Home » საზოგადოება » თენგიზ ცერცვაძე – დამიჯერეთ, სრული გულწრფელობით გეუბნებით, არ არსებობს მსოფლიოში ქვეყანა, სადაც საეჭვო პაციენტს ასეთ მოკლე დროში უტარდებოდეს სრული გამოკვლევა

თენგიზ ცერცვაძე – დამიჯერეთ, სრული გულწრფელობით გეუბნებით, არ არსებობს მსოფლიოში ქვეყანა, სადაც საეჭვო პაციენტს ასეთ მოკლე დროში უტარდებოდეს სრული გამოკვლევა

თბილისის ინფექციური საავადმყოფოს დირექტორმა თენგიზ ცერცვაძემ დღევანდელ ბრიფინგზე ჰოსპიტალური სექტორის მზადყოფნის საკითხზე გაამახვილა ყურადღება.

კერძოდ, ცერცვაძემ ისაუბრა, პაციენტების რიცხვის დრამატული მატების შემთხვევაში, თუ რამდენად არის მზად ქვეყნის ჰოსპიტალური სექტორი.

მან მედიას მთავრობის მიერ ამ მიმართულებით მიღებული გადაწყვეტილება გააცნო.

ცერცვაძის თქმით, თბილისის ინფექციური საავადმყოფოს გარდა, პაციენტებს კიდევ რამდენიმე სხვა კლინიკა მიიღებს.

საუბარია 4 სახელმწიფო კლინიკაზე ჯამში 440 სწოლით.

„დღეს პრემიერთან შეხვედრაზე მიღებული იქნა ძალიან მკაფიო გადაწყვეტილება, რომ პირველ ეტაპზე აქამდე თუ მხოლოდ ინფექციური საავადმყოფო იღებდა ავადმყოფებს და მხოლოდ საკარანტინო პაციენტებს იღებდნენ საავადმყოფოები, მაგალითად რესპუბლიკური და სხვა, ჯერჯერობით ეს სრულიად საკმარისი იყო, უკვე გადაწყდა, რომ პირველი რიგის მიმღებები იქნება ხუთი კლინიკა – ინფექციური საავადმყოფო დარჩება, საუნივერსიტეტო კლინიკა, ყოფილი მერვე საავადმყოფო მთლიანად დაიცლება, არ არის ჯერ ამის საჭიროება, მაგრამ საზოგადოება რომ მშვიდად იყოს. 140 საწოლია იქ, ძალიან კარგი რეანიმაციული განყოფილებაა 40 საწოლზე. რესპუბლიკური საავადმყოფო მთლიანად გამოთავისუფლდება, კარანტინში მყოფი პაციენტები სხვა სივრცეში გადაინაცვლებენ და რესპუბლიკური საავადმყოფო ავადმყოფების მიმღები გახდება. ასევე გორის ჰოსპიტალი, სადაც არის დაახლოებით 140 სწოლი. პლუს ბოჭორიშვილის კლინიკაში 11 საწოლი. ოთხი კლინიკა 440 სწოლით უკვე მობილიზებულია, ხვალისთვის უკვე იქნება დაცლილი“ ,- განაცხადა თენგიზ ცერცვაძემ.

მისივე თქმით, საეჭვო პაციენტის გამოკვლევა-დიაგნოსტიკის დროს ჯერ არანაირი შეფერხება არ ყოფილა.

„ბოლო პერიოდში და არა მარტო ბოლო პერიოდში, სულ ისმოდა კითხვა როგორც ჟურნალისტებისგან, ისე ოპონენტებისგან, ისე პოლიტიკურად ანგაჟირებული და არაანგაჟირებული პირებისგან, ყველასგან, არაკეთილმოსურნეებისგან და კეთილმოსურნეებისგან, გასაგებია, რასაც აკეთებს დაავადებათა კონტროლის ცენტრი, სამინისტრო, სასაზღვრო სამსახური და ზოგადად მთავრობა, შსს და სხვა, ისმებოდა კითხვა, რომელიც რჩებოდა მეორე პლანზე, რამდენად არის მზად ავადმყოფების რიცხვის მატების შემთხვევაში და მითუმეტეს დრამატული მატების შემთხვევაში ქვეყნის ჰოსპიტალური სექტორი. არსებობს თუ არა ჰოსპიტალური სექტორის მზადყოფნა, მზადყოფნის გეგმა და ამ გეგმის ეტაპები -გეგმა ა, გეგმა ბ, გეგმა ც და საკმარისი იქნება თუ არა ეს იმ მოთხოვნის დასაკამყოფილებლად, რაც შესაძლოა საქართველოში ახლო მომავალში წარმოიშვას ავადმყოფების ზრდის თვალსაზრისით. არც ერთი შეფერხება ჯერ რომელიმე პაციენტის, საეჭვო პაციენტის, შესაძლო პაციენტის გამოკვლევაზე, დიაგნოსტიკაზე არ ყოფილა. დამიჯერეთ, სრული გულწრფელობით გეუბნებით, არ არსებობს მსოფლიოში ქვეყანა, სადაც შესაძლო შემთხვევის პაციენტს, საეჭვო პაციენტს ასეთ მოკლე დროში უკეთდებოდა ყველაფერი და უზრუნველყოფილი იყო ყველაფრით. არც ერთი შემთხვევითი შეფერხებაც კი არ ყოფილა. ერთ დღეში პაციენტს უტარდებოდა სრული გამოკვლევა, ლუგარის ცენტრში ვირუსზე ტესტირების ჩათვლით. 24 საათიც არ ყოვნდებოდა პაციენტი. 24 საათი თუ არის მინიმუმი, 18 საათში პაციენტი მთლიანად გამოკვლეული იყო, პასუხი ცნობილი იყო“ ,- განაცხადა თენგიზ ცერცვაძემ

1tv.ge

Share