედველ კომპანიას წარმოვადგენინეთ განმარტებები მომხდარი შემთხვევის შესახებ. შემთხვევა დროებით ნაგებობაზე მოხდა. დაშავებულებს ადგილზე ჩაუტარდათ პირველადი დახმარება, საქართველოს მოქალაქე კი ქუთაისის რეფერალურ საავადმყოფოში გადაიყვანეს, სადაც აგრძელებს მკურნალობას. მისი მდგომარეობა სტაბილურია. მიმდინარეობს მომხდარის მიზეზების დადგენა. შრომის უსაფრთხოების ნორმების დაცვასთან დაკავშირებით, დეპარატმენტის მხრიდან მკაცრად გავაფრთხილეთ კომპანიის წარმომადგენლები. ამასთანავე, ჯანდაცვის სამინისტროს შრომის ინსპექცია უკვე ატარებს მოკვლევას და ხარვეზების დადგენის შემთხვევაში უმკაცრესად დაისჯება ყველა პასუხისმგებელი პირი. ჩვენ ყოველდღიურ რეჟიმში ვაგრძელებთ მონიტორინგს, რათა ხარვეზის გამოვლენის შემთხვევაში ყველა დარღვევა მყისიერად აღმოიფხვრას,“ -განაცხადა ირაკლი ქარსელაძემ.

საავტომობილო გზების დეპარტამენტის ინიციატივით, მონიტორინგი განხორციელდება რიკოთის საუღელტეხილო გზის მშენებელი სხვა კომპანიების  სამშენებლო მოედანზეც,  რათა დასაქმებულთა უსაფრთხოება და შრომის პირობები მაქსიმალურად იყოს დაცული.

რაც შეეხება რიკოთის საუღელტეხილო მონაკვეთზე მიმდინარე სამუშაოებს, სამშენებლო პროცესი არ შეფერხებულა და გეგმის მიხედვით მიმდინარეობს.ფოტო მასალა

Share